Exodo 24:1-18
24 Insan inkuan tod si Moises: “Tatdang kad palandey, sika tan si Aaron, si Nadab tan Abihu,+ tan 70 mamatatken na Israel, insan kayo ondakmomo ed si Jehova diad bandad arawi.
2 Si Moises labat so nepeg ya onasingger ed si Jehova; balet agnepeg ya onasingger so arum, tan saray totoo et agnepeg ya ontatdang a kaiba to.”+
3 Insan sinmabi si Moises tan imbaga tod totoo so amin a salita nen Jehova tan amin a ganggan,+ tan nambabansag ya inmebat so amin a totoo: “Mabulos min gawaen so amin a salitan imbaga nen Jehova.”+
4 Kanian insulat nen Moises so amin a salita nen Jehova.+ Insan sikatoy kabkabuasan a binmangon tan sikatoy angipaalagey ed leksab na palandey na sakey ya altar tan 12 lusek a mangirerepresenta ed 12 tribu na Israel.
5 Kayari na saman et imbaki to iray kalangweran ya Israelitan lalaki, tan nambagat ira na apay a popoolan tan saray kalakian a baka bilang bagat a pandurungoan+ parad si Jehova.
6 Insan inala nen Moises so kapaldua na dala tan inyan tod saray yaong, tan say kapaldua na dala et inwalsik to ed altar.
7 Insan inala nen Moises so libro na sipanan tan maksil ton imbasa ed saray totoo.+ Tan inkuan da: “Mabulos min gawaen so amin ya imbaga nen Jehova, tan magmaliw kamin matulok.”+
8 Kanian inala nen Moises so dala tan inwalsik tod saray totoo+ tan inkuan to: “Saya so dala nipaakar ed impisipanan nen Jehova ed sikayo unong ed amin na sarayan salita.”+
9 Tinmatdang si Moises tan Aaron, si Nadab tan Abihu, tan say 70 mamatatken na Israel,
10 tan anengneng da so Dios na Israel.+ Diad silong na saray sali to et walay singa datal a safiro, tan maliwawa itan a singa say tawen.+
11 Agto sinakitan iray gagalangen a lalaki ed Israel,+ tan anengneng da so pasingawey na tuan Dios, insan angan tan inminum ira.
12 Inkuan natan nen Jehova ed si Moises: “Tatdang kad palandey a kawalaan ko tan mansiansia ka ditan. Iter kod sika iray tapyas na bato ya angisulatan kod ganggan tan bilin parad kibangatan da.”+
13 Kanian namparaan si Moises tan say lingkor ton si Josue,+ tan tinmatdang si Moises ed palandey na tuan Dios.+
14 Balet inkuan tod saray mamatatken: “Alagar yo kami dia ya anggad ipawil mid sikayo.+ Kaiba yo si Aaron tan Hur.+ Nayarin onlad sikara so siopaman a walaay kaso.”+
15 Insan tinmatdang si Moises ed palandey legan ya asakbongan itan na lurem.+
16 Say gloria nen Jehova+ et nansiansia ed tapew na Palandey Sinai,+ tan anem agew ya asakbongan itan na lurem. Diad komapiton agew et tinawag toy Moises manlapud pegley na lurem.
17 Diad saray Israelita a maniimaton, say itsura na gloria nen Jehova et singa apoy a manguupot ed toktok na palandey.
18 Insan linmoob si Moises ed lurem tan tinmatdang ed palandey.+ Tan nansiansia ed palandey si Moises ed loob na 40 agew tan 40 labi.+
