Legan ya manasingger so anggaan na sayan sistema, iilaloan tayon onloor ni iray gulo, terorismo, tan guerra. (Apo 6:4) Panon tayon makapanparaan ed saray mairap ya nagawad arapen?

• Manparaan ed espiritual: Aral mo iray prinsipyo tan salaysay ed Biblia ya makatulong ed sikan ombiskeg so tiwalam ed si Jehova tan ed organisasyon to, tan makatulong ed sikan mansiansian neutral. (Pro 12:5; jr 125-126 ¶23-24) Natan lay panaon pian paeleten so pikakaarom ed saray agagi.—1Pe 4:7, 8

• Iparaan iray nakaukolan: Iplano no panon kayon mansiansian safe anggano agkayo makaalis ed abung yo tan seguroen ya walay magenap ya suplay na naakan yo. Ontan met, iplano so gawaen yo no kaukolan yoy man-evacuate. Nengnengen lamet iray karga na emergency bag yo, tan mangikarga met ditan na personal protective equipment (PPE) tan kuarta. Amtaen no panon yon nakontak iray elder, tan seguroen ya nakontak da kayo met.—Isa 32:2; g17.5 3-7

Legan ya magulogulo so kipapasen, itultuloy yon gawaen iray espiritual ya rotina yo. (Fil 1:10) Paliisan yoy onalis-alis likud labat no kaukolan yoy man-evacuate. (Mat 10:16) Inabang yo ed agagi iray naakan tan arum nin suplay yo.—Rom 12:13.

BANTAYAN SO VIDEO YA KASIN AKAPARAAN KA NO WALAY ONSABIN KALAMIDAD? INSAN EBATAN IRAYAN TEPET:

• Panon itayon natulongan nen Jehova no walay kalamidad?

• Anto ray praktikal ya gawaen tayo pian makapanparaan?

• Panon tayon natulongan iray apektado na kalamidad?