Salmo 58:1-11
-
Walay Dios a manguukom ed dalin
-
Pikakasi pian nadusa so mauges (6-8)
-
Parad direktor; diad “Agka Manederal.” Salmo nen David. Miktam.*
58 Sarag yo kasi mangibaga na inkatunong anta manpapareen kayo?+
Sarag yo kasi mangukom a maptek, sikayo ran anak na totoo?+
2 Andi, noagta manggegetma kayoy ag-inkatunong diad puso yo,+Tan saray lima yo et manggagawa na inkaruksa diad dalin.+
3 Saray mauges et onsusuawi* manlapu lad inkiyanak da;*Benger ira, matitila ra manlapu la nen niyanak ira.
4 Say dita ra et singa dita na saray serpiente;+Telek ira a singa kobra ya agto labay so ondengel.
5 Ag-itan ondengel ed boses na saray managsalamangka,Anggano marundunong ira ed panagpaamo.
6 O Dios, bunger mo pa ray ngipen da!
O Jehova, betag mo pa ray panga na sarayan leon!*
7 Naandi ra komon a singa oneekat a danum.
Pinaten To komon so pana to tan itumba to ra ed satan.
8 Magmaliw ira komon a singa bisukol a namamagaan legan ya onkukurong;Singa ugaw ya inatey lad eges na ina to ya aglan balot makanengneng na agew.
9 Antis ya ompetang iray banga yo ed dalang na sabisabit,Paandien to ray ambasa ni tan napopoolan lan sanga, a singa ed maksil a dagem.+
10 Manliket so matunong ta anengneng toy panangibales ed saray mauges;+Natalem iray sali to ed dala ra.+
11 Diad ontan et ibaga na totoo: “Tua a natutumangan so matunong.+
Talagan walay Dios a manguukom ed dalin.”+
