Exodo 28:1-43
28 “Patawag mo manlapud saray Israelita si Aaron a kuyam, pati saray ananak to, pian sikatoy makapanlingkor ed siak bilang saserdote+—si Aaron,+ pati si Nadab tan Abihu,+ Eleazar tan Itamar,+ ya ananak nen Aaron.+
2 Igawaan moy masanto iran kawes si Aaron a kuyam, parad gloria tan karakpan to.+
3 Mitongtong kad amin a walaay dunong,* saramay pinanok na espiritu na karunongan,+ tan igawaan day kawekawes si Aaron parad kapasantos to, pian sikatoy makapanlingkor ed siak bilang saserdote.
4 “Nepeg dan gawaen irayan kawes: sakey ya apis na pagew,+ sakey ya efod,+ sakey ya andiay-taklay a latop,+ sakey ya andukey a kawes ya adesinyoan na saray kuadrado, sakey a turbante,+ tan sakey a balkes;+ gawaen da irayan masanton kawes parad si Aaron ya agim tan ed saray ananak to, pian sikatoy makapanlingkor ed siak bilang saserdote.
5 Usaren na saray marunong a komikimey so balitok, asul a tinebey, kolor-ube ya abel,* ambalbalangan tinebey, tan marakep a klase na linen a tinebey.
6 “Manggawa ra na efod a gawad balitok, asul a tinebey, kolor-ube ya abel, ambalbalangan tinebey, tan marakep a nilagan tinebey a linen, tan nepeg ya aburdaan itan.+
7 Nepeg a walaan itan na duaran pinagka-takeb ya impansaip diad tagey.
8 Say nilagan balkes,+ ya akapeket ed efod pian nitaker tan agnaekal, et nepeg a gawad parehon materyales: balitok, asul a tinebey, kolor-ube ya abel, ambalbalangan tinebey, tan marakep a nilagan tinebey a linen.
9 “Mangala kay duaran baton onix+ tan iyukit mod saratan iray kangaranan na saray ananak nen Israel,+
10 anemiran ngaran ed sakey a bato tan say nakekeraan ya anemiran ngaran ed samay sakey a bato, unong ed inkiyanak da.
11 Nepeg ya iyukit na manag-ukit na bato iray kangaranan na ananak nen Israel diad duaran bato a singa pangiyukit to na tatak.+ Insan paitapew mo iratan ed saray balitok a panangipeketan.
12 Itapew mo so duaran bato ed saray pinagka-takeb na efod bilang pakanodnonotan iran bato parad ananak nen Israel,+ tan awiten nen Aaron diad arapan nen Jehova iray kangaranan da diad duaran melag ya abel a walad tapew na saray takeb to bilang pakanodnonotan.
13 Manggawa ka na saray balitok a panangipeketan
14 tan duaran singa nilagan lubir a kadena a gawad puron balitok,+ tan isuldong mo iray singa lubir a kadena ed saray panangipeketan.+
15 “Pagawam ed sakey a managburda so apis na pagew a parad panangukom.+ Gawaen itan a singa say efod, gawad balitok, asul a tinebey, kolor-ube ya abel, ambalbalangan tinebey, tan marakep a nilagan tinebey a linen.+
16 Nepeg a kuadrado itan sano itupi, a sankarangan* so karukey to tan sankarangan so kalapar to.
17 Mangipeket ka ditan na apatiran dasig na saray bato. Diad unonan dasig et rubi, topacio, tan esmeralda.
18 Diad komaduan dasig et turkesa, safiro, tan jaspe.
19 Diad komatlon dasig et baton lesem,* agata, tan amatista.
20 Diad komapat a dasig et crisolito, onix, tan jade. Nepeg ya itapew iratan ed saray balitok a panangipeketan.
21 Saray bato et mipetekan ed 12 kangaranan na saray ananak nen Israel. Niyukit so kada ngaran a singa tatak, a mangirepresenta ed kada sakey ed 12 tribu.
22 “Manggawa kay nilagan kadena ed tapew na apis na pagew, a singa iratan lubir a gawad puron balitok.+
23 Manggawa kay duaran balitok a singsing parad apis na pagew tan ipeket mo so duaran singsing diad duaran suyok na apis na pagew.
24 Isurob mo so duaran lubir a balitok diad duaran singsing a walad saray suyok na apis na pagew.
25 Isurob mo so duaran sampot na duaran lubir ed duaran panangipeketan, tan itapew mo iratan ed saray pinagka-takeb na efod, diad bandad arap.
26 Manggawa kay duaran balitok a singsing tan iyan mo iratan ed duaran sampot diad dalem a gilig na apis na pagew, ya akaarap iratan ed efod.+
27 Manggawa ka ni na duaran balitok a singsing diad arap na efod, diad leksab na saray pinagka-takeb na efod, diad abay na nansuldongan, diad tagey na nilagan balkes na efod.+
28 Say apis na pagew so nepeg ya eletan diad pangisinger ed saray singsing na asul a lubir tan saray singsing na efod. Pansiansiaen na saya so apis na pagew diad tapew na efod, diad tagey na nilagan balkes.
29 “Awiten nen Aaron iray kangaranan na saray ananak nen Israel diad apis na pagew a parad panangukom diad petek na puso to sano sikatoy onloob ed Masanto bilang pakanodnonotan lawas diad arapan nen Jehova.
30 Iyan mo so Urim tan say Tumim*+ ed loob na apis na pagew a parad panangukom, tan saratan et nepeg a walad petek na puso nen Aaron sano sikatoy onloob diad arapan nen Jehova, tan naynay ya awiten nen Aaron ed arapan nen Jehova irayan kagawaan parad panangukom ed saray Israelita diad petek na puso to.
31 “Say interon andiay-taklay a latop a walad dalem na efod et nepeg mon gawaen ed asul a tinebey.+
32 Walay pangilabotan na ulo ed pegley na satan. Nepeg a lagaen na sakey a managlaga na abel so interon paliber na satan a pangilabotan. Mipara itan ed pangilabotan a walad samben na pagew pian ag-itan napilat.
33 Diad paliber na saloy et igawaan mo itan na saray singa prutas a granada a gawad asul a tinebey, kolor-ube ya abel, tan ambalbalangan tinebey, pati saray balitok a kampanilya ed nanleleetan na saratan.
34 Pansalet-salet mo so balitok a kampanilya tan say singa prutas a granada, sakey a balitok a kampanilya tan sakey a prutas a granada, diad interon saloy na andiay-taklay a latop.
35 Nepeg ya isulong itan nen Aaron pian sikatoy makapanlingkor, tan nepeg a narengel so tanol na satan sano sikatoy onloob ed santuaryo diad arapan nen Jehova tan sano sikatoy ompaway, pian sikatoy ag-ompatey.+
36 “Manggawa kay masileng a metal a gawad puron balitok tan iyukit mod satan so: ‘Masanto si Jehova,’+ a singa pangiyukit na tatak.
37 Isinger mo itan ed turbante+ ed panamegley na asul a lubir; nepeg a mansiansia itan ed arap na turbante.
38 Nepeg a wala itan ed moling nen Aaron, tan ebatan nen Aaron so kasalanan na sakey ed saray masanton bengatla,+ a papasantosen na saray Israelita sano iyapay da iratan bilang masanton bengatla. Nepeg a mansiansia itan ed moling to, pian nagamoran day panangabobon nen Jehova.
39 “Manggawa kay andukey a kawes ya adesinyoan na saray kuadrado a gawad marakep a klase na linen a tinebey, manggawa kay turbante a gawad marakep a klase na linen a tinebey, tan manggawa kay nilagan balkes.+
40 “Manggawa ka met na saray andukey a kawes, balkes, tan sakbong na ulo parad saray ananak nen Aaron,+ parad gloria tan karakpan da.+
41 Kawesan moy Aaron ya agim pati saray ananak to, tan lanaan mo ra+ tan ikdan mo ray autoridad*+ tan pasantos mo ra, tan manlingkor ira ed siak bilang saserdote.
42 Igawaan mo ra met na saray linen a karsonsilyo* pian nasakbongan iray pribadon parte na laman da.+ Nepeg a manlapud balangbang ya anggad ulpo iratan.
43 Nepeg ya isulong iratan nen Aaron tan saray ananak to sano onloob ira ed tolda a pantitiponan odino sano onasingger ira ed altar a manlingkor ed masanton pasen, pian ag-ira mankasalanan tan ompatey. Permanente iyan ganggan parad sikato tan saray ilalak* to ya onsublay ed sikato.
Paimanod leksab
^ Literal, “marunong a puso.”
^ Odino “kolor-ube ya abel a gawad bagoy karnero.”
^ Manga 22.2 sentimetro (8.75 pulgada). Nengnengen so Apendise B14.
^ Sakey ya agkabat a mablin bato, a posiblin manutukoy ed baton amber, hyacinth, opal, odino tourmaline.
^ Literal, “tan panom iray lima ra.”
^ Odino “lalatopan a kawes.”
^ Literal, “bini.”
