Isaias 27:1-13
27 Diad satan ya agew et usaren nen Jehova so maruksa tan baleg tan mabiskeg ya espada to,+Pian kabilen to so Leviatan,* say uleg a makilas,Say Leviatan a mankiwel-kiwel ya uleg,Tan pateyen to iyan baleg ya uleg a manaayam ed dayat.
2 Diad satan ya agew et mangansion kayod sikato:*
“Sakey a kaubasan a mamapawalay maburan alak!+
3 Siak si Jehova, a manasalimbeng ed sikato.+
Sikatoy naynay a sasalogen ko.+
Sikatoy sasalimbengan ko ed agew tan labi,Pian anggapoy mamasakit ed sikato.+
4 Naandi lay sanok kod sikato.+
Siopay milaban ed siak a mangusar na saray masabit a kiew tan dikarika?
Gatinan ko iratan tan poolan kon maminpinsan.
5 No andi, sikatoy onla komon ed salimbengan ya intaryak.
Sikato komoy mikareenan ed siak;Pikakareenan ed siak so gawaen to komon.”
6 Diad saray onsabin agew et onlamot so Jacob,Manrosas tan onsimit so Israel,+Tan panoen day bunga so dalin.+
7 Kasin sikatoy nepeg a sakitan a singa ed paraan na impamasakit ed sikato?
Odino kasin sikatoy nepeg a pateyen a singa ed paraan na impamatey ed saray inaatey to?
8 Diad panamegley na makapakigtot ya eyag, misuppiatan kad sikato sano sikatoy pataynanen mo.
Sikatoy paekalen to diad panamegley na manlaldis a boses to a singa kakasil na dagem a manlalapud bukig.+
9 Kanian lapud saya et nasakbongan so kasalanan nen Jacob,+Tan saya so bunga sano naekal so kasalanan to:
Pagmaliwen ton singa atemek a tisaSo amin a bato na altar,Tan anggapoy nakeran sagradon poste* odino panagpoolan na insenso.+
10 Ta nataynanan so apadiran a syudad;Nataynanan iray panagpastolan tan napaulyan a singa kalawakan.+
Mankabkab tan ondukol ditan so kilaw a bakaTan upoten to iray sanga na satan a syudad.+
11 Sano namagaan iray sanga na satan,Puteren ira na saray onsabin bibii,Tan pamparlang da iratan.
Ta andiay pakatalos iray totoo ditan.+
Kanian ag-ira kasian na Dios a nanggawa ed sikara,Tan ag-ira abobonan na Dios ya amorma ed sikara.+
12 Diad satan ya agew, paspasen nen Jehova iray prutas ed aagusan na Ilog* ya anggad Kulos* na Ehipto,+ tan dokdoken to kayon sansakey, O totoo na Israel.+
13 Diad satan ya agew et paknolen so baleg a tambuyog,+ tan saramay nibantak ed dalin na Asirya+ tan saramay nitaytayak ed dalin na Ehipto+ et ondago tan ondakmomo ed si Jehova diad masanton palandey ed Jerusalem.+
Paimanod leksab
^ Mapatnag a manutukoy ed Israel ya adeskribe dia bilang sakey a bii tan niyaliling ed sakey a kaubasan.
^ Salanti, say Eufrates.
