Ezequiel 5:1-17
5 “No nipaakar ed sika, anak na too, mangala kay makdem ya espada ya usaren mon singa labahas na barbero. Kiskisan moy ulom tan ahit moy balbas mo, insan mo simbangen tan apag-apagen so buek.
2 Poolan mod loob na syudad so kakatlo sano nasumpal iray agew na pansakop.+ Insan alam so sananey a kakatlo tan kabilen mo itan ed panamegley na espada diad kaliberliber na syudad,*+ tan say unor a kakatlo et isibwag mod dagem, tan manguyos ak na sakey ya espada a mangusil ed saratan.+
3 “Mangala kay daiset a buek tan balkot mod saray tupi* na kawes mo.
4 Tan mangala ka ni arum ed saratan tan ibuntok mod apoy pian napoolan iratan. Manlapud saya et onkayat so apoy ed interon sankaabungan na Israel.+
5 “Oniay inkuan na Soberanon Katawan a Jehova: ‘Saya so Jerusalem. Sikatoy impasen kod pegley na saray nasyon, a sikatoy apaliberan na saray dalin.
6 Balet sikatoy nanrebelde ed saray ganggan tan totontonen ko, a kinmiwas a mas mauges ni nen saray nasyon tan saray dalin ya akapaliber ed sikato.+ Ta impulisay da iray ganggan ko, tan ag-ira nankurang ed saray totontonen ko.’
7 “Kanian oniay inkuan na Soberanon Katawan a Jehova: ‘Lapud mas magulo kayo nen saray nasyon ya akapaliber ed sikayo tan agyo tinumbok iray totontonen ko odino sinumpal iray ganggan ko, noagta tinulok yo iray ganggan na saray nasyon ya akapaliber ed sikayo,+
8 oniay inkuan na Soberanon Katawan a Jehova: “Sumpaen ta ka, O syudad,+ tan siak a mismo so mangukom ed pegley mo diad pakanengneng na saray nasyon.+
9 Gawaen kod sika so bengatlan agko nin balot ginawa nensaman, tan agko la gawaen so singa ontan, lapud amin a makapadimlan kagagawam.+
10 “‘“Kanian saray kaamaan ed limog mo et kanen da iray anak da,+ tan kanen na saray anak iray ama ra, tan dusaen ta ka tan itayak ko so amin ya akeraan ed sika diad nanduruman direksion.”’*+
11 “‘Kanian unong a mabilay ak,’ so imbaga na Soberanon Katawan a Jehova, ‘lapud say santuaryok so dinutakan mo na saray amin a makapadimlan idolom tan amin a makapadimlan kagagawam,+ ipulisay* ta ka met; agta ka kasian, tan agko ipatnag ed sika so panangabagey.+
12 Kakatlo ed sika so ompatey ed salot* odino eras. Say sananey a kakatlo et ompatey ed espada diad kaliberliber mo.+ Tan say unor a kakatlo et itayak ko diad nanduruman direksion,* tan manguyos ak na espada a mangusil ed sikara.+
13 Insan mangangga lay pasnok ko tan onkepa so sanok kod sikara, tan napenek ak.+ Tan sano nipatnag ko lay sanok kod sikara, naamtaan da a siak, si Jehova, so nansalita lapud kakaukolanen kon siak labat so dayewen da.+
14 “‘Pagmaliwen ta kan aderal a pasen tan puntirya na panamabanday ed limog na saray akapaliber a nasyon tan ed pakanengneng na amin ya ondadalan.+
15 Magmaliw kan puntirya na panamabanday tan panagbalaw,+ sakey a panmadmaran tan sakey a pakataktakotan na saray nasyon ya akapaliber ed sika, sano ukomen ta ka ed pasnok, sanok, tan graben pananusa. Siak, si Jehova, so nansalita.
16 “‘Ibakik ed sikara so makapatey iran pana na eras pian deralen ira. Saray pana ya ibakik et maneral ed sikayo.+ Palooren koy eras ed sikayo diad pamaandik ed suplay yon kakanen.*+
17 Ibakik ed sikayo so eras tan saray masesebeg ya atap ya ayep,+ tan naandian kayoy ananak lapud saratan. Onkapuy so liknaan yo lapud salot tan panamaagus na dala, tan iyakar kod sikayo so espada.+ Siak, si Jehova, so nansalita.’”
Paimanod leksab
^ Literal, “to.”
^ Odino “saray saloy.”
^ Literal, “diad kada dagem.”
^ Odino “paraiseten.”
^ Odino “sakit.”
^ Literal, “diad kada dagem.”
^ Literal, “pamuter ko ed saray baston parad tinapay yo.” Posiblin manutukoy ed saray baston a pangisasabitan na tinapay.
