Job 7:1-21
7 “Agta say bilay na too diad dalin et singa paskaran a panagtrabaho,Tan agta saray agew to et singa saray agew na uupaan a trabahador?+
2 Sikatoy singa aripen a manpipirawat na sirom,Tan singa uupaan a trabahador a manaalagar na upa to.+
3 Kanian say nipabtang ed siak et saray bulan ya anggapoy gunggonaTan say inyupa ed siak et saray labi a makapagonigon.+
4 Sano akarukol ak et itetepet ko, ‘Kapigan kasi ibangon ko?’+
Balet legan ya onaaralem so labi, pigar ak lan pigar anggad palbangon.*
5 Say laman ko et napnoy bigis tan ginmagalor lan kagit;+Say baog ko et kinmekegang tan napnoy nena.+
6 Saray agew ko et mas maples ya onlalabas nen say makinan panag-abel,+Tan manampot iratan ya andiay ilalo.+
7 Nonot mo a say bilay ko et singa dagem,+Say matak et aglan balot makanengneng na maong.*
8 Samay matan onnenengneng ed siak natan et agto ak la nanengneng;Anapen ak na matam, balet anggapo ak la.+
9 Singa say lurem a nababalang tan naaandi la,Say sakey ya onlalasur ed Lubok* et agla ompawil.+
10 Sikatoy agla ompawil ed abung to,Tan nalingwanan la diad lugar to.+
11 Kanian, agko pokpokan so sangik.
Mansalita ak lapud paneermen na espirituk;Manreklamo ak lapud pinasyan pakakagonigon ko!*+
12 Sakey ak ta a dayat odino baleg ya ayep ed dayat,A kaukolan mon pabantayan?
13 Sano ibabagak, ‘Ligliwaen ak na ugipan ko;Ontulong so dukolan ko a nabawasan so ermen ko,’
14 Diad satan et kekebbiewen mo ak ed panamegley na saray kugipTan tataktakoten mo ak ed panamegley na saray pasingawey,
15 Kanian pilien ko* so naaposan,
On, say patey nen say laman ko.*+
16 Kabusol koy bilay ko;+ agko la labay so manbilay.
Paulyanan mo ak la, ta saray agew ko et singa labat ingas.+
17 Antoy kablian na sakey a too pian sikatoy nodnonoten moTan imanoen mo?*+
18 Akin et sikatoy uusisaen mo a kinabuasanTan naynay mon susuboken?+
19 Agmo ak la kasi alisay mataTan paulyanan a bukor anggan magano labat?+
20 No nankasalanan ak, panon ta kan nasakitan, sika a Manag-imaton ed katooan?+
Akin et nagmaliw a siak so puntiryam?
Nagmaliw ak kasin pabelat ed sika?
21 Akin et agmo peperdonaen so kasalanan koTan papalampasen so lingok?
Ta magano ak lan ondukol diad dabok,+Tan anapen mo ak, balet ta anggapo ak la.”
Paimanod leksab
^ Odino “anggad onliliwawa la.”
^ Odino “makanengneng na liket.”
^ Odino “diad paneermen na kamarerwak!”
^ Odino “na kamarerwak.”
^ Literal, “nen saray pukepukel ko.”
^ Literal, “iteen moy pusom ed sikato.”
