Isaias 13:1-22
13 Say mensahe sumpad Babilonia+ ya anengneng nen Isaias+ ya anak nen Amoz ed sakey a pasingawey:
2 “Mangitagey kayoy sakey a tanda*+ diad palandey ya anggapoy kakiewan.
Tawag yo ra, kaweyan yo ra,Pian onloob ira ed saray puerta na saray gagalangen a totoo.
3 Angiter ak na ganggan ed saramay pinilik.*+
Tinawag ko iray sundalok pian ipatnag day sanok ko,Tan mapangta iran manliliket.
4 Dengel yo! Walay grupo na totoo diad kapalandeyan;Singa ungol na dakerakel a totoo!
Dengel yo! Say ungol na saray panarian,Saray nantitipon a nasyon!+
Si Jehova na saray armada so mangipaparaan ed sayan armada a miguerra.+
5 Onsabi ra manlapud arawin dalin,+Manlapud sampot na katawenan,Si Jehova tan saray armas ya usaren tod sanok to,Pian deralen day interon dalin.+
6 Manugaog kayo, ta say agew nen Jehova et asingger la!Onsabi itan bilang kadederal a manlapud Makapanyarin-amin.+
7 Kanian onlaylay so amin a lima,Tan natunaw ed takot so puso na kada too.+
8 Nataranta iray totoo.+
Manpairap ira tan nalikna ray sakit,A singa sakey a biin manaanak.
Mannenengnengan ira lapud takot,Manpabalanga iray kalupaan da lapud ermen.
9 Onsabi so agew nen Jehova,Makapagonigon itan lapud pasnok tan mandarlang a sanok to,Pian gawaen ton makapataktakot so kipapasen na dalin,+Tan upoten to iray makasalanan ditan.
10 Ta saray bitewen ed katawenan tan saray konstelasyon a wadtan*+Et agmangisindag na liwawa;Say agew et ombilunget sano ombutay,Tan say bulan et agmangisinag na liwawa.
11 Mikuentaan ak ed saray manaayam ed dalin lapud kaugsan a ginawa ra,+Tan saray mauges lapud kasalanan da.
Patundaen ko so pampapasirayew na saray mapaatagey,Tan iyabebak so panlalastog na saray maruksan manuley.+
12 Pagmaliwen kon mas matalag nen say puron balitok so too,+Tan pagmaliwen kon mas matalag nen say balitok na Ofir iray totoo.+
13 Kanian yakayaken ko so tawen,Tan nayegyeg so dalin ed kawalaan to+Lapud pasnok nen Jehova na saray armada diad agew na mandarlang a sanok to.
14 Singa ulsa ya eerelen tan singa pulok ya anggapoy manipon ed sikara,Kada sakey et ompawil ed dilin kabaleyan to;Kada sakey et ombatik ed dilin dalin to.+
15 Siopaman a naromog et naduyok,Tan siopaman a naerel et ompatey ed espada.+
16 Saray anak da et natemek ed arapan da,+Nasamsam iray karga na kaabungan da,Tan saray kaasawaan da et puersaan ya akdolan.
17 Pakiwasen ko ya onsumpad sikara iray Medo,+Saray totoon ipapasen dan andi-kakanaan so pilakTan ag-ira naliliketan ed balitok.
18 Buybuyaken na saray pana ra iray kalangweran a lalaki;+Agda abageyen so bunga na eges,Agda kasian iray ugugaw.
19 Tan say Babilonia, say sankagloriaan* ed saray panarian,+Say karakpan tan ipapasirayew na saray Caldeo,+Et magmaliw a singa Sodoma tan Gomorra sanen dineral iratan na Dios.+
20 Sikatoy aglan balot napanayaman,Tan sikatoy agla magmaliw ya ayaman diad amin a henerasyon.+
Anggapoy Arabo a manpaalagey na tolda to ditan,Tan anggapo lay mangipastol na pulok to ditan.
21 Manayam ditan iray ayep ed desierto;Napano na kulayot iray kaabungan da.
Manayam ditan iray ostrits,+Tan manlukso ditan iray atap a kanding.*
22 Mantagloong iray ayep diad saray tori to,Tan manayam iray ason jakal ed saray mararakep a palasyo to.
Magano lan onsabi so panaon to, tan agla manbayag iray agew to.”+
Paimanod leksab
^ Odino “palitek a pinagkatanda.”
^ Literal, “ed saray pinasantok.”
^ Literal, “tan saray Kesil da,” a nayarin manutukoy ed Orion tan saray akapaliber a konstelasyon.
^ Odino “say dekorasyon.”
^ Odino posiblin, “iray singa-kanding a demonyo.”
