Manlapu la nen 2018, saray magasin tayo ya para ed publiko et sakey labat so topic to kada isyu. Amin iratan ya magasin et kabiangan na Uusaren ed Panagbangat. Kanian sarag tayon usaren iratan ed ministeryo. Sarag tayo met so mangawit na pigaran isyu no manbiabiahe o mansha-shopping tayo. Agtayo iratan uusaren pian iyaral so Biblia ed totoo, balet makatulong iratan pian magmaliw iran interesado nipaakar ed Dios.

No nigapo tayo lay tongtongan, mangi-share na sakey ya teksto tan sakey ya topic ed magasin ya makapainteres ed sikara. Singa bilang, no say sakey et mamapabaleg na ananak, inateyan, odino nai-stress, sarag mon ibaga ed sikato: “Walay abasak nipaakar ed satan. Labay kon i-share ed sika.” No alikas mon interesado, sarag mon ikdan na magasin odino mangi-send kay electronic copy anggan diad unonan pitongtong ni labat. Anggano aliwan say pangiter na literatura so manunan gagala tayo, makatulong iratan pian naanap tayo iramay malabay ya makaaral.​—Gaw 13:48.