Kapitulo 17

Ipapawil nen Kristo–Panon a Nanengneng?

1. (a) Anto so insipan nen Kristo? (b) Anto so nakaukolan diad ipawil nen Kristo?

 “SIAK SO OMPAWIL LAMET.” (Juan 14:3) Saya so insipan nen Jesu-Kristo ed saray apostoles to sanen sikara so kaiba to ed samay labi sakbay na impatey to. Nayarin sika so mipakna a wala so nagkalalon babaleg a pankaukolan ed kareenan, bunigas tan bilay ya itarok na ipawil nen Kristo ed pakayari na Panarian ed katooan. Balet panon so ipawil nen Kristo? Siopa so makanengneng ed sikato, tan diad anton dalan?

2. (a) Sano sikato so ompawil, iner so pangawitan nen Kristo ed saray alanaan a patumbok to, a pati saray apostoles to, a panayaman? (b) Anton nengneng na laman so kayarianen dad’man?

² Diad ipawil to, si Kristo so ag-onsabi a manayam ed dalin. Noag ingen, saraman so manuley a bilang ararin kaiba to so nikasakey ed sikato diad tawen. Imbaga nen Jesus ed saray apostoles to: “Siak so ompawil lamet tan awaten takayo ed inkasiak, pian no iner so kawalaan ko et wadman kayo met komon.” (Juan 14:3) Sirin, sano ompawil si Kristo, saramay naawit ed tawen so magmaliw ya espiritun persona, tan nanengneng da si Kristo ed niglorian maespiritun laman to. (1 Corinto 15:44) Balet kasin say katooan, ya ag-onla ed tawen, so makanengneng ed si Kristo diad ipawil to?

NO AKIN A SIKATO SO AG-OMPAWIL A BILANG SAKEY A TOO

3. Anton ebidensya na Biblia so mangipanengneng a saray totoo so aglan balot makanengneng ed si Kristo lamet?

³ Imbaga nen Jesus ed saray apostoles to ed saman a labi: “Wala ni  daiset tan say mundo et agto ak la nanengneng.” (Juan 14:19) Say “mundo” so manutukoy ed katooan. Kanian malinlinew dian imbaga nen Jesus a saray totoo ed dalin so agla makanengneng ed sikato lamet diad kayari na isegep to ed tawen. Insulat nen apostol Pablo: “Anggaman akabatan tayo si Kristo unong ed laman, peteg ya agtayo la natan kabat ya ontan.”​—2 Corinto 5:16.

4. Antoy mangipanengneng a si Kristo so ompawil a bilang makapanyarin agnanengneng ya espiritun persona?

⁴ Ingen ta sisiaen na dakel a totoo a si Kristo so ompawil ed parehon atooan a laman ya inateyan to, tan amin na saraman so manbibilay ed dalin so makanengneng ed sikato. Say Biblia, anggaman kuan, so mangibabagan si Kristo so ompawil ed gloria to a kaiba to so amin ya angheles, tan sikato so onyurong “ed maglorian trono to.” (Mateo 25:31) No si Jesus so onsabi tan onyurong a bilang sakey a too ed mangaraldalin a trono, sikato so magmaliw ya abebbeba ed inkabetang nen saray angheles. Balet sikato so onsabin sankamakapanyarian tan sankamagloriaan ed amin na sarayan espiritun anak na Dios tan sirin sikato la so agnanengneng, a singa sikara.​—Filipos 2:8-11.

5. Akin a si Kristo so agla ompawil ed atooan a laman?

⁵ Diad biek a dapag, masulok lan 1,900 taon a linmabas a kinaukolan nen Jesus so pangipaabeba to ed inkasikato tan magmaliw a too. Kinaukolan ton iter so ayadyarin atooan a bilay to bilang dondon ed sikatayo. Aminsan a saya so impaliwawa nen Jesus ed onia: “Say tinapay ya iter ko et say laman ko a nisesengeg ed bilay na mundo.” (Juan 6:51) Sirin inter nen Jesus so silalaman a laman to diad bagat a para ed katooan. Diad kaunongan kabayag so iyepekto na satan a bagat? Onebat si apostol Pablo: “Sikatayo so apasantos ed panamegley na impangiyapay ed laman nen Jesu-Kristo ya aminsan ed amin a panaon.” (Hebreos 10:10) Diad impangiter to’d laman to a nisesengeg ed bilay na mundo, satan so aglan balot alaen lamet nen Kristo tan magmaliw lamet a sakey a too. Nisengeg ed satan a manunan rason say ipawil to so agnayari lan balot a diad atooan a laman ya imbagat ton aminsan ed amin a panaon.

AGNAAWIT ED TAWEN SO LAMAN

6. Akin a sisiaen na dakel a totoo ya inawit nen Kristo so laman to ed tawen?

⁶ Anggaman kuan, sisiaen na dakel a totoo ya inawit nen Kristo so laman to ed tawen. Ituro ra so katuaan a sanen si Kristo so apaoli a nanlapud saray inaatey, say laman to so anggapo la ed lubok. (Marcos 16:5-7) Ontan met, kayari na impatey to et si Jesus so pinmanengneng ed saray babangatan to diad laman pian ipanengneng to’d sikara a sikato so mabilay. Aminsan et impakaplas to ni ed si apostol Tomas so  abut ed diking To ta pian manisia si Tomas a Sikato la so peteg ya apaoli. (Juan 20:24-27) Agta saya so mamaneknek a si Kristo so apaolin mabilay ed parehon laman ya inateyan to?

7. Antoy mamaneknek a si Kristo so linma’d tawen bilang sakey ya espiritun persona?

⁷ Andi, aliwan ontan. Say Biblia so malinlinew a tuloy sanen inkuanto: “Si Kristo so inatey ya aminsan ed amin a panaon . . . , a sikato so niiyan ed ipapatey diad laman, balet ta agawan mabilay ed espiritu.” (1 Pedro 3:18) Saray laman-tan-dala a totoo so agmakapambilay ed tawen. Diad kioli ed mangatatawen a bilay, ibabaga na Biblia: “Nitanem ed pisikal a laman, napaoli ed espiritual a laman. . . . say laman tan dala so agmakatawir ed panarian na Dios.” (1 Corinto 15:44-50) Saray maespiritun persona lambengat a walaan na maespiritun laman so makapambilay ed tawen.

8. Antoy agawa ed atooan a laman nen Kristo?

⁸ Bueno, sirin, anto so agawa ed laman nen Jesus? Agta aromog na saray babangatan to a say lubok to so andian na karga? On, lapud inekal na Dios so laman nen Jesus. Akin a saya so ginawa na Dios? Sinumpal to so nisulat ed Biblia. (Salmo 16:10; Gawa 2:31) Sirin anengneng nen Jehova a manepeg so pangekal ed laman nen Jesus, unong a singa ginawa to nensaman ed laman nen Moises. (Deuteronomio 34:5, 6) Ontan met, no say laman so atilak ed lubok, nayarin agnatalosan na saray babangatan nen Jesus a sikato so apaoli a nanlapud saray inaatey lapud diad saman a panaon et agda ni naapresyan sigpot iray espiritual a bengatla.

9. Panon a posibli ed si Tomas so pangikaplas to na lima to ed sugat diad nankinon-toon laman na apaolin Jesus?

⁹ Balet lapud nikaplas nen apostol Tomas so lima to ed abut ed diking nen Jesus, agta ipanengneng na satan a si Jesus so apaoli a nanlapud saray inaatey diad parehon laman a nipasak ed kiew? Andi, ta si Jesus so nankinon-too labat odino insulong to so inkalaman, a singa ginawa na saray angheles nensaman. Ta pian nakumbinse si Tomas no siopa, inusar To so laman a walaan na abut na sugat. Sikato so pinmatnag,  odino singa nagmaliw, a sigpot a too, a sarag to so mangan tan oninum, a singa saray angheles a sinankaili nen Abraham ya aminsan.​—Genesis 18:8; Hebreos 13:2.

10. Antoy mangipanengneng a si Jesus so angisulong na nanduruman pisikal a laman?

¹⁰ Manwarin si Jesus so pinmatnag ed si Tomas ed laman a miulibay ed samay sakey ya inyan To ed ipapatey, inala to met so miduman laman sanen pinmatnag ed saray patumbok To. Kanian diad inmuna et inisip nen Maria Magdalena a si Jesus so sakey a hardinero. Diad arum a panaon et sikato so agtampol abidbir na babangatan to. Diad sarayan inkagawa et aliwan say personal ya indengan to so nanserbin pakabidbiran ed sikato, noagta diad arum a salita odino kiwas a sikato so akabidbiran da.​—Juan 20:14-16; 21:6, 7; Lucas 24:30, 31.

11, 12. (a) Diad anton nengneng so insipot nen Jesus ed dalin? (b) Sirin diad anton nengneng so ilaloan tayon ipawil nen Kristo?

¹¹ Diad loob na 40 agew kayari na inkioli to, si Jesus so pinmatnag ed pisikal a laman ed saray babangatan to. (Gawa 1:3) Insan sikato la so sinmegep ed tawen. Balet nayarin itepet na arum: ‘Agta saray duaran angheles a wadman so angibaga ed saray apostoles a si Kristo so “ompawil ed parehon nengneng a singa impakanengneng yo ed sikato ya onsesegep ed tawen”?’ (Gawa 1:11) On. Balet imanoen ya inkuan da a “diad parehon nengneng,” aliwan diad parehon laman. Tan anto so nengneng na insipot nen Jesus? Sikato so mareen, ya agnaimatonan na lapag. Saray apostoles to lambengat so mikabat ed satan. Agkabat na mundo.

¹² Imanoen no panon so impaneskribe na Biblia ed nengneng ya anaynanan nen Jesus ed saray apostoles to nen mamaarap la ed tawen: “Legan a sikara so onnenengneng, sikato so nipaatagey tan inala na lurem a manlapud pakanengneng da.” (Gawa 1:9) Kanian sanen si Jesus so ginmapon mamaatagey ed tawen, sikato so insanib na lurem a manlapud literal a pakanengneng na saray apostoles to. Say onsisipot a Jesus, sirin, so agda la nanengneng. Sikato so agda la nanengneng. Insan diad espiritual a laman to et sikato so sinmegep ed tawen. (1 Pedro 3:18) Sirin say ipawil to met so agnanengneng, diad maespiritual a laman.

 NO PANON A NANENGNENG NA KADA MATA

13. Panon so pantalos tayo ed balikas a “kada mata so makanengneng” ed si Kristo sano onsabi ed saray lurem?

¹³ Panon, sirin, so pantalos tayo ed saray salita na Apocalipsis 1:7? Ditan et insulat nen apostol Juan: “Nia! Sikato so onsabi ed saray lurem, tan kada mata so makanengneng ed sikato, tan saraman so anugat ed sikato; tan amin na saray tribu ed dalin so manermen nisesengeg ed sikato.” Dia et sasalitaen na Biblia so pakanengneng, aliwan diad pisikal a mata, noagta diad pakatebek odino pakamoria. Sirin, sano natebek odino natalosan na sakey a too so sakey a pamaakaran, nayarin ikuan to, ‘Anengneng ko.’ Say Biblia, diad tua, et sasalitaen to so “mata na pakatalos yo.” (Efeso 1:18, King James Version) Sirin say balikas a “kada mata so makanengneng ed sikato” so mankabaliksan a balang sakey so makatalos odino makabidbir a si Kristo so sinmabi la.

14. (a) Siopa so atukoy diad “saraman so anugat ed sikato”? (b) Akin a wala so baleg a panermen sano diad kaunoran et nabidbir na balang sakey so kiwawala nen Kristo?

¹⁴ Saramay peteg ya “anugat” ed si Jesus so aliwa laran mabilay ed dalin. Kanian irerepresenta ra so totoo, a diad impamasakit da ed saray kaplesan-agew a patumbok nen Kristo, et aaligen da so kondukta na saraman so inmunan-siglon totoo. (Mateo 25:40, 45) Say panaon so magano lan onsabi a saratan a marelmeng so deralen nen Kristo. Sikara la so apasakbayan ya akauna nipaakar ed saya. Sano sayan panderal so nagawa, “nanengneng” da odino nabidbir da so nagagawa. Tan say kaermenan da so peteg ya abalbaleg!

KASIN SI KRISTO SO OMPAWIL ED DALIN?

15. Diad anton dalan so mabetbet ya akausaran na salitan “ipawil”?

¹⁵ Say ipawil et agto kabaliksan a naynay so iyakar na sakey ed literal a pasen. Kanian saray totoon mansasakit so nibagan ‘pinmawil ed bunigas.’ Tan say datin manuley nayarin nibaga ya ‘akapawil ed pakayari.’ Diad miulibay a nengneng, imbaga na Dios ed si Abraham: “Ompawil ak ed sika, diad ontumbok a taon ed onian panaon, tan si Sara so nawalaan na sakey ya anak a laki.” (Genesis 18:14; 21:1) Say ipawil nen Jehova et kabaliksan to so, aliwan literal ya ipapawil, noagta ipaarap to so imano to ed si Sara a gawaen to so insipan to.

16. (a) Diad anton nengneng so ipawil nen Kristo ed dalin? (b) Kapigan so ipawil nen Kristo, tan anto so agawa ed saman?

¹⁶ Diad parehon nengneng, say ipawil nen Kristo et agto kabaliksan a sikato so literal ya ompawil ed sayan dalin. Noag ingen, kabaliksan ton alaen to so pakayari na Panarian ed sayan dalin tan ipaarap to so imano to ed satan. Agto nakaukolan lan taynanan so mangatatawen a  trono to tan peteg nin onakseb ed dalin pian saya so gawaen to. Singa anengneng tayo la ed akaunan kapitulo, ipapanengneng na ebidensya na Biblia a nen taon 1914 K.P. et sinmabi la so panaon na Dios diad ipawil nen Kristo tan ginmapon manuley. Diad saman et nadngel so kelyaw ed tawen: “Natan et sinmabi so kilalaban tan say pakayari tan say panarian na Dios tayo tan say pakauley nen Kristo to.”​—Apocalipsis 12:10.

17. Lapud agnanengneng so ipawil nen Kristo, anto so inter to ta pian naamtaan tayo a sikato la so pinmawil?

¹⁷ Lapud say ipapawil nen Kristo so agnanengneng, kasin wala so dalan na pakapekder a satan so peteg ya agawa? On, wala. Si Kristo a mismo so angiter na nanengneng a “tanda” a nayarin pakaamtaan tayo a sikato la so agnanengneng a presente tan say anggaan na mundo so asingger la. Usisaen tayo itan a “tanda.”

[Tepetepet Parad Panagaral]

[Litrato ed pahina 142]

Inter nen Kristo so laman to a bilang bagat. Aglan balot nayarin bawien to tan magmaliw a too lamet

[Saray litrato ed pahina 144, 145]

Akin ya abaloan nen Maria Magdalena si Jesus a hardinero kayari na inkioli to?

Diad anton laman so kinerew nen Jesus ed si Tomas a pangikarapasan to na lima to?

[Litrato ed pahina 147]

Si Kristo so ompawil ed parehon nengneng na insipot to ed dalin. Diad anton nengneng so insipot to?