Genesis 49:1-33
49 Tan tinawag nen Jacob iray ananak to tan inkuan to: “Mantitipon kayo pian nibagak ed sikayo no antoy nagawa ed sikayo diad kaunoran iran agew.
2 Mantitipon kayo tan dengel kayo, sikayo ran ananak nen Jacob, on, dengel kayo ed si Israel ya ama yo.
3 “Ruben,+ sika so panguloan ko,+ say kasil ko tan gapoan na pakayarik a manilalak, say manuna ed kagalangan tan manuna ed biskeg.
4 Diad ag-inkamaalwar a singa madaluyon iran danum, agka magmaliw a manuna, lapud sinmapat kad dukolan nen amam.+ Diad saman et dinutakan* mo so dukolan ko. Tua a sikatoy sinmapat ditan!
5 “Si Simeon tan Levi et sanagi.+ Uusaren day armas da pian manggaway inkaruksa.+
6 O kamarerwak,* agka miuulop ed sikara. O kagalangan* ko, agka mibibiang ed pantitipon da, ta diad pasnok da et amatey iray totoo,+ tan panliketan dan lupoyen iray kalakian a baka.
7 Naayew komon so pasnok da, ta maruksa itan, tan say sanok da, ta masebeg itan.+ Itaytayak ko ra ed Jacob, tan itaytayak ko ra ed Israel.+
8 “Balet sika, Juda,+ irayew ka na saray agagim.+ Nitapew so limam ed beklew na saray kalaban mo.+ Ondakmomo ed arapan mo iray ananak nen amam.+
9 Si Juda et sakey a kilaw a leon.+ Ontatdang ka, ana’ko, manlapud ayep a narel mo. Sikatoy dinmukol tan naninat-inat a singa leon, tan singa sakey a leon, siopay makpel a mamangon ed sikato?
10 Say setro et ag-ontaynan ed si Juda,+ ontan met ed say baston na manuley manlapud nanleetan na saray sali to, anggad isabi na Silo,*+ tan ontulok ed sikato iray totoo.+
11 Isinger toy asno to ed sakey a sengeg na ubas tan say kilaw na asno to diad maabig a sengeg na ubas, tan ipesak toy kawes to ed alak tan ed tabol na saray ubas.
12 Ambalbalanga iray mata to lapud alak, tan amputi iray ngipen to lapud gatas.
13 “Si Zebulon+ et manayam ed gilig na dayat, diad gilig na dayat a dadaongan na saray barko,+ tan say ketegan to et paarap ed Sidon.+
14 “Si Isacar+ et sakey ya asno a mabiskeg iray pukel to, ya ondudukol a walay duaran sakon akatapew ed beneg to.
15 Tan nanengneng to a maabig so pasen a panagpainawaan tan marakep so dalin. Ileksab toy takeb to pian sakbaten toy aawiten to tan sikatoy manpaaripen.
16 “Si Dan+ so mangukom ed saray totoo to bilang sakey ed saray tribu na Israel.+
17 Si Dan et magmaliw a singa serpiente diad gilig na dalan, sakey a maditan uleg diad gilig na basbas, a mangetket ed saray mukor na kabayo pian napelag imay akakabayo.+
18 Alagaren koy panangilaban mo, O Jehova.
19 “Nipaakar ed si Gad,+ sikatoy atakien na sakey a grupo na saray tulisan, balet atakien to ra ed saray mukor da.+
20 “Magmaliw a dakdakel* so tinapay* nen Aser,+ tan sikatoy mangitarya na naakan a manepeg ed sakey ya ari.+
21 “Si Neftali+ et sakey a malikliksi a kabatyan ya ulsa. Sikatoy mangibabalikas na mararakep a salita.+
22 “Si Jose+ so simit na sakey a mabungan kiew, sakey a mabungan kiew ed abay na subol, ya onnanatnat iray sanga to anggad tagey na padir.
23 Balet sikatoy aatakien na saray managpana tan sikatoy pinana ra tan sikatoy bubusolen da.+
24 Ingen ta agnagiing so pana to,+ tan nansiansian mabiskeg tan makilas iray lima to.+ Nanlapu iya ed lima na makapanyarin Dios nen Jacob, manlapud samay pastol, say bato na Israel.
25 Sikatoy* nanlapud Dios nen amam, tan say Dios so ontulong ed sika; tan sikatoy kaiba na Makapanyarin-amin, tan iter tod sika iray bendisyon a manlapud katawenan tan manlapud kaaralman,+ tan ikdan to kay amayamay ya ananak tan kokomponien iran ayep.
26 Saray bendisyon nen amam et atagtagey nen saray bendisyon na andi-anggaan a kapalandeyan, tan saray mablin bengatla na agmangangga iran pukdol.+ Mansiansia iratan ed tapew na ulo nen Jose, diad toktok na ulo na samay sakey a pinili ed saray agagi to.+
27 “Si Benjamin+ et singa sakey a lobo a mamibingkas.+ Diad kabuasan et kanen to so narel to, tan diad labi et apagen toy samsam.”+
28 Sarayan amin so 12 tribu nen Israel, tan saya so imbagad sikara nen ama ra sanen bebendisyonan to ra. Balang sakey ed sikara et inikdan toy matukoy a bendisyon.+
29 Kayari na satan et binilin to ra: “Nitipon ak ed saray totook.*+ Iponpon yo ak ed kawalaan na saray amak diad ungib a walad uma nen Efron a Heteo,+
30 diad ungib a walad uma na Macpela diad arap na Mamre ed dalin na Canaan, samay uma a sinaliw nen Abraham ed si Efron a Heteo bilang dalin a ponponan.
31 Ditan da imponpon si Abraham tan si Sara ya asawa to.+ Ditan da imponpon si Isaac+ tan si Rebeca ya asawa to, tan ditan ko imponpon si Lea.
32 Say uma tan say ungib a wadtan et sinaliw ed saray ananak nen Het.”+
33 Diad saman et asumpal si Jacob ya amilin ed saray ananak to. Insan sikatoy pinmawil a dinmukol tan nauyos so linawa to tan nitipon la ed saray totoo to.*+
Paimanod leksab
^ Odino “pinabanday.”
^ Odino posiblin, “awawey.”
^ Kabaliksan toy “Sikato ya Akanggawa ed Satan; Sikato a Makankanepegan ed Satan.”
^ Literal, “mataba.”
^ Odino “naakan.”
^ Salanti, si Jose.
^ Sakey iyan maanlong a balikas parad ipapatey.
^ Sakey iyan maanlong a balikas parad ipapatey.
