Job 3:1-26
3 Kayari na saya et nansalitay Job tan insamba toy agew na inkiyanak to.*+
2 Inkuan nen Job:
3 “Naandi komon imay agew na inkiyanak ko,+Tan samay labi sanen walay angibaga: ‘Inlukon so sakey a laki!’
4 Satan ya agew et magmaliw komon a bilunget.
Ag-itan komon imanoen na Dios;Ag-itan komon nasinagan na liwawa.
5 Bawien komon itan na makapal a bilunget.*
Mansiansia komon ed satan so andekereket a lurem.
Taktakoten komon itan na antokaman a mamapabilunget ed agew.
6 Satan a labi et samsamen komon na kabilungetan;+Ag-itan komon manliket a kaiba na saray agew na taon,Tan ag-itan komon nipila ed bilang na saray bulan.
7 On! Komon ta satan a labi et magmaliw ya anggapoy kana;Komon ta diad satan et anggapoy narengel a maliket a boses.
8 Komon ta isamba itan na saramay mangisasamba ed agew,Saramay sarag dan liingen so Leviatan.*+
9 Komon ta diad satan et ombilunget iray bitewen ed palbangon;Komon ta manalagar itan na liwawa na agew ya ag-onsabi,Komon ta ag-itan makanengneng na saray sinag na kabuasan.
10 Ta ag-insara na satan iray puerta na eges nen inak;+Tan impanengneng na satan ed siak so gonigon.
11 Akin et agak la inatey sanen niyanak ak?
Akin et agak la naandi sanen pinmaway ak ed eges nen inak?+
12 Akin et wala ni ray pueg ya angakwal ed siakTan saray pagew a nampasuso ed siak?
13 Ta natan et mareereen ak la komon ya akarukol;+Nanaugip tan manpapainawa ak la komon+
14 A kaiba na saray arari diad dalin tan saray mananimbawa ra,Ya angipaalagey parad sarili ra na saray pasen a geray la natan,*
15 Odino kaiba na saray prinsipe a walay kayarian dan balitok,A saray kaabungan da et napno na pilak.
16 Tan akin et agak nagmaliw a singa nakal a lukon,Singa saray ugugaw ya aglan balot akanengneng na liwawa?
17 Ditan, anggan saray mauges et agla nagogonigon;Ditan, saray naksawan et manpapainawa la.+
18 Ditan, saray priso et agla manggugulo;Agda la narerengel so boses na samay mamapasoot ed sikaran mantrabaho.
19 Ditan, saray abeba tan atagey et parepareho la ra,+Tan say aripen et bulos lad katawan to.
20 Akin a say Dios et iikdan toy liwawa imay maniirapTan iikdan toy bilay iramay nagogonigon a maong?*+
21 Akin et ag-ira ompatey anta labalabay da lay ompatey?+
Aanapen da itan nen saray akaamot a kayamanan,
22 Saramay manggagayagan maong,A malikeliket sano naromog day lubok.
23 Akin a say Dios et iikdan toy liwawa so too ya agto naromog so dalan to,Ya inalar na Dios so paliber to?+
24 Ta say kakanen ko et nasasalatan na panermen,+Tan say panugaog ko+ et singa ikakalbon danum.
25 Ta samay pakakakebbiewan ko et sinmabid siak,Tan samay tatakotan ko et agawad siak.
26 Andian ak na kaligenan, kareenan, odino painawa,Balet ta mansasbi ni so problema.”
Paimanod leksab
^ Literal, “insamba toy agew to.”
^ Odino “bilunget tan anino na patey.”
^ Ipapasen a manutukoy iya ed buwaya odino ed baleg tan mabiskeg ya ayep ed danum.
^ Odino posiblin, “ya angipaalagey parad sarili ra na saray pasen ya agla panaayaman.”
^ Odino “iramay maer-ermen a kamarerwa.”
