Isaias 53:1-12
53 Siopay anisia ed balita a nanlapud sikami?*+
Tan diad siopa so angiparungtalan ed taklay nen Jehova?+
2 Sikatoy onsimit a singa sakey a sanga+ ed arapan to,* singa sakey a lamot ed amagaan a dalin.
Aliwan marakep so talindeg to, tan anggapoy antokaman a karakpan to;+Tan sano sikatoy nanengneng mi, agkami onasingger ed sikato lapud itsura to.*
3 Sikatoy binalawbalaw tan inarawian na totoo,+Sakey a toon nigana ed* ir-irap tan kabisado toy sakisakit.
Singa niyamot ed sikami so lupa to.*
Sikatoy abalawbalaw, tan impasen min anggapoy kakanaan.+
4 On, inawit ton mismo iray sakit mi,+Tan inako to iray ir-irap mi.+
Balet sikatoy impasen min sinalot, dinusa tan pinairap na Dios.
5 Balet sikatoy dinuyok+ lapud kasalanan mi;+Sikatoy apairap lapud saray lingo mi.+
Inako to so dusa parad kareenan mi,+Tan apaabig kami lapud saray sugat to.+
6 Singa kami abalbalang a karnero,+Inmarap so kada sakey ed dilin dalan to,Tan impasakbat nen Jehova ed sikato so amin a kasalanan mi.+
7 Sikatoy minaltrato ra+ tan inmabuloy a napairap,+Balet agto biniswat so sangi to.
Sikatoy inyakar ed panagpateyan a singa sakey a kordero,+Singa sakey a karneron marendeen ed arapan na saray managkiskis na bago,Tan agto biniswat so sangi to.+
8 Lapud panameget* tan panangukom, sikatoy inala;Tan siopay manimano ed saray detalye nipaakar ed henerasyon to?*
Ta sikatoy inekal ed dalin na saray mabilay;+Sikatoy pinekpek* lapud kasalanan na totook.+
9 Tan sanen sikatoy inatey, sikatoy niponpon* diad kawalaan na saray mauges,+Tan saray mayayaman,*+Anggaman anggapoy ginawa ton mauges,*Tan anggapoy imbaga ton panamalikdo.+
10 Balet linawa nen Jehova* a sikatoy manirap, tan inyabuloy ton sikatoy nasakitan.
No iter na Dios so bilay* to bilang sakey ya apay parad impakasumlang,+Nanengneng toy ilalak* to, naparukey to iray agew to,+Tan diad panamegley to et ontalona no antoy panlabayan* nen Jehova.+
11 Lapud pakakagonigon to,* nanengneng toy maong a pansumpalan tan panliketan to itan.
Diad panamegley na pikakabat to, samay matunong, say lingkor ko,+Et iwanwan to so dakel a totoo pian nipasen iran matunong,+Tan awiten to iray kasalanan da.+
12 Kanian sikatoy ikdan koy betang a kaiba na dakerakel,Tan apagen toy samsam a kaiba iray mabibiskeg,Lapud inter toy bilay to* anggad patey+Tan impasen a sakey ed saray makasalanan;+Inawit toy kasalanan na dakel a totoo,+Tan sikatoy nagmaliw a manamegley parad saray makasalanan.+
Paimanod leksab
^ Odino posiblin, “ed nadngelan mi.”
^ Say “to” et nayarin manutukoy ed sakey a manoobserba odino ed Dios.
^ Odino “anggapoy nikadkaduman itsura to pian sikatoy pampilalekan mi.”
^ Odino posiblin, “Sikatoy singa sakey a toon aglabay a nengnengen na totoo.”
^ Odino “amta toy.”
^ Odino “pinatey.”
^ Odino “kabibilay to?”
^ Odino “panamairap.”
^ Odino “Tan walay mangiter na pangiponponan ed sikato.”
^ Literal, “sakey a toon mayaman.”
^ Odino “karuksaan.”
^ Odino “kamarerwa.”
^ Odino “linawa; maabig a panliketan.”
^ Literal, “bini.”
^ Odino “Balet nanliketan nen Jehova.”
^ Odino “pakakagonigon na kamarerwa to.”
^ Literal, “inyibung toy kamarerwa to.”
