Komaduan Awaran 19:1-11
19 Tan si Arin Jehosafat na Juda et pinmawil a maligen*+ ed abung* to diad Jerusalem.
2 Et linmad sikato si Jehu+ ya anak nen Hanani+ a makakanengneng na pasingawey tan inkuan tod ari: “Kasin saray mauges so nepeg mon tulongan,+ tan saramay mamubusol ed si Jehova so nepeg mon aroen?+ Lapud saya et sinmanok si Jehova ed sika.
3 Anggaman ontan, wala ray maong a bengatlan anengneng ed sika,+ lapud ineekal mod dalin iray sagradon poste* tan imparaan moy pusom* ya anapen so tuan Dios.”+
4 Et nantultuloy a nanayam si Jehosafat diad Jerusalem, tan nila to lamet iray totoo manlapud Beer-sheba anggad mapalandey a rehyon na Efraim,+ pian papawilen to ra ed si Jehova a Dios na inmuunan atateng da.+
5 Anuro met na saray ukom diad interon dalin na Juda, diad amin ya apadiran a syudad na satan.+
6 Tan inkuan tod saray ukom: “Imano yoy gagawaen yo, ta agkayo manguukom parad too noagta parad si Jehova, tan sikatoy walad sikayo sano ipapaakseb yoy panangukom.+
7 Takotan yo komon si Jehova.+ Manalwar kayo ed gagawaen yo, ta diad si Jehova a Dios tayo et anggapoy ag-inkahustisya,+ anggapoy panaglabi,+ tan agmangaawat na pasuksok.”+
8 Diad Jerusalem et tinuro met nen Jehosafat so arum a Levita tan saserdote tan arum a lider na saray pamilya na kaamaan ed Israel pian magmaliw iran ukom parad si Jehova tan manresolbe ed saray kaso parad saray manaayam ed Jerusalem.+
9 Tan ingganggan tod sikara: “Oniay nepeg yon gawaen nisengeg ed takot yod si Jehova, tekep na katooran tan nagnap* a puso:
10 Sano saray agagi yon manaayam ed saray syudad da et mangisegep na kaso nipaakar ed impamaagus na dala+ odino mantepet ira nipaakar ed ganggan, bilin, saray totontonen, odino saray panangukom, nepeg yo ran pasakbayan pian ag-ira mankasalanan ed arapan nen Jehova; no andi sikatoy onsanok ed sikayo tan ed saray agagi yo. Oniay nepeg yon gawaen, pian agkayo mankasalanan.
11 Et wadiay Amarias a manunan saserdote, a mangidadaulo ed sikayo ed amin a pamaakaran nen Jehova.+ Si Zebadias ya anak nen Ismael so manangidaulo ed sankaabungan na Juda nipaakar ed amin a pamaakaran na ari. Tan saray Levita et manlingkor bilang opisyal yo. Manpabiskeg kayo tan kiwas kayo, tan niwala komon si Jehova ed saramay manggagawa na maong.”*+
Paimanod leksab
^ Odino “a walaay kareenan.”
^ Odino “palasyo.”
^ Odino “desidido so pusom.”
^ Odino “walaay sigpot a debosyon.”
^ Odino “ed no antoy maong.”
