Komaduan Arari 13:1-25
13 Diad koma-23 taon na uley nen Jehoas+ ya anak nen Ahazias+ ya ari na Juda, si Jehoahaz ya anak nen Jehu+ et nagmaliw ya ari ed Israel legan a walad Samaria, tan sikatoy nanuley na 17 taon.
2 Sikatoy nantultuloy a nanggaway mauges ed pakanengneng nen Jehova, tan intultuloy ton ginawa imay kasalanan nen Jeroboam ya anak nen Nebat ya inlagyat ton gawaen na Israel.+ Agto itan pinaliisan.
3 Kanian dinmalang so sanok nen Jehova+ ed Israel,+ tan diad saraman ya agew et inyawat to rad lima nen Arin Hazael+ na Sirya tan diad lima nen Ben-hadad+ ya anak nen Hazael.
4 Ag-abayag, si Jehoahaz et kinmerew na panangasi ed si* Jehova, tan sikatoy dinengel nen Jehova, ta anengneng toy impamairap na ari na Sirya ed Israel.+
5 Kanian inikdan nen Jehova so Israel na manangiliktar+ pian ibulos ira ed lima na Sirya, tan saray Israelita et akapanayam ed saray abung da a singa dati.*
6 (Balet agda pinaliisan so kasalanan na sankaabungan nen Jeroboam ya inlagyat ton gawaen na Israel.+ Intultuloy dan ginawa iyan kasalanan,* tan say sagradon poste*+ et nansiansian akaalagey diad Samaria.)
7 Say akera ed kinen Jehoahaz et sakey ya armada, a walaan labat na 50 lalakin de-kabayoan, 10 karwahe, tan 10,000 sundalon manaakar, lapud dineral ira na ari na Sirya,+ a ginatin-gatinan to ran singa dabok diad panaoy panag-ilik.+
8 Tan saray arum nin agawa ed si Jehoahaz, say amin a kimey to tan say impangipatnag toy inkabiskeg to, et akasulat ed libro na saray agawa diad panaon na arari na Israel.
9 Tan si Jehoahaz et nampainawa la a kaiba na saray inmuunan atateng to, tan sikatoy imponpon da diad Samaria;+ tan si Jehoas ya anak to so nagmaliw ya ari a kasalat to.
10 Diad koma-37 taon na uley nen Arin Jehoas na Juda, si Jehoas+ ya anak nen Jehoahaz et nagmaliw ya ari ed Israel legan a walad Samaria, tan sikatoy nanuley na 16 a taon.
11 Et nantultuloy a nanggaway mauges ed pakanengneng nen Jehova, ya agto pinaliisan so amin a kasalanan nen Jeroboam ya anak nen Nebat ya inlagyat ton gawaen na Israel.+ Sikatoy nansiansia* ed sarayan kasalanan.
12 Tan saray arum nin agawa ed si Jehoas, say amin a kimey to tan say impangipatnag toy inkabiskeg to tan no panon so impilaban tod si Arin Amazias na Juda,+ et akasulat ed libro na saray agawa diad panaon na arari na Israel.
13 Tan si Jehoas et nampainawa la a kaiba na saray inmuunan atateng to, tan si Jeroboam*+ so yinmurong ed trono to. Si Jehoas et imponpon diad Samaria a kaiba na saray arari na Israel.+
14 Sanen si Eliseo+ et adapoan na sakit a pansengegay ipatey to, linmad sikatoy Jehoas ya ari na Israel tan inakisan to, a kuan to: “Ama, ama! Samay karwahe na Israel tan saray de-kabayoan a sundalo to!”+
15 Et inkuan nen Eliseo ed sikato: “Mangala kay bekang tan saray pana.” Kanian angala na bekang tan saray pana.
16 Insan inkuan to ed ari na Israel: “Bembenan mo ’tay bekang.” Kanian binembenan to, insan intapew nen Eliseo iray lima to ed saray lima na ari.
17 Tan inkuan to: “Lukasan moy bintana diad bandad bukig.” Kanian nilukasan to. Insan inkuan nen Eliseo: “Ipanam!” Kanian impana to. Diad saman et inkuan to: “Say pana na pananalo* nen Jehova, say pana na pananalo ed* Sirya! Kabilen* mo so Sirya diad Afek+ ya anggad naupot mo ra.”
18 Insan inkuan to: “Alam iray pana,” kanian inala to iratan. Tan inkuan tod ari na Israel: “Ipaspas mod dalin.” Kanian impaspas to ya amitlo insan tinmunda.
19 Diad satan et sinmanok ed ari so too na tuan Dios tan inkuan to: “Impaspas mo komon ed dalin ya aminlima odino amin-anem! Ta no ontan et kabilen moy Sirya ya anggad naupot mo ra, balet natan et mamitlom labat a kabilen so Sirya.”+
20 Kayari na satan, inatey si Eliseo tan imponpon da. Et wala ray grupo na tulisan a Moabita+ ya oonlad dalin da diad kada kagapoy taon.*
21 Et sanen wala ray totoon mangipoponpon na sakey a laki, anengneng da may grupo na tulisan, kanian imbuntok dan tampol so bangkay na laki diman ed angiponponan ed si Eliseo insan ira binmatik. Kadiwit na bangkay ed saray pukel nen Eliseo, abilay may laki+ tan inmalagey.
22 Et pinairap nen Arin Hazael+ na Sirya so Israel+ diad amin ya agew nen Jehoahaz.
23 Balet, impatnag nen Jehova so pabor tan panangasi tod sikara,+ tan inyansakit to ra nisengeg ed impisipanan tod si Abraham,+ Isaac,+ tan Jacob.+ Agto ra labay a deralen, tan agto ra impulisay ed arapan to anggad sayan agew.
24 Sanen inatey si Arin Hazael na Sirya, si Ben-hadad ya anak to so nagmaliw ya ari a kasalat to.
25 Si Jehoas ya anak nen Jehoahaz et binawi tod si Ben-hadad ya anak nen Hazael iray syudad a sinamsam to ed kinen Jehoahaz ya ama to legan na guerra. Amitlon kinabil* nen Jehoas si Ben-hadad+ tan abawi to ray syudad na Israel.
Paimanod leksab
^ Odino “pinalemek toy lupa nen.”
^ Salanti, diad kareenan tan kaligenan.
^ Literal, “Ditan so nanakaran to.”
^ Literal, “nanakar.”
^ Salanti, si Jeroboam II.
^ Odino “panangiliktar.”
^ Odino “panangiliktar sumpad.”
^ Odino “Taloen.”
^ Literal, “diad isabi na taon,” nayarin diad bulan na Abib (Nisan) na saray Judio. Nengnengen so Apendise B15.
^ Odino “tinalo.”
