Levitico 14:1-57
14 Onia ni inkuan nen Jehova ed si Moises:
2 “Saya so ganggan nipaakar ed akating diad agew a sikatoy niyabawag a malinis, sano sikatoy iyakar ed saserdote.+
3 Ompaway ed kampo so saserdote tan sikatoy nengnengen to. No inmabig la imay akating,
4 sikatoy iganggan na saserdote a mangawit na duaran mabilay tan malinis a manok, kiew na sedro, ambalbalangan tinebey, tan tanaman a hisopo parad panlinis to.+
5 Iganggan na saserdote a samay sakey a manok et pateyen ya akasalor so bangan nankargay danum ya inalad manag-agus a danum.
6 Balet alaen to imay mabilay a manok pati say kiew na sedro, ambalbalangan tinebey, tan tanaman a hisopo, tan idelnet to iratan ed dala na samay manok a pinatey ya akasalor so bangan nankargay danum ya inalad manag-agus a danum.
7 Insan maminpito ton iwalsik itan ed samay lilinisan ed kating, tan sikatoy iyabawag ton malinis, tan ibulos tod uma imay mabilay a manok.+
8 “Samay lilinisan toy inkasikato et nepeg ton ipesak iray kawes to tan kiskisen to so amin a buek to tan manames, insan magmaliw a malinis. Kayari na satan et nayarian to lay onloob ed kampo, balet sikatoy manayam ni ed paway na tolda to diad loob na pitoran agew.
9 Diad komapiton agew, nepeg ton kalboey ulo to tan ahiten toy balbas to tan saray kirep to. Kayari ton kalboey ulo to, nepeg ton ipesak iray kawes to tan manames, tan sikatoy magmaliw a malinis.
10 “Diad komawalon agew et sikatoy mangala na duaran andiay depekton kilaw a kalakian a karnero, sakey ya andiay depekton kabatyan a kordero+ a mantaoy sakey, taloran kakaplo na sakey ya efa* na pinon arina bilang apay a kakanen ya alaokay larak,+ tan sakey sukat a log* na larak;+
11 tan say saserdoten mangiyabawag a malinis ed samay lilinisan toy inkasikato so mangiyasingger ed satan a too, kaiba iray apay, diad arapan nen Jehova diad lolooban na tolda a pantitiponan.
12 Alaen na saserdote imay sakey a kilaw a kalakian a karnero tan iyapay to itan bilang apay parad impakasumlang+ kaiba na samay sakey sukat a log na larak, tan ipayapay to itan bilang apay ya ipapayapay diad arapan nen Jehova.+
13 Insan pakgeran to imay kilaw a kalakian a karnero diad pasen a pamapakgeran ed apay parad kasalanan tan apay a popoolan,+ diad masanton pasen, lapud singa say apay parad kasalanan, say apay parad impakasumlang et kien na saserdote.+ Satan et bengatlan sankasantosan.+
14 “Insan mangala so saserdote na daiset a dala na apay parad impakasumlang, tan iyan itan na saserdote ed kawanan a layag tan tangan na kawanan a lima tan tangan na kawanan a sali na samay lilinisan.
15 Tan mangala so saserdote na daiset ed samay sakey sukat a log na larak+ tan ikalbo to ed kawigin dakulap to.
16 Insan idelnet na saserdote so gamet na kawanan a lima to diad larak a walad kawigin dakulap to tan maminpito ton iwalsik ed arapan nen Jehova so daiset a larak diad panamegley na gamet to.
17 Tan say arum ed samay akeran larak a walad dakulap na saserdote et iyan tod kawanan a layag tan ed tangan na kawanan a lima tan tangan na kawanan a sali na samay lilinisan diad tapew na samay inyan ton dala na apay parad impakasumlang.
18 Samay akeran larak ed dakulap na saserdote et iyan to ed ulo na samay lilinisan toy inkasikato, tan manggawa na pananakbong so saserdote parad sikato diad arapan nen Jehova.+
19 “Ibagat na saserdote so apay parad kasalanan+ tan manggaway pananakbong parad samay lilinisan ed agto inkamalinis, tan kayari na satan et pakgeran to so apay a popoolan.
20 Tan iyapay na saserdote ed tapew na altar so apay a popoolan tan apay a kakanen,+ tan manggawa na pananakbong so saserdote parad sikato,+ tan sikatoy magmaliw a malinis.+
21 “Balet no sikatoy mairap-bilay tan anggapoy pakasarag to, sikatoy mangala na sakey a kilaw a kalakian a karnero bilang apay parad impakasumlang, tan ipayapay itan pian makapanggawa na pananakbong parad sikato, kaibay kakaplo na sakey ya efa* na pinon arina a nilaokay larak bilang apay a kakanen, sakey sukat a log na larak,
22 tan duaran palekpek odino duaran sibong a malapati, unong ed pakasarag to. Samay sakey et onkanan apay parad kasalanan, tan samay sakey et onkanan apay a popoolan.+
23 Diad komawalon agew+ et iyakar to iratan ed saserdote diad lolooban na tolda a pantitiponan diad arapan nen Jehova pian sikatoy niyabawag a malinis.+
24 “Alaen na saserdote so kilaw a kalakian a karnero ya apay parad impakasumlang+ tan samay sakey sukat a log na larak, tan ipayapay iratan na saserdote bilang apay ya ipapayapay diad arapan nen Jehova.+
25 Insan pakgeran to so kilaw a kalakian a karnero ya apay parad impakasumlang, tan mangala so saserdote na daiset a dala na apay parad impakasumlang tan iyan tod kawanan a layag tan ed tangan na kawanan a lima tan tangan na kawanan a sali na samay lilinisan.+
26 Ikalbo na saserdote ed kawigin dakulap to so daiset a larak,+
27 insan diad panamegley na gamet na kawanan a lima to et maminpito ton iwalsik diad arapan nen Jehova so daiset a larak a walad kawigin dakulap to.
28 Tan iyan na saserdote so arum ed samay larak a walad dakulap to diad kawanan a layag tan ed tangan na kawanan a lima tan tangan na kawanan a sali na samay lilinisan diad pareho iran pasen ya anginan toy dala na apay parad impakasumlang.
29 Insan iyan na saserdote imay akeran larak a walad dakulap to diad ulo na samay lilinisan, ta pian makapanggawa na pananakbong parad sikato diad arapan nen Jehova.
30 “Iyapay to imay sakey a palekpek odino samay sakey a sibong a malapati, unong ed pakasarag to,+
31 samay nayarian to, bilang apay parad kasalanan, tan samay sakey bilang apay a popoolan+ a kaiba so apay a kakanen; tan say saserdote et manggaway pananakbong diad arapan nen Jehova parad samay lilinisan.+
32 “Saya so ganggan nipaakar ed samay awalaay sakit a kating balet anggapoy pakasarag ton mamawala na nakaukolan to pian sikatoy niyabawag a malinis.”
33 Insan inkuan nen Jehova ed si Moises tan Aaron:
34 “Sano onloob kayo ed dalin na Canaan+ ya iter kod sikayo bilang kayarian yo,+ tan abuloyan kon napeketan na sakit a kating so sakey ya abung diad dalin yo,+
35 samay makan-abung et nepeg ya onla tan ibaga tod saserdote, ‘Walay boot ed padir na abung ko. Singa sakit a kating.’
36 Paekal na saserdote so amin a walad abung antis a sikatoy onla pian nengnengen to imay pinmeket a sakit, pian agto iyabawag ya agmalinis so amin a bengatlan walad abung; tan kayari na satan et onloob so saserdote pian nengnengen toy abung.
37 Nengnengen to so apeketan a pasen, tan sano saray padir na abung et apeketan na duyawan a birdi odino balangaan iran batek, tan singa kinmutlaong iratan ed padir,
38 diad satan et ompaway ed abung so saserdote tan ikuarantina to so abung ed loob na pitoran agew.+
39 “Insan ompawil so saserdote diad komapiton agew tan nengnengen to itan. No say pinmeket a sakit et kinmayat lad saray padir na abung,
40 iganggan na saserdote ya ekalen iray baton apeketan na sakit tan ibantak iratan ed paway na syudad diad marutak a pasen.
41 Insan pakarkaran ton maong so interon loob na abung, tan samay nakal a palitada tan halo et nepeg ya ibantak ed paway na syudad diad marutak a pasen.
42 Insan salatan da na sananey iran bato iramay inekal dan bato, tan nepeg a sikatoy mangusar na sananey a halo tan papalitadaan to so abung.
43 “Balet no pinmawil imay sakit tan pinmatnag ed loob na abung kayarin inekal iray bato tan akarkaran tan apalitadaan so abung,
44 diad satan et onloob so saserdote tan nengnengen to itan. No kinmayat lay sakit diad abung, graben kating+ itan. Agmalinis so abung.
45 Pabagbag to so abung—saray bato, saray tabla, tan amin a palitada tan halo na abung—tan paipaway to iratan ed syudad diad marutak a pasen.+
46 Balet siopaman ya onloob ed abung diad dinanman ya agew ya akakuarantina itan+ et magmaliw ya agmalinis ya anggad labi;+
47 tan siopaman ya ondukol diad loob na abung et nepeg ton ipesak iray kawes to, tan siopaman a mangan diad loob na abung et nepeg ton ipesak iray kawes to.
48 “Balet no linma so saserdote tan anengneng ton agla kinmayat ed abung so pinmeket a sakit kayarin apalitadaan so abung, iyabawag na saserdote a malinis so abung, ta naandi la so pinmeket a sakit.
49 Pian nalinisan so karutakan* na abung, sikatoy mangala na duaran manok, kiew na sedro, ambalbalangan tinebey, tan tanaman a hisopo.+
50 Samay sakey a manok et pateyen to ya akasalor so bangan nankargay danum ya inalad manag-agus a danum.
51 Insan to alaen imay kiew na sedro, tanaman a hisopo, ambalbalangan tinebey, tan say mabilay a manok, tan idelnet to iratan ed samay dala na manok a pinatey tan danum ya inalad manag-agus a danum, tan maminpito ton iwalsik itan diad abung.+
52 Tan linisan to so karutakan* na abung diad panamegley na dala na manok, danum ya inalad manag-agus a danum, mabilay a manok, kiew na sedro, tanaman a hisopo, tan ambalbalangan tinebey.
53 Insan to ibulos imay mabilay a manok diad paway na syudad diad uma tan manggawa na pananakbong parad abung, tan magmaliw itan a malinis.
54 “Saya so ganggan nipaakar ed antokaman a klase na kating, impeksion ed toktok na ulo odino ed balbas,+
55 kating ed kawes+ odino ed abung,+
56 tan nipaakar ed larag, giri, tan batil,+
57 pian nibiig no say sakey a bengatla et agmalinis odino say sakey a bengatla et malinis.+ Saya so ganggan nipaakar ed kating.”+
Paimanod leksab
^ Say taloran kakaplo na sakey ya efa et 6.6 litro. Nengnengen so Apendise B14.
^ Say sakey a log et 0.31 litro. Nengnengen so Apendise B14.
^ Say kakaplo na sakey ya efa et 2.2 litro. Nengnengen so Apendise B14.
^ Literal, “kasalanan.”
^ Literal, “kasalanan.”
