Nehemias 6:1-19
6 Kayarin nipasabi ed si Sanbalat, Tobias,+ Gesem ya Arabiano,+ tan ed arum ni ran kakabusol mi ya impaalagey ko lamet so padir+ tan anggapo lay atilak a bungaw (anggano diad saman et agko ni niiyan iray kapot ed saray puerta),+
2 tampol ya impaibaga di Sanbalat tan Gesem iyan mensahe ed siak: “Gala, mangigana tayoy panaon na pambana tayo diad sakey ed saray baryo na Patar a Lawak na Ono.”+ Balet plano ra a sakitan ak.
3 Kanian angibaki ak ed sikara na saray mensahero tan impaibagak: “Baleg a kimey so gagawaen ko, tan agak makaonla. Akin et kaukolan ya ontunday kimey diad itaynan ko pian onlad sikayo?”
4 Amipat dan impaibagad siak so parehon mensahe, tan pareho labat so iyeebat kod sikara.
5 Insan imbaki nen Sanbalat so lingkor to pian ibagad siak so parehon mensahe diad komaliman danay, a walay awit ton agsinelyadoan a sulat.
6 Oniay akasulat ditan: “Diad saray nasyon et nibabalita, tan ibabaga met nen Gesem,+ a sika tan saray Judio et manplaplanon manrebelde.+ Kanian aapigeren moy padir; tan unong ed sarayan balita, sikay magmaliw ya ari ra.
7 Ontan met, anuro ka na saray propeta pian iyabawag da ed interon Jerusalem so nipaakar ed sika, ‘Walay ari ed Juda!’ Et natan, makasabi irayan bengatla ed ari. Kanian gala, ta pantongtongan tayo ’ya.”
8 Balet, oniay impaibagak ed sikato: “Anggapod saratay imbagam so agawa; inimbentom labat iratan manlapud imahinasyon mo.”*
9 Ta amin da et tataktakoten da kami, a kuan da: “Saray lima ra et onkapuy a mankimey, tan ag-itan nasumpal.”+ Natan, O Dios, komon ta pabiskeg mo ray limak.+
10 Insan linmoob ak ed abung nen Semaias ya anak nen Delaias ya anak nen Mehetabel legan a wadman ya akakulong. Inkuan to: “Mangigana tay panaon na pambana ta ed abung na tuan Dios, diad loob na templo, tan ikapot ta ray puerta na templo, ta onsabi ra pian pateyen da ka. Onsabi ray labi pian pateyen da ka.”
11 Balet inkuan ko: “Siak ta may too ya ombatik? Wala tay toon singa siak a no onloob ed templo et nabilay ni?+ Agak onloob!”
12 Insan amoriak a sikatoy ag-imbaki na Dios, noagta inupaan di Tobias tan Sanbalat+ pian ibaga to iyan propesiya sumpad siak.
13 Sikatoy inupaan pian taktakoten ak tan lagyaten ak a mankasalanan, pian wala ray rason da a deralen so reputasyon ko, diad ontan et napabanday da ak.
14 O Dios ko, nonot mo irayan ginawa di Tobias+ tan Sanbalat, ontan met si Noadias a propetesa tan arum ni ran propeta a naynay a manataktakot ed siak.
15 Kanian asumpal so padir diad koma-25 agew na Elul,* diad loob na 52 agew.
16 Sanen nadngelan itan na amin a kakabusol mi tan anengneng na amin a nasyon ed kaliberliber mi, abaibaingan ira,+ tan naamtaan da a diad tulong na Dios mi et asumpal iyan kimey.
17 Diad saraman ya agew, saray gagalangen a totoo+ na Juda et dakel so ipapawit dan sulat ed si Tobias tan eebatan to iratan.
18 Dakel a taga Juda so nansamba a mialyansad sikato, ta sikatoy manugang nen Secanias ya anak nen Arah,+ tan si Jehohanan ya anak to et inasawa toy anak nen Mesulam+ ya anak nen Berekias.
19 Ontan met, maong iray ibabaga rad siak nipaakar ed sikato tan idadalem dad sikato iray ibabagak. Insan mangipapawit si Tobias na saray sulat pian taktakoten ak.+
