Daniel 11:1-45
11 “Nipaakar ed siak, diad unonan taon nen Dario+ a Medo et linma ak pian sikatoy pabiskegen ko tan pakasilen ko.*
2 Ibagak natan ed sika so katuaan:
“Wala ni taloran ari ya ontalindeg* diad Persia, tan samay komapat et manipon na mas dakel a kayamanan nen saramay arum. Tan sano sikatoy ombiskeg lapud saray kayamanan to, pakiwasen toy amin ya onsumpa ed panarian na Gresya.+
3 “Tan ontalindeg so sakey a makapanyarin ari tan malaknab so uleyan to+ tan gawaen toy labay to.
4 Balet sano sikatoy makapanyari lan maong, say panarian to et naderal tan naapag ed apatiran dagem na tawen,+ balet aliwan diad saray kailalakan* to tan aliwan singa kalaknab na impanuley to; lapud say panarian to et nabagot tan niiter ed arum.
5 “Tan ombiskeg so ari na abalaten, salanti, sakey ed saray prinsipe to; balet walay sakey a makatalo ed sikato tan malaknab so panuley to, a mas mabiskeg ni nen samay sakey.*
6 “Kayari na pigaran taon, manmuyong ira, tan onlad ari na amianen so biin anak na ari na abalaten pian manggawa ra na paknaan. Balet agmansiansiay pakayari na samay anak a bii; tan agmansiansia so pakayari na ari; tan niyawat so anak a bii tan saramay mangaawit ed sikato, tan say ama to, tan samay mamapabiskeg ed sikato ed saraman a panaon.
7 Tan onsalat ed sikato* so sakey ed saray simit na lamot to tan sikatoy onlad armada tan onlusob ed panag-amotan na ari na amianen tan milaban ed sikara tan ontalona.
8 Sikatoy onlad Ehipto a kaiba iray dirios da, saray metal ya imahen da, saray mararakep* a kagawaan dan pilak tan balitok, tan pati saray ineerel. Pigaran taon ya agto labanan so ari na amianen,
9 tan sayan ari so onlusob ed panarian na ari na abalaten, balet ompawil lanlamang ed dalin to.
10 “Nipaakar ed saray anak to, manparaan ira parad guerra tan manipon ira na baleg tan mabiskeg ya armada. Sikatoy onabante tan ondalan a singa delap. Balet sikatoy ompawil, tan sikatoy miguerra ya anggad panag-amotan to.
11 “Tan onsanok so ari na abalaten tan onlan milaban ed ari na amianen; tan tiponen toy dakerakel a totoo, balet niyawat ira ed lima na samay sakey.
12 Tan naerel itan a dakerakel a totoo. Say puso to et magmaliw a mapaatagey, tan pateyen to iray samplon libolibo; balet agto usaren so mabiskeg a posisyon to.
13 “Tan ompawil so ari na amianen tan manipon na dakerakel a totoo a mas dakel nen samay akauna; tan diad panampot na saray panaon, kayari na pigaran taon, sikatoy onsabi a kaiba so baleg ya armada a walaay dakel a kagawaan.
14 Diad saraman a panaon et dakel so onsumpad ari na abalaten.
“Tan naimpluensyaan iramay maruksa* a kabaleyan mo tan salien dan patuaen so sakey a pasingawey; balet ag-ira ontalona.
15 “Tan onsabi so ari na amianen tan mantambak na dalanen ton pangubkob tan sakopen toy apadiran a syudad. Tan natalo iray armada na abalaten, pati saray sankamaongan a sundalo to; tan anggapoy pakayari ran onlaban.
16 Samay onlulusob ed sikato et gawaen to so labay to, tan anggapoy makatalo ed sikato. Sikatoy onalagey diad dalin na Dekorasyon*+ tan nawalaay pakayarin maneral.
17 Sikatoy determinado* ya onla a kaibay interon puersa na panarian to, tan walay nagawan paknaan;* tan sikatoy ontalona. Tan sikatoy naabuloyan a maneral ed anak a bii. Tan agmakatalindeg imay anak a bii, lapud sikatoy agmanmatoor ed sikato.
18 Lingawen to iray gilig na dayat tan dakel so sakopen to. Tan patundaen na sakey a komandante so panamabanday ed sikato na samay sakey, pian naandi la so kabandayan to. Ipawil to iya ed samay sakey.
19 Insan lingawen to iray panag-amotan diad dalin to, tan sikatoy napatir tan natumba, tan agla naromog.
20 “Tan onsalat ed sikato so sakey a mangibaki na managsingil na buis* ya onliber ed interon makapadinayew a panarian, ingen kayari na pigaran agew et sikatoy naderal, balet aliwan diad sanok odino ed guerra.
21 “Tan onsalat ed sikato so sakey a balbalawen,* tan agda iter ed sikato so kagalangan na panarian; tan sikatoy onsabi legay panaon na kaligenan* tan samsamen toy panarian ed panamegley na panagpalikdo.*
22 Tan niyanor na delap iray armada lapud sikato, tan naderal ira; ontan met so nagawa ed Lider+ na sipanan.+
23 Tan lapud akimuyong ira ed sikato, tilaan to ra tan sikatoy ontalindeg tan ombiskeg diad panamegley na sakey a melag a nasyon.
24 Legay panaon na kaligenan,* sikatoy onla ed sankaabigan iran lugar* na probinsya* tan gawaen to iray bengatlan agginawa na atateng to tan kaamaan na atateng to. Ibunog tod sikara iray asamsam tan inaala tan saray kayarian; tan sikatoy manplano na kaugsan ed saray apadiran a pasen, balet magano labat.
25 “Tan pakiwasen toy pakayari to tan say puso to sumpad ari na abalaten kaibay baleg ya armada, tan manparaan so ari na abalaten pian miguerra a kaibay balbaleg tan mabisbiskeg ya armada. Tan sikatoy agmakapansiansia, ta manplano ray kaugsan ed sikato.
26 Tan sikatoy igeba na saramay mamangan na mananam a kakanen to.
“Niyanor* so armada to, tan dakel so napatey.
27 “Nipaakar ed sarayan duaran ari, say walad puso ra et say panggaway mauges, tan onyurong ira ed sakey a lamisaan tan mantitilaan ira. Balet anggapoy ontalonan plano ra, lapud say anggaan et nagawa ni ed aturon panaon.+
28 “Tan ompawil so ari na amianen ed dalin to ya awit toy dakerakel a kaykayarian, tan say puso to et onsumpa ed masanton sipanan. Sikatoy ontalona tan ompawil ed dalin to.
29 “Diad aturon panaon et sikatoy ompawil tan onlusob ed abalaten. Balet aliwa lan singa dati so pansumpalan,
30 ta onlusob ed sikato iray barko na Kitim+ tan sikatoy niyabeba.
“Sikatoy ompawil tan idapo toy panangukom* ed masanton sipanan+ tan sikatoy ontalona; insan sikatoy ompawil tan imanoen to iramay anaynan ed masanton sipanan.
31 Tan ontalindeg iray armada* ya ompaway ed sikato; tan pabandayen day santuaryo,+ say pasen a pansasalimbengan, tan ekalen day inagew-agew a bagat.+
“Tan ilira da so makapadimlan bengatla a sengegay kadederal.+
32 “Tan diad panamegley na malamuyot a panagsalita* et itonton tod apostasya iramay manggagawa na mauges ed sipanan. Balet ombiskeg tan ontalona iray totoo a kabat day Dios da.
33 Tan saramay totoon walaay pakatalos+ et inabang dad karaklan so pakatalos. Tan natumba ra lapud espada tan apoy, naerel ira tan nasamsam iray kayarian da, diad loob na pigaran agew.
34 Balet no natumba ra, daiset a tulong so naawat da; tan dakel so mila ed sikara lapud malamuyot a panagsalita.*
35 Tan natumba so arum ed saramay walaay pakatalos, pian nagawa so panagpino lapud sikara tan nagawa so panaglinis tan panagpaputi+ ya anggad panaon na anggaan; ta nagawa ni iya diad aturon panaon.
36 “Gawaen na ari so labay to, tan iyatagey tan itandoro toy sarili to a nagkalalo ni nen say dinanman a dios; tan sikatoy mansalita na saray makapakebbiew a bengatla sumpad Dios na saray dirios.+ Tan sikatoy ontalona anggad nasumpal so panangukom; lapud say niganan nagawa et nepeg a nasumpal.
37 Ibaliwala toy Dios na atateng to, pati say pilalek na saray bibii tan say dinanman a dios, ta itandoro toy sarili to a nagkalalo ni nen say amin.
38 Balet* igloria toy dios na saray panag-amotan; igloria toy dios ya agkabat na atateng to diad panamegley na balitok tan pilak tan ankablin bato tan mararakep* a bengatla.
39 Sumpalen toy ninonot ton gawaen sumpad saray sankamaletan a salimbengan, a kaibay* sananey a dios. Igloria ton maong iramay mamibidbir ed sikato,* tan panuleyen to ra ed dakel a totoo; tan sikatoy mangapag* na dalin parad sakey a bili.
40 “Diad panaon na anggaan et mantulakan* ira, sikato tan say ari na abalaten, tan singa bagyon onsabi ed sikato so ari na amianen, a kaiba iray karwahe tan sundalon akakabayo tan dakerakel a barko; tan sikatoy onloob ed saray dalin tan mangiyagus a singa delap.
41 Sikatoy onloob met ed dalin na Dekorasyon,*+ tan natalo so dakerakel a dalin. Balet saraya so makaliktar ed lima to: say Edom, Moab, tan say manunan kabiangan na saray Ammonita.
42 Tan itultuloy ton iyunat so lima to ed saray dalin; tan agmakaliktar so Ehipto.
43 Tan uleyan to iray niyamot a kayamanan a balitok tan pilak tan amin a mararakep* a bengatla ed Ehipto. Tan ontumbok ed bakat to* iray taga Libya tan saray Etiope.
44 “Balet sikatoy napagaan ed saray balita ed bukig* tan amianen, tan sikatoy ompaway a walaay baleg a sanok pian upoten tan deralen toy dakerakel.
45 Tan ipaalagey to iray tolda ton parad ari* diad baetan na baleg a dayat tan say masanton palandey na Dekorasyon;*+ tan onsabi ed sikatoy anggaan to, tan anggapoy ontulong ed sikato.
Paimanod leksab
^ Odino “ tan magmaliw a pinagka-amotan to.”
^ Odino “ombangon.”
^ Odino “poli.”
^ Mapatnag a say ari na abalaten.
^ Mapatnag a say ari na abalaten.
^ Odino “ankabli.”
^ Odino “ananak na matatakew.”
^ Odino “Karakpan.”
^ Odino “Iyapasakey toy lupa to.”
^ Odino “tan sikatoy mipaknaan ed sikato.”
^ Odino “managganggan.”
^ Odino “makapadimla.”
^ Odino posiblin, “ya ag-iilaloan.”
^ Odino “pakana.”
^ Odino posiblin, “ya ag-iilaloan.”
^ Literal, “ed inkataba.”
^ Odino “nasasakopan a distrito.”
^ Odino “Nadelap.”
^ Odino “ipaarap toy sanok to.”
^ Literal, “taklay.”
^ Odino “panaglarog; ag-inkamatua.”
^ Odino “panaglarog; ag-inkamatua.”
^ Odino “ankabli.”
^ Odino “Balet diad pasen to et.”
^ Odino “diad tulong na.”
^ Odino posiblin, “so siopaman a bidbiren to.”
^ Odino “mangiter.”
^ Odino “manbunoan.”
^ Odino “Karakpan.”
^ Odino “ankabli.”
^ Odino “ontumbok ed sikato.”
^ Odino “bubutayan na agew.”
^ Odino “singa palasyo.”
^ Odino “Karakpan.”
