Komaduan Awaran 27:1-9
-
Si Jotam, ari na Juda (1-9)
27 Si Jotam+ et mantaon na 25 sanen nagmaliw ya ari, tan 16 taon a nanuley ed Jerusalem. Say ngaran na ina to et Jerusah ya anak nen Zadok.+
2 Sikatoy nantultuloy a nanggaway duga ed pakanengneng nen Jehova, a singa ginawa nen Uzias ya ama to,+ ingen ta agto sinali onloob ed templo nen Jehova.+ Balet siansia nin mauges so gagawaen na saray totoo.
3 Impaalagey to so bandad tagey a puerta na abung nen Jehova,+ tan dakdakel so impaalagey to diad padir na Ofel.+
4 Sikatoy angipaalagey met na saray syudad+ diad mapalandey a rehyon na Juda,+ tan angipaalagey na saray panag-amotan+ tan saray tori+ diad lugar na kakiewan.
5 Sikatoy akilaban ed ari na saray Ammonita+ tan tinalo to ra, kanian diad saman a taon et angiter iray Ammonita ed sikato na 100 a talenton* pilak, 10,000 sukat a cor* na trigo, tan 10,000 sukat na sebada. Ontan met so imbayar ed sikato na saray Ammonita diad komadua tan komatlon taon.+
6 Kanian nantultuloy a binmiskeg si Jotam, ta sikatoy determinadon manakar ed saray dalan nen Jehova a Dios to.
7 Tan saray arum nin agawa ed si Jotam, amin a guerran akibiangan to tan saray dalan to, et akasulat ed Libro na Saray Arari na Israel tan Juda.+
8 Sikatoy mantaon na 25 sanen nagmaliw ya ari, tan 16 taon a nanuley ed Jerusalem.+
9 Tan si Jotam et nampainawa la a kaiba na saray inmuunan atateng to, tan sikatoy imponpon da diad Syudad nen David.+ Tan si Ahaz ya anak to so nagmaliw ya ari a kasalat to.+
Paimanod leksab
^ Say sakey a talento et 34.2 kilo. Nengnengen so Apendise B14.
^ Say sakey a cor et 220 litro. Nengnengen so Apendise B14.
