Asingsingger lan mangangga so panaanos nen Jehova ed sayan mundo. Naderal so palson relihyon, atakien na alyansa na saray bansa so totoo na Dios, tan deralen nen Jehova iray mauges diad Armagedon. Tatalaranan la na saray Kristiano irayan importantin nagawa.

Agtayo amta so amin ya detalye nipaakar ed baleg ya kairapan. Singa bilang, agtayo amta no kapigan so eksakton igapo na satan. Agtayo amta no anto ray gawaen ya rason na saray lider na politika pian atakien so relihyon. Agtayo amta no panon kabayag so iyataki na saray bansa ed totoo na Dios odino no anto ray paraan da. Agtayo met amta no antoy eksakton usaren nen Jehova pian deralen iray mauges diad Armagedon.

Balet, impaamta la na Kasulatan so amin ya impormasyon ya kaukolan tayo pian matalek tan makpel tayo antokaman so nagawa ed arapen. Singa bilang, amta tayo ya manbibilay tayo lad “kaunoran iran agew.” (2Ti 3:1) Amta tayo ya “napatikeyan” so iyataki ed saray relihyon pian agnaderal so tuan relihyon. (Mat 24:22) Amta tayon iliktar nen Jehova iray totoo to. (2Pe 2:9) Tan amta tayo ya samay pinili nen Jehova ya manderal ed saray mauges tan mangiliktar ed baleg ya ulop diad Armagedon et matunong tan makapanyari.—Apo 19:11, 15, 16.

Seguradon “onkapuy iray totoo lapud takot” ed saray nagawad arapen. Balet no babasaen tan dadalepdepen tayo ray impangiliktar nen Jehova ed saray totoo to diad apalabas tan saray imbaga ton gawaen tod arapen, ‘makaalagey tayoy maptek tan nitangwa tayo ray ulo tayo,’ ta amta tayon asingsingger lay kililiktar tayo.—Luc 21:26, 28.