Say labay ya ibaga na kaaro et “sakey ya toon inmapit ed sakey ya too lapud panangaro odino panamabli.” Singa bilang, nagmaliw ya malet a sankaaro si Jonatan tan David kayarin tinalo nen David si Goliat. (1Sa 18:1) Wala ray kualidad ya labalabay da ed sakey tan sakey. Sirin, magmaliw ya malet ya sankaaro so duaran too no nakabat dan maong so balang sakey. Pian nakabat so sakey a too, kaukolan so panaon tan sagpot. Balet diad social network, nayarin magmaliw ya “friends” iray totoo diad sakey labat ya click na mouse. Diad online, sarag na totoo ya iplanon maong so ibaga ra tan nakontrol da no antoy labay dan isipen na arum ed sikara, kanian mainomay dan iyamot no siopa ran talaga. Mas maabig sirin ya isipen mo nin maong no siopa ray i-accept mon “friend” diad online. Agka natatakot ya i-reject iray friend request na totoon agmo met talaga kabat, ta ompan iisipen mo ya nasakitan ira. Wala ray arum ya nandesisyon ya agbalot mangusar na saray social network lapud saray posiblin peligro. Balet no labay moy mangusar na social network, anto ray nepeg mon tandaan?

BANTAYAN SO VIDEO YA MAGMALIW YA MATALINO ED PANGUSAR NA SOCIAL NETWORK, INSAN EBATAN IRAYAN TEPET:

• Anto ray nepeg mon nonoten antis kan man-post na comment tan picture?

• Akin et dapat mon pilien a maong no siopa ray magmaliw ya friends mod online?

• Akin et dapat ya walay limitasyon na panaon ya pangusar mo ed social network?—Efe 5:15, 16