Ukom 1:1-36
1 Kayari na impatey nen Josue,+ nantepet iray Israelita* ed si Jehova:+ “Siopad sikami so unonan onla pian milaban ed saray Canaanita?”
2 Oniay inyebat nen Jehova: “Say tribu na Juda so onla.+ Tan iyawat ko* ed lima ra so dalin.”
3 Insan inkuan na tribu na Juda ed tribu na Simeon ya agagi ra: “Mila kayod sikami diad teritorya mi*+ ta labanan tayo iray Canaanita. Insan mila kami met ed sikayo diad teritorya yo.” Kanian akila ed sikara so tribu na Simeon.
4 Sanen linma so tribu na Juda, inyawat nen Jehova ed lima ra iray Canaanita tan saray Perizeo,+ tan tinalo da so 10,000 lalaki ed Bezek.
5 Nalmo ray Adoni-bezek diad Bezek, tan akilaban irad sikato tan tinalo da iray Canaanita+ tan saray Perizeo.+
6 Sanen tinmakas si Adoni-bezek, sikatoy inusilan da tan narel da tan pinutot da iray tangan na saray lima tan sali to.
7 Insan inkuan nen Adoni-bezek: “Walay 70 arari a pinutot ko iray tangan na lima tan sali ra, tan mandodokdok ira na naakan diad silong na lamisaan ko. No antoy ginawak et ontan met so imbales na Dios ed siak.” Kayari na saman et sikatoy inawit dad Jerusalem,+ tan diman inatey.
8 Niarum ni, akiguerra ed Jerusalem iray lalaki ed Juda+ tan asakop da itan; pinapatey dad espada iray totoo ditan tan pinoolan day syudad.
9 Kayari na satan et linma iray lalaki na Juda pian milaban ed saray Canaanita a manaayam ed mapalandey a rehyon tan ed Negeb tan Sefela.+
10 Diad saman et nilusob na Juda iray Canaanita a manaayam ed Hebron (say Hebron et tatawagen nensaman a Kiriat-arba), tan pinatey day Sesai, Ahiman, tan si Talmai.+
11 Manlapud man et nilusob da iray manaayam ed Debir.+ (Say Debir et tatawagen nensaman a Kiriat-sefer.)+
12 Insan inkuan nen Caleb:+ “Say lakin onlusob tan makasakop ed Kiriat-sefer, iter kod sikato si Acsa a marikit ko bilang asawa to.”+
13 Tan sinakop itan nen Otniel+ ya anak nen Kenaz,+ say agi nen Caleb. Kanian inter nen Caleb ed sikato si Acsa a marikit to bilang asawa to.
14 Sanen pasempet lay Acsa, dinagdag toy asawa to ya onkerew na uma ed si ama to. Insan inmepas si Acsa ed asno to.* Sikatoy tinepetan nen Caleb: “Antoy labay mo?”
15 Inyebat to: “Ipangasim, ikdan mo ak na bendisyon, ta amaga imay dalin ya inter mod siak diad abalaten;* kanian iter mo met ed siak so Gulot-maim.”* Kanian inter nen Caleb ed sikato so Bandad Tagey a Gulot tan Bandad Leksab a Gulot.
16 Tan saray kailalakan na samay Keneo,+ a katulangan nen Moises,+ et tinmatdang manlapud syudad na saray kiew a palma+ a kaiba iray totoo na Juda tan linma rad kalawakan na Juda diad abalaten na Arad.+ Linma ra diman tan nanayam irad limog na saray totoo.+
17 Balet intuloy ni na tribu na Juda so impanakar da a kaiba so tribu na Simeon ya agagi ra, tan nilusob da iray Canaanita a manaayam ed Zefat tan dineral da itan.+ Kanian say syudad et inngaran day Horma.*+
18 Insan asakop na Juda so Gaza,+ Askelon,+ tan say Ekron+ tan saray teritorya na saratan.
19 Si Jehova et walad dapag na Juda, tan kinayarian da iray mapalandey a rehyon, balet agda apataynan iray manaayam ed patar* ta walaan iratan na saray pan-guerran karwahe a nantarem so dalig da.*+
20 Inter dad si Caleb so Hebron, unong ya insipan nen Moises,+ tan pinataynan to ditan iray taloran ananak nen Anak.+
21 Balet agpinataynan na saray Benjaminita iray Jebuseo a manaayam ed Jerusalem, kanian nantultuloy a nanayam ed Jerusalem iray Jebuseo a kaiba iray Benjaminita ya anggad natan.+
22 Kaleganan na satan et nilusob na sankaabungan nen Jose+ so Bethel, tan si Jehova et walad sikara.+
23 Nan-espiya so sankaabungan nen Jose diad Bethel (say syudad et tatawagen nensaman a Luz),+
24 tan anengneng na saramay maneespiya so sakey a laki ya ompapaway ed syudad. Kanian inkuan dad sikato: “Ipangasim, ipanengneng mod sikami so dalan pian makaloob kamid syudad, tan kasian mi ka.”*
25 Kanian impanengneng na samay laki so dalan pian makaloob irad syudad, tan pinatey dad espada iray manaayam ed syudad, balet pinaulyan dan ontaynan imay laki tan say interon pamilya to.+
26 Saman a laki et linmad dalin na saray Heteo tan nampaalagey na syudad tan inngaran to na Luz, a satan so ngaran to anggad natan.
27 Agkinayarian na Manases so Bet-sean tan saray angkekelag* a baley na satan, say Taanac+ tan saray angkekelag a baley na satan, saray manaayam ed Dor tan saray angkekelag a baley na satan, saray manaayam ed Ibleam tan saray angkekelag a baley na satan, tan saray manaayam ed Megido tan saray angkekelag a baley na satan.+ Determinado iray Canaanita a mansiansia ed satan a dalin.
28 Sanen binmiskeg so Israel, impagmaliw dan aripen iray Canaanita,+ balet agda ra sigpot a pinataynan.+
29 Agmet pinataynan na Efraim iray Canaanita a manaayam ed Gezer. Nanayam nid limog da iray Canaanita diad Gezer.+
30 Agpinataynan na Zebulon iray manaayam ed Kitron tan saray manaayam ed Nahalol.+ Nanayam nid limog da iray Canaanita tan nagmaliw iran ariripen.+
31 Agpinataynan na Aser iray manaayam ed Aco tan saray manaayam ed Sidon,+ Alab, Aczib,+ Helba, Apik,+ tan Rehob.+
32 Kanian nanayam iray Aserita ed limog na saray Canaanita a manaayam ed saman a dalin, ta agda ra pinataynan.
33 Agpinataynan na Neftali iray manaayam ed Bet-semes tan saray manaayam ed Bet-anat,+ noagta nanayam ira ed limog na saray Canaanita a manaayam ed saman a dalin.+ Nagmaliw ya ariripen da iray manaayam ed Bet-semes tan Bet-anan.
34 Apuersa iray Danita a mansiansia ed mapalandey a rehyon, ta ag-ira inabuloyan na saray Amoreo a makalasur ed patar.*+
35 Kanian nansiansia iray Amoreo ed Palandey Heres, Aijalon,+ tan Saalbim.+ Balet nagmaliw iran ariripen sanen binmiskeg* so pakayari* na sankaabungan nen Jose.
36 Say dalin a nasasakopan na saray Amoreo et manlapud patatdang na Akrabim,+ manlapud Sela a patagey.
Paimanod leksab
^ Literal, “lalakin ananak nen Israel.”
^ Odino “inyawat ko la.”
^ Literal, “apag ko.”
^ Odino posiblin, “sikatoy tinmipak legan ya akalugan ed asno.”
^ Odino “Negeb.”
^ Kabaliksan toy “Saray Palanggana (Saray Yaong) na Danum.”
^ Kabaliksan toy “Pangigana ed Kadederal.”
^ Odino “abeban patar.”
^ Literal, “saray karwahe a balatyang.”
^ Literal, “ipatnag mid sika so matoor a panangaro.”
^ Odino “walad kaliberliber.”
^ Odino “abeban patar.”
^ Literal, “binmelat.”
^ Literal, “lima.”
