Unonan Timoteo 6:1-21
6 Komon ta saramay manasakbat na pako na inkaaripen et itultuloy dan ipasen a makanepegan na sigpot a galang iray amo ra,+ pian agbalot pansalitaan na mauges so ngaran na Dios tan say bangat to.+
2 Niarum ni, ag-ira komon magmamaliw ya andiay respeto ed saray mananisian amo ra lapud agagi iraya. Imbes, nepeg a mas mabulos iran manlingkor, lapud saramay nagugunggonaan ed maong a serbisyo ra et kapananisiaan da tan inad-aro ra.
Itultuloy mon ibangat irayan bengatla tan iter irayan bilin.
3 No walay mangibabangat na sananey a doktrina tan agmipapakna ed maabig* iran bilin,+ a nanlapud Katawan tayon Jesu-Kristo, odino ed bangat a mitunosan ed debosyon ed Dios,+
4 sikatoy mapaatagey tan anggapon balot so natatalosan to.+ Say pinonot to* et pisusuppiatan tan pidedebati nipaakar ed saray salita.+ Sarayan bengatla et panlalapuan na imon, pankokolkol, panagpauges,* makaderal a panag-inap,
5 naynay a pansasangsangan nipaakar ed angkekelag a bengatla na saray totoon aderal lay kanonotan da+ tan agda la amtay katuaan, ya iisipen dan pakagunggonaan da so debosyon ed Dios.+
6 Diad tua et baleg a pakagunggonaan so debosyon ed Dios+ ya atekepan na inkakontento.
7 Ta anggapon balot so inawit tayo diad mundo, tan anggapon balot so naawit tayo manlapu dia.+
8 Kanian, no walay naakan tan kawes* tayo, mankontento tayo la ed saratan.+
9 Balet saramay determinadon onyaman et napepelag ed tukso+ tan patit tan dakel ya andi-kakanaan tan makapasakit a pilpilalek a mangilelereg ed totoo diad kadederal tan kabagbag.+
10 Ta say panangaro ed kuarta et lamot na amin a makaderal a bengatla, tan diad panggugunaet na arum a peneken iyan panangaro, abalang ira ed pananisia tan sinasaksak day sarili ra na dakel a pakasakitan.+
11 Balet sika, O too na Dios, arawian mo irayan bengatla. Ingen ta seetan mon ipatnag so inkatunong, debosyon ed Dios, pananisia, aro, panagsungdo, tan inkaulimek.+
12 Milaban ka diad maabig a pilalaban parad pananisia; bemben kan malet ed bilay ya andi-anggaan ya anawagan ed sika tan parad saya et angiter ka na maabig a pantasi diad arap na dakel a totoo.
13 Diad arapan na Dios, a pansiasiansiaen ton mabilay so amin a bengatla, tan si Kristo Jesus, ya angiter na maabig a pantasi diad arap nen Poncio Pilato,+ bilinen ta ka
14 ya unor moy ganggan diad malinis tan andiay pakabalawan a paraan anggad ompatnag so Katawan tayon Jesu-Kristo.+
15 Sayan maliket tan alenleneg a Manuley et ompatnag diad aturon panaon. Sikato so Ari na saray arari tan Katawan na saray katawan,+
16 say alenleneg a walaan na imortal a bilay,+ a manaayam ed agnaasinggeran a liwawa,+ a sikatoy ag-anengneng odino agnanengneng na too.+ Niiter komon ed sikato so galang tan andi-anggaan a biskeg. Amen.
17 Bilin* mo iramay mayayaman ed kaplesan a sistema na mundo* ya ag-ira magmaliw a mapaatagey, tan say panilaloan da et aliwan diad agnapanmatalkan iran kayamanan+ noagta diad Dios, a daakan a mangitatarya ed sikatayo na amin a bengatlan panliliketan tayo.+
18 Ibagam a manggawa ray maong, magmaliw iran mayaman ed saray maabig a gawa, magmaliw iran mabunlok, akaparaan a mangiter,+
19 a mantipon ira na sakey a seguradon kayamanan, say maabig a pundasyon ed arapen,+ pian nabembenan dan malet so tuan bilay.+
20 Timoteo, alwaran moy inmatalek ed sika,+ arawian mo ray andi-kakanaan a panagsalita ya agmitunosan ed bengatlan masanto tan saray mankokontraan ya ideya na palson “kakabatan.”+
21 Ta saray arum et sinmian ed pananisia diad pangipapangta ra ed satan a kakabatan.
Niwala komon ed sikayo so agnaparaan a kaabigan.
Paimanod leksab
^ Odino “makagunggona.”
^ Odino “Say panlikliketan ton maong.”
^ Odino “makapasakit iran panagsalita.”
^ Odino posiblin, “nasiroman.” Literal, “pansakbong.”
^ Odino “Iganggan.”
