Ed si Hebreo 8:1-13
8 Nia so manunan punto na saray ibabaga mi: Walaan itayo na ontan ya atagey a saserdote,+ tan sikatoy yinmurong ed nikawanan na trono na Sankatagyan diad katawenan,+
2 sakey a lingkor* diad masanton pasen*+ tan diad tuan tabernakulo, a si Jehova* so angipaalagey, aliwan say too.
3 Ta balang atagey a saserdote et tinuro a mangiyapay na saray regalo tan bagat; kanian sikato et wala met so kaukolan ton ibagat.+
4 No sikatoy wadiad dalin, sikatoy agmagmaliw a saserdote,+ ta wala la ray totoon mangiyaapay na saray regalo unong ed Ganggan.
5 Sarayan totoo et manggagawa na sagradon panaglingkor a mangililitrato tan mangiyaanino+ ed saray bengatlan walad tawen;+ a singa samay ingganggan na Dios ed si Moises, sanen ipaalagey to la so tabernakulo: Ta inkuan To: “Seguroen mon gawaen so amin a bengatla unong ed samay pangaligan a nipanengneng ed sika diad palandey.”+
6 Balet natan et walaan si Jesus na mas alay abig a panaglingkor,* lapud sikato met so manamegley+ ed mas maabig a sipanan,+ a legal a niletneg ed mas maabig iran sipan.+
7 No anggapoy kakulangan na samay inmunan sipanan, agla komon nakaukolan so komadua.+
8 Ta nanenengneng to so kakulangan na totoo sanen inkuan to: “‘Onsabi agew,’ so imbaga nen Jehova,* ‘a misipanan ak ed sankaabungan na Israel tan ed sankaabungan na Juda na sakey a balon sipanan.
9 Aliwa itan a singa samay impisipanan kod inmuunan atateng da diad samay agew ya intabin ko ran papaway ed dalin na Ehipto,+ lapud ag-ira nansiansia ed impisipanan ko, kanian pinaulyanan ko la ra,’ so imbaga nen Jehova.*
10 “‘Ta saya so sipanan a pisipanan kod sankaabungan na Israel kayari na satan a panaon,’ so imbaga nen Jehova.* ‘Iyan ko ray ganggan ko ed kanonotan da, tan isulat ko iratan ed kapusoan da.+ Tan magmaliw ak a Dios da, tan magmaliw iran totook.+
11 “‘Tan agla ibangat na balang sakey so kabaleyan to tan say agi to, ya ibaga to: “Kabaten mo si Jehova!”* Ta kabat da ak lan amin, manlapud sankaabebaan ya anggad sankatageyan ed sikara.
12 Ta perdonaen ko ra ed saray agmatunong a gawa ra, tan agko lan balot nonoten iray kasalanan da.’”+
13 Sanen imbaga ton “sakey a balon sipanan,” ginawa to lan anggapoy kana imay inmuna.+ Natan, samay anggapoy kana tan ondadaan la et magano lan naandi.+
Paimanod leksab
^ Odino “lingkor ed publiko.”
^ Saya et manutukoy ed “Sankasantosan.”
^ Nengnengen so Apendise A5.
^ Odino “panaglingkor ed publiko.”
^ Nengnengen so Apendise A5.
^ Nengnengen so Apendise A5.
^ Nengnengen so Apendise A5.
^ Nengnengen so Apendise A5.
