Proverbio 10:1-32
10 Saray proverbio nen Solomon.+
Say marunong ya anak et paliliketen toy ama to,+Balet say makulangkulang ya anak et paeermenen toy ina to.
2 Saray kayamanan ya agamoran ed kaugsan et agmakagunggona,Balet say inkatunong so mangiliktar ed ipapatey.+
3 Ag-abuloyan nen Jehova a naerasan so sakey a matunong,*+Balet agto iter so pipirawaten na mauges.
4 Say liman mangiras et pansengegay kairapan,+Balet say liman makuli et mangawit na kayamanan.+
5 Say anak ya onkikiwas a makabat et mantitipon na ani legan na tiagew,Balet say anak ya onkikiwas a makapabaing et maugi-ugip no panag-ani.+
6 Saray bendisyon et walad ulo na matunong,+Balet say sangi na mauges et mangiyaamot na inkaruksa.
7 Say pakanodnonotan ed* matunong et manresultad bendisyon,+Balet say ngaran na mauges et nabulok.+
8 Samay walaan na puson marunong et mangawat na saray bilin,*+Balet samay makulangkulang so panagsalita to et nigatin-gatin.+
9 Samay manaakar a walaan na integridad et manakar ed kaligenan,+Balet samay mamipikewet ed saray dalan to et nasukayan.+
10 Ermen so niiiter na samay masilib a mangikikindat na mata to,+Tan samay makulangkulang so panagsalita to et nigatin-gatin.+
11 Say sangi na matunong et subol na bilay,+Balet say sangi na mauges et mangiyaamot na inkaruksa.+
12 Say pambusol et mamapawalay kolkolan,Balet say aro et sakbongan toy amin a lingo.+
13 Say karunongan et walad bibil na toon makatebek,+Balet say lewet et parad beneg na andiay maong a pakatebek.*+
14 Saramay marunong et papablien day* kakabatan,+Balet say sangi na makulangkulang et manatawag na kadederal.+
15 Say kayamanan* na sakey a too et singa apadiran a syudad to.
Say maneral ed saray pobri et say kairapan da.+
16 Say kimey na matunong et mangitonton ed bilay;Balet say naaani na mauges et mangitonton ed kasalanan.+
17 Samay ontutulok ed disiplina et sakey a basbas paonlad bilay,*Balet samay mangibabaliwala ed panametek et ibabalang toy arum.
18 Samay mangiyaamot na pambusol to et mansasalitay katilaan,+Tan samay mangikakayat na saray makaderal a balita* et makulangkulang.
19 Sano dakel so salita, agnapaliisay pakalingo,+Balet siopaman a popokpokan toy bibil to et makabat.+
20 Say dila na matunong et singa sankaabigan a klase na pilak,+Balet say puso na mauges et anggapoy kablian.
21 Say bibil na matunong et dakel so papakanen* to,+Balet say makulangkulang et ompapatey lapud andian na pakatalos.+
22 Say bendisyon nen Jehova so mamapayaman ed sakey,+Tan agto itan aaruman na pakasakitan.*
23 Say pibiang ed makapabaing a kagagawa et singa sakey a galaw parad makulangkulang,Balet say karunongan et parad toon makatebek.+
24 Samay tatakotan na mauges et onsabid sikato;Balet say pipirawaten na matunong et niiter ed sikato.+
25 Sano ondalan so bagyo, naandi so mauges,+Balet say matunong et sakey a pundasyon ya anggad angga.+
26 Singa tuka ed ngipen tan asewek ed mata,Ontan so mangiras a too ed samay mangibabakid sikato.*
27 Say takot ed si Jehova et mamarukey na bilay,+Balet saray taon na mauges et napatikeyan.+
28 Say tatalaranan* na matunong et mamawalay liket,+Balet say ilalo na mauges et naandi.+
29 Say dalan nen Jehova et proteksion na samay andiay pakabalawan,+Balet pakaderalan itan na saramay manggagaway mauges.+
30 Say matunong et agbalot natumba,+Balet say mauges et agla manayam diad dalin.+
31 Say sangi na matunong et mamapawala* na karunongan,Balet say mapalikdon dila et naputot.
32 Say bibil na matunong et amta to no antoy makapaliket,Balet say sangi na mauges et mapalikdo.
Paimanod leksab
^ Odino “so kamarerwa na sakey a matunong.”
^ Odino “reputasyon na.”
^ Literal, “saray ganggan.”
^ Literal, “mankaukolan na puso.”
^ Odino “mantitipon na.”
^ Odino “Say mablin bengatla.”
^ Odino posiblin, “et walad basbas paonlad bilay.”
^ Odino “saray tsismis.”
^ Odino “iwawanwan.”
^ Odino “ermen; irap.”
^ Odino “ed amo to.”
^ Odino “ilalo.”
^ Odino “manbubunga.”
