Numeros 12:1-16
12 Natan et nansalitay mauges si Miriam tan Aaron ed si Moises lapud samay Cusita ya inasawa to, ta sikatoy angala na sakey a Cusita bilang asawa to.+
2 Ibabaga ran: “Diad panamegley labat kasi nen Moises a mansasalitay Jehova? Agta sikatoy nansalita met ed panamegley ta?”+ Tan ondedengel si Jehova.+
3 Natan, say lakin si Moises so sankauyamoan ed amin a totoo*+ diad tapew na dalin.
4 Tampol ya inkuan nen Jehova ed si Moises, Aaron, tan Miriam: “Paway kayo, sikayon talo, tan la kayod tolda a pantitiponan.” Kanian pinmaway iran talo.
5 Tan linmeksab si Jehova diad panamegley na singa lusek a lurem+ tan inmalagey diad lolooban na tolda tan tinawag toy Aaron tan Miriam. Inmasingger iran dua.
6 Insan inkuan to: “Ipangasi yo, dengel yoy ibagak. No walay propeta nen Jehova ed limog yo, ipakabat koy inkasiak ed sikato diad sakey a pasingawey,+ tan mitongtong ak ed sikato diad sakey a kugip.+
7 Balet aliwan ontan ed si Moises a lingkor ko! Nimatalek ed sikato so interon sankaabungan ko.*+
8 Arap-arapan* ak a mitotongtong ed sikato,+ maparungtal, aliwan diad panamegley na saray pabitla; tan nanenengneng to so kiwawala nen Jehova. Akin sirin et agkayo tinmakot a nansalitay mauges ed lingkor kon Moises?”
9 Kanian dinmalang so sanok nen Jehova ed sikara, tan tinaynan to ra.
10 Inmarawi so lurem manlapud tagey na tolda, tan akating si Miriam a singa kaputi na niebe.+ Insan nilingaw nen Aaron si Miriam, tan anengneng to a sikatoy akating.+
11 Tampol ya inkuan nen Aaron ed si Moises: “Mikasi ak ed sika, katawan ko! Ipangasim, agmo kami dudusaen lapud sayan kasalanan! Ta makulangkulang kami ed sayan ginawa mi.
12 Ipangasim, agmo aabuloyan a sikatoy mantultuloy a singa inatey ya ugaw a kapangiyanak, a say kapalduan laman to et abulok la!”
13 Tan tinmawag si Moises ed si Jehova, ya inkuan to: “O Dios, ipangasim, sikatoy paabig mo! Ipangasim!”+
14 Inmebat si Jehova ed si Moises: “No lutdaan nen ama to so mismon lupa to, agta sikatoy napabanday ed loob na pitoy agew? Sikatoy ikuarantinam diad paway na kampo ed loob na pitoy agew,+ tan kayari na satan et sikatoy nayari lan ompawil.”
15 Kanian nikuarantina si Miriam diad paway na kampo ed loob na pitoy agew,+ tan ag-inmalis iray totoo ya anggad agnipawil si Miriam.
16 Insan tinmaynan ed Hazerot+ iray totoo tan nankampo rad kalawakan na Paran.+
Paimanod leksab
^ Odino “so mapabpaabeba (mauy-uyamo), mas ni nen say siopaman a too.”
^ Literal, “Diad interon abung ko et papaneknekan ton sikatoy matoor.”
^ Literal, “Sangi ed sangi.”
