Salmo 38:1-22
Kansion nen David, pian onkanan panonot.
38 O Jehova, agmo ak komon dudusaen sano manpapasnok ka,Tan agmo ak ipepetek sano onsasanok ka.+
2 Ta saray panam et tinmalos ed loob ko,Tan say limam et ondedetdet ed siak.+
3 Mansasakit lay interon laman ko* lapud sanok mo.
Anggapoy kareenan ed saray pukel ko lapud kasalanan ko.+
4 Ta saray lingok et onsasakbong ed ulok;+Singa iratan ambelbelat ya awit ya agko sarag a sakbaten.
5 Saray sugat ko et ombabanget tan nabubulokLapud inkamakulangkulang ko.
6 Agonigon tan nipaabeba ak a maong;Sanagew ak a manaakar-akar a maer-ermen.
7 Walay ondadalang ed loob ko;Mansasakit lay interon laman ko.+
8 Nakal so pakaliknak tan adanel ak a maong;Manugaog* ak lapud maer-ermen so pusok.
9 O Jehova, amtam so amin a pipirawaten ko,Tan agniyamot ed sika so paneermen ko.
10 Manpukal so pusok, naupot so kasil ko,Tan naandi lay liwawa na saray matak.+
11 Papaliisan ak na saray kakaarok tan kakaibak lapud sakit ko,Tan aarawian ak na saray kabkabat ko.
12 Saramay malabay a mamatey ed siak* et angiyan na saray patit;Dederalan ak na saramay malabay a mamasakit ed siak;+Sanagew iran manlalabir na panagpalikdo.
13 Balet agak ondedengel, a singa ak telek;+Agak mansasalita, a singa ak emel.+
14 Nagmaliw ak a singa toon agmakadngel,A say sangi to et anggapoy nibaga to bilang depensa.
15 Ta nanalagar ak ed sika, O Jehova,+Tan inebatan mo ak, O Jehova a Dios ko.+
16 Ta inkuan ko: “Agda ak komon elek-elekanTan agda komon itandoroy inkasikara sano nakarunyas so salik.”
17 Ta ngalngali ak la nabaktar,Tan agnaaandi so sakit a naliliknak.+
18 Impatuak so lingok;+Gogonigonen ak na kasalanan ko.+
19 Balet saray kalaban ko et mabiskeg* tan makapanyari,*Saramay mamubusol ed siak ya anggapoy rason et dinmakel ira.
20 Babalesen da na kaugsan so kamaongan ko;Susumpaen da ak lapud panggugunaet kon manggaway maong.
21 Agmo ak papaulyanan, O Jehova.
Agka mansiasiansian arawid siak, O Dios ko.+
22 Tulongan mo ak a tampol,O Jehova a manangiliktar ko.+
Paimanod leksab
^ Literal, “Anggapo so limpio ed laman ko.”
^ Odino “Manungol.”
^ Odino “Saramay manaanap ed kamarerwak.”
^ Literal, “mabilay.”
^ Odino posiblin, “Balet saray mamubusol ed siak ya anggapoy makasengeg et amayamay.”
