Komaduan Awaran 1:1-17
1 Si Solomon ya anak nen David et lalo nin binmiskeg ed panuuley to bilang ari, tan walad sikato si Jehova a Dios to tan ginawa To a lalon makapanyari.+
2 Et impatawag nen Solomon so interon Israel, saray papangulo na nilibo tan papangulo na nilasus, saray ukom, tan amin a papangulo na interon Israel, saray lider na saray pamilya na kaamaan.
3 Insan si Solomon tan say interon kongregasyon et linmad atagey a pasen diad Gibeon,+ ta diman so kawalaan na samay tolda a pantitiponan, say tolda na tuan Dios a ginawa nen Moises a lingkor nen Jehova sanen walad kalawakan.
4 Balet say Kaban na tuan Dios et inala nen David ed Kiriat-jearim+ tan inyakar tod samay pasen ya imparaan to parad satan; impaalageyan to itan na tolda diad Jerusalem.+
5 Tan say altar a gansa+ a ginawa nen Bezalel+ ya anak nen Uri ya anak nen Hur et inyan ed arapan na tabernakulo nen Jehova; tan si Solomon tan say kongregasyon et manpipikasi diad arap na satan.*
6 Ditan et angiyapay si Solomon ed si Jehova, tan sikatoy angiyapay na 1,000 apay a popoolan diad altar a gansa+ na tolda a pantitiponan.
7 Diad saman a labi et nampanengneng so Dios ed kinen Solomon tan inkuan to: “Ibagam no antoy labay mon iter kod sika.”+
8 Et inkuan nen Solomon ed Dios: “Impatnag mo so abalbaleg a matoor a panangaro ed si David+ ya amak, tan ginawam ak ya ari a kasalat to.+
9 Natan, O Jehova a Dios, natoor komon so sipan mo ed kinen David ya amak,+ ta ginawam ak ya ari ed saray totoon singa karakel na dabok ed dalin.+
10 Ikdan mo ak komon natan na karunongan tan kakabatan+ a mangiwanwan ed sarayan totoo,* ta siopay makayarin mangukom ed sayan dakdakel a totoom?”+
11 Et inkuan na Dios ed si Solomon: “Lapud saya so pirawat na pusom tan agka kinmerew na kaykayarian, kayamanan, tan kagalangan odino say ipatey* na saramay mamubusol ed sika, tan agka met kinmerew na andukey a bilay,* noagta kinmerew kay karunongan tan kakabatan a mangukom ed saray totook ya impauleyan kod sika bilang ari,+
12 niiter ed sika so karunongan tan kakabatan; balet ikdan ta ka met na kaykayarian, kayamanan, tan kagalangan ya agbalot agamoran na saramay ararin akaunad sika, tan agnagamoran na saray onsublay ed sika.”+
13 Kanian manlapud man ed atagey a pasen diad Gibeon,+ diman ed arapan na samay tolda a pantitiponan, si Solomon et linmad Jerusalem; tan nanuley ed Israel.
14 Et intultuloy nen Solomon so nantipon na saray karwahe tan saray kabayo;* sikatoy awalaan na 1,400 a karwahe tan 12,000 kabayo,*+ tan inyan to iratan diad saray syudad na saray karwahe+ tan diad asingger ed kawalaan na ari ed Jerusalem.+
15 Saray pilak tan balitok diad Jerusalem et ginawa na ari a singa karakel na saray bato,+ tan saray kiew a sedro a singa karakel na saray kiew a sikomoro a walad Sefela.+
16 Saray kabayo nen Solomon et sasaliwen ed Ehipto,+ tan saray ulop na negosyante na ari so pakyawan a manasaliw ed saratan* diad nigetar a presyo.+
17 Kada karwahen sasaliwen ed Ehipto et manbili na 600 a piraso na pilak, tan say sakey a kabayo et manbili na 150 piraso na pilak; insan da ilalako iratan ed amin ya arari na saray Heteo tan arari na Sirya.
Paimanod leksab
^ Odino “ontutupleg ed Sikato ditan.”
^ Literal, “ya ompaway tan onloob diad arapan na sarayan totoo.”
^ Odino “kamarerwa.”
^ Literal, “dakel ya agew.”
^ Odino “lalakin de-kabayoan.”
^ Odino “lalakin de-kabayoan.”
^ Odino posiblin, “manlalapud Ehipto tan Kue; sasaliwen iratan na saray negosyante na ari manlapud Kue,” a nayarin manutukoy ed Cilicia.
