Exodo 36:1-38
36 “Kaiba nen Bezalel a mankimey si Oholiab tan kada marunong a laki* ya inikdan nen Jehova na karunongan tan pakatalos pian amta ran gawaen so amin a kimey nipaakar ed masanton panaglingkor unong ed ingganggan nen Jehova.”+
2 Insan tinawag nen Moises si Bezalel tan Oholiab tan kada marunong a laki a say puso to et inikdan nen Jehova na karunongan,+ balang sakey a pinakiwas na puso to a manboluntaryon mankimey.+
3 Insan inala rad si Moises so amin a kontribusyon+ ya inyakar na saray Israelita parad kimey nipaakar ed masanton panaglingkor. Balet kinabuasan a nantultuloy iran angiyakar ed sikato na saray boluntaryon apay.
4 Kayari ran ginapoan so masanton kimey et nantutumbokan a sinmabi so amin a marunong a komikimey,
5 tan ibabaga rad si Moises: “Masulok lay iyaakar na saray totoo nen say nakaukolan ed kimey ya ipapagawa nen Jehova.”
6 Kanian oniay impaipakabat nen Moises ed interon kampo: “Lalaki tan bibii, agkayo la mangiyaakar na antokaman parad masanton kontribusyon.” Diad saman et apatunda iray totoo a mangiyakar ni na antokaman.
7 Magenap la iray usaren parad amin a kimey a gawaen, tan sobsobra ni.
8 Kanian impaalagey na amin a marunong a komikimey+ so tabernakulo+ a walaay samploran abel na tolda a gawad marakep a nilagan tinebey a linen, asul a tinebey, kolor-ube ya abel,* ambalbalangan tinebey; ginawa to* iratan a walaan na saray imburdan kerubin.+
9 Kada abel na tolda et 28 kasiko* ed karukey tan 4 kasiko ed kalapar. Nampaparay kabaleg na amin ya abel na tolda.
10 Insan impansasaip to so limara ed saray abel na tolda, tan impansasaip to imay arum nin limaran abel na tolda.
11 Kayari na satan et sikatoy nanggawa na saray pangikawitan a gawad asul a tinebey diad gilig na samay sakey ya abel na tolda a pangisaipan ed satan. Ontan met so ginawa to ed gilig na sankasampotan ya abel na tolda a mipetekan ed pasen a pangisaipan ed satan.
12 Sikatoy nanggawa na 50 pangikawitan ed samay sakey ya abel na tolda tan 50 pangikawitan ed gilig na samay sananey ya abel na tolda ed pasen a pangisaipan ed satan pian manpepetekan iray pangikawitan.
13 Tan sikatoy nanggawa na 50 balitok iran panagkawit tan impansasaip to iray abel na tolda ed panamegley na saray panagkawit, kanian atuop so sakey a tabernakulo.
14 Insan sikatoy nanggawa na saray abel na tolda a gawad bagoy kanding parad tolda ya akatapew ed tabernakulo. Labinsakey ya abel na tolda so ginawa to.+
15 Kada abel na tolda et 30 kasiko ed karukey tan 4 kasiko ed kalapar. Nampaparay kabaleg na saray 11 ya abel na tolda.
16 Impansasaip to so limaran abel na tolda, tan impansasaip to met imay anemiran abel na tolda.
17 Insan sikatoy nanggawa na 50 pangikawitan ed gilig na sankasampotan ya abel na tolda ya angisaipan ed satan, tan sikatoy nanggawa na 50 pangikawitan ed gilig na samay sakey ya abel na tolda ya angisaipan ed satan.
18 Tan sikatoy nanggawa na 50 panagkawit a gansa pian pansaipen so tolda tan magmaliw itan a saksakey.
19 Sikatoy nanggawa na sakbong na tolda a gawad katat na kalakian a karnero a kinoloran na ambalanga tan sakbong a gawad katat na poka* ya itapew ed satan.+
20 Insan sikatoy nanggawa na saray hamba na tabernakulo, a saratan et gawad kiew na acacia+ tan maptek ya akaalagey.+
21 Kada hamba et samploran kasiko ed katagey tan sakey tan kapalduan kasiko ed kalapar.
22 Kada hamba et walaay duaran kagor* a nanabay. Ontan so impanggawa to ed amin a hamba na tabernakulo.
23 Kanian ginawa to iray 20 hamba parad bandad abalaten a diking na tabernakulo.
24 Insan sikatoy nanggawa na 40 pilak a patoonan ed silong na 20 hamba, duaran patoonan ed silong na sakey a hamba parad duaran kagor na satan tan duaran patoonan ed silong na kada ontumbok a hamba parad duaran kagor na satan.+
25 Sikatoy nanggawa na 20 hamba parad samay sakey a diking na tabernakulo, samay walad bandad amianen
26 tan say 40 pilak a patoonan na saratan, duaran patoonan ed silong na sakey a hamba tan duaran patoonan ed silong na kada sakey ed saray arum a hamba.
27 Sikatoy nanggawa na anemiran hamba parad beneg a parte na tabernakulo diad bandad sagur.+
28 Sikatoy nanggawa na duaran hamba bilang pinagkaposte ed suyok na tabernakulo diad duaran suyok ed beneg.
29 Saray poste et doble manlapud leksab ya anggad tagey, anggad unonan kondiling. Ontan so ginawa to ed duaran poste ed saray suyok.
30 Kanian ami-amin et waloran hamba a kaiba iray 16 a pilak a patoonan ed saratan, duaran patoonan ed silong na kada sakey a hamba.
31 Insan sikatoy nanggawa na saray baras a gawad kiew na acacia, limaran baras parad saray hamba ed sakey a diking na tabernakulo+
32 tan limaran baras parad saray hamba ed samay sakey a diking na tabernakulo tan limara parad saray hamba na tabernakulo diad beneg a parte a walad bandad sagur.
33 Say baras ed pegley et impabenlag tod pegley na saray hamba manlapud sampot ya anggad sampot.
34 Binalkot to na balitok iray hamba, tan ginawa to iray balitok a kondiling a pangisuroban ed saray baras, tan binalkot to na balitok iray baras.+
35 Insan sikatoy nanggawa na kurtina+ a gawad asul a tinebey, kolor-ube ya abel, ambalbalangan tinebey, tan marakep a nilagan tinebey a linen. Ginawa to itan a walaan na saray imburdan kerubin.+
36 Insan inggawaan to itan na apatiran lusek a gawad acacia tan binalkot to iratan na balitok, pati saray balitok a kawit, tan inggawaan to iratan na apatiran pilak a patoonan.
37 Insan sikatoy nanggawa na sanib* a parad lolooban na tolda a gawad asul a tinebey, kolor-ube ya abel, ambalbalangan tinebey, tan marakep a nilagan tinebey a linen,+
38 ontan met ed limaran lusek na satan tan saray kawit na saratan. Binalkot to na balitok iray tapew tan saray pangisuldongan* ed saratan, balet say limaran patoonan na saratan et gansa.
Paimanod leksab
^ Literal, “kada lakin marunong ed puso.”
^ Odino “kolor-ube ya abel a gawad bagoy karnero.”
^ Mapatnag a manutukoy ed si Bezalel.
^ Say sakey a kasiko et 44.5 sentimetro (17.5 pulgada). Nengnengen so Apendise B14.
^ Say Hebreon salita a tahash et nayarin sakey ya ayep ed dayat a tatawagen ed Ingles a seal. Singa iya kabaleg na dolphin.
^ Odino “akaalagey a poste.”
^ Odino “kurtina.”
^ Odino “saray kondiling; saray kawit; saray taker” parad pangisuldong.
