Jeremias 46:1-28
46 Oniay inkuan nen Jehova ed si propeta Jeremias nipaakar ed saray nasyon:+
2 Parad Ehipto,+ nipaakar ed armada nen Faraon Neco+ ya ari na Ehipto, a tinalo nen Arin Nabucodonosor* na Babilonia diad abay na Ilog Eufrates ed Carkemis, diad komapat a taon nen Jehoiakim+ ya anak nen Josias, say ari na Juda:
3 “Iparaan yo ray panagsamben* tan baleg a panagsamper,Tan onla kayon milaban.
4 Sikayo ran managkabayo, iparaan yo ray kabayo tan lugan kayo.
Ompuesto kayo tan isulong yo ray hilmit yo.
Iyubol yo ray gayang tan isulong yo ray samben ed pagew.
5 ‘Akin et anengneng ko ran ataktakot?
Onaatras ira, tan abuybuyak iray sundalo ra.
Batik ira lapud ataranta ra, tan agla linmingaw iray sundalo ra.
Anggan iner et walay takot,’ so imbaga nen Jehova.
6 ‘Agmakabatik iray maples ya ombatik, tan agmakatakas iray sundalo.
Diad amianen, ed tambib na Ilog Eufrates,Apatir tan atumba ra.’+
7 Siopa iyan ontatatdang a singa Ilog Nilo,Singa saray ilog ya agmandeen so danum da?
8 Ontatdang so Ehipto a singa say Ilog Nilo,+Singa saray ilog ya agmandeen so danum da,Tan ikuan to, ‘Ontatdang ak tan sakbongan koy dalin.
Deralen ko so syudad tan saramay manaayam ditan.’
9 Tatdang kayo, sikayo ran kabayo!
Pelesan yo, sikayo ran karwahe!
Paabante yo iray sundalo,Say Cus* tan say Put, a mamebemben na panagsamper,+Tan say Ludim,+ a mamebemben tan mamipinat* na pana.+
10 “Satan ya agew et kien na Soberanon Katawan a Jehova na saray armada, say agew na ibales tod saray kalaban to. Tan mangakmon so espada tan napesel tan napenek ed dala ra, ta say Soberanon Katawan a Jehova na saray armada et manggawa na bagat* diad dalin ed amianen a walad abay na Ilog Eufrates.+
11 Tatdang kad Gilead tan mangala kay tambal a balsamo,+O birhen ya anak a bii na Ehipto.
Anggapoy kakanaan na pamaparakel mod panreremedyom,Ta anggapo lay makatambal ed sika.+
12 Nadngelan na saray nasyon so kababaingan mo,+Tan say dalin et napno na pannangis mo.
Ta napatir so sundalo lapud sananey a sundalo,Tan pareho ran natumba.”
13 Oniay inkuan nen Jehova ed si propeta Jeremias nipaakar ed isabi nen Arin Nabucodonosor* na Babilonia pian kabilen to so dalin na Ehipto:+
14 “Iyabawag yo itan ed Ehipto, iyabawag yo ed Migdol.+
Iyabawag yo itan ed Nof* tan ed Tapanes.+
Ibaga yo, ‘Ompuesto kayo tan manparaan kayo,Ta walay espada a mangakmon ed kaliberliber yo.
15 Akin et naupot iramay mabibiskeg a sundalom?
Ag-ira akatalindeg,Ta inmedmer ira nen Jehova.
16 Dakerakel so atiror tan atumtumba.
Inkuan dad balang sakey:
“Alagey kayo! Ompawil itayo ed saray kabaleyan tayo tan diad dalin a niyanakan tayoLapud maruksan espada.”’
17 Diman et inyabawag da,‘Angga labat ed lastog so Faraon ya ari na EhiptoTa pinalampas toy pankanawnawa.’*+
18 ‘Unong a mabilay ak,’ so imbaga na Ari, a say ngaran to et Jehova na saray armada,‘Sikatoy* onsabi a singa say Tabor+ ed saray kapalandeyanTan singa say Carmel+ a walad abay na dayat.
19 Manbalkot ka la ta nibantak kad arum a dalin,O anak a biin manaayam ed Ehipto.
Ta say Nof* et magmaliw a bengatlan pakataktakotan;Napoolan itan* tan agla napanayaman.+
20 Say Ehipto et singa malimlimgas a baka,Balet sikatoy ambungalan na saray mangetket ya apangat a manlapud amianen.
21 Anggan saray inupaan ton sundalo to et singa ra pinataban baka,Balet inmatras met ira tan batik iran amin.
Ag-ira akatalindeg,+Ta sinmabi ed sikara so mismon agew na kadederal da,Say panaon na pikuentaan ed sikara.’
22 ‘Say tanol to et singa samay uleg a mankikiwel-kiwel,Ta sikatoy usilan na saray mabiskeg a kalaban ya akaawit na wasay,A singa saramay manbabatang na kiew.*
23 Batangen da iray kiew ed katakelan to,’ so imbaga nen Jehova, ‘anggano singa ag-itan nalooban.
Ta mas dakdakel ira nen saray duron, tan ag-ira nabilang.
24 Nabaingan so anak a bii na Ehipto.
Sikatoy niyawat ed saray totoo ed amianen.’+
25 “Oniay inkuan nen Jehova na saray armada, say Dios na Israel: ‘Ipaarap ko natan so imanok ed si Amon+ ed syudad na No,*+ ed Faraon, Ehipto, saray dirios to,+ tan saray arari to—on, ed Faraon tan amin a manmamatalek ed sikato.’+
26 “‘Tan iyawat ko rad saramay malabay a mamatey ed sikara,* ed si Arin Nabucodonosor* na Babilonia+ tan saray lingkor to. Balet kayari na satan et sikatoy panayaman lamet a singa nensaman,’ so imbaga nen Jehova.+
27 ‘Tan sika, O lingkor kon Jacob, agka ontatakot,Tan agka natatakot, O Israel.+
Ta iliktar ta ka manlapud arawiTan say ilalak mo* manlapud dalin a naaripen ira.+
Ompawil si Jacob tan magmaliw a mainawa tan anggapoy manggulo ed sikato,Tan anggapoy manaktakot ed sikara.+
28 Kanian agka ontatakot, lingkor kon Jacob,’ so imbaga nen Jehova, ‘ta wala ak ed sika.
Sigpot kon deralen so amin a nasyon ya angitayakan kod sika,+Balet agta ka sigpot a deralen.+
Dugaruga labat so disiplina* ya iter kod sika,+Ingen agko abuloyan ya agka nadusa.’”
Paimanod leksab
^ Literal, “Nabucodorosor,” sananey ya espeling.
^ Melag a panagsamper a kaslakan ya aawiten na saray managpana.
^ Odino “Etiopia.”
^ Literal, “mangigagatin.”
^ Odino “panagpatey.”
^ Literal, “Nabucodorosor,” sananey ya espeling.
^ Odino “Memphis.”
^ Literal, “aturon panaon.”
^ Salanti, say mansakop ed Ehipto.
^ Odino “Memphis.”
^ Odino posiblin, “Magmaliw itan a kalawakan.”
^ Odino “mangaalay kiew.”
^ Salanti, say Tebes.
^ Literal, “Nabucodorosor,” sananey ya espeling.
^ Odino “manaanap ed kamarerwa ra.”
^ Literal, “binim.”
^ Odino “panangipetek.”
