Nanengneng a Muyongan na Dios
Kapitulo 23
Nanengneng a Muyongan na Dios
1. Anto so ibabaga na Biblia nipaakar ed nanengneng a muyongan na Dios?
AKIN a sikatayo so maseguro a say Dios so walaan na sakey a nanengneng a muyongan? Sakey a rason et sikato so walaan na agnanengneng a muyongan. Pinalsa nen Jehova iray kerubines, serapines tan dakel niran arum ya angheles a manggawa ed linawa to diad katawenan. (Genesis 3:24; Isaias 6:2, 3; Salmo 103:20) Si Jesu-Kristo so Arkanghel a walad tagey na amin na saraya. (1 Tesalonica 4:16; Judas 9; Apocalipsis 12:7) Dedeskribien na Biblia iray angheles a sikara so organisado ed “saray trono odino inkakatawan odino gobgobierno odino pakauley.” (Colosas 1:16; Efeso 1:21) Amin da so manlilingkor diad panangiganggan nen Jehova, nankakasakey a gagawaen da so kimey a pagagawa to ed sikara.—Daniel 7:9, 10; Job 1:6; 2:1.
2. Panon a say nengneng na impamalsa na Dios ed materyal a talba tayo so mangipanengneng ya inyan to so baleg a kaimportantian ed muyongan?
2 Natalosan tayo met so kaimportantian na impangiletneg nen Jehova na muyongan sano imanoen so materyal iran palsa to. Alimbawa, walaray nilibulibon bilyon a bibitewen ed talba a sikara so nauksoy ed angkabaleg iran ulop a tinawag na galaksi. Sarayan galaksi so manbibiahe ed liwang a mauk-uksoy, tan sirin ontan met ed saray sinansakey a bibitewen tan planeta ed dalem na sarayan galaksi. Say planeta tayon Dalin, alimbawa, et tinaon ya onliliber ed agew, a sikato so sankaasinggeran a bitewen tayo, diad eksakton 365 agew, 5 oras, 48 minutos tan 45.51 segundos. On, say materyal a talba so organisadon tuloy!
3. Anto so ibangat ed sikatayo na maabig a muyongan ed limog na saray agnanengneng a palsa na Dios tan diad materyal a talba to?
3 Kasin sayan makapakelaw a muyongan ed limog na saray agnanengneng a palsa na Dios tan diad materyal a talba to so mangibangat ed sikatayo na bengatla? On, bangatan to itayo a si Jehova so sakey a Dios na organisasyon. Peteg, sirin, say ontan a Dios so agmanaynan ed katooan diad dalin a peteg a mangaaro ed sikato ya andian na panangiwanwan tan organisasyon.
NANENGNENG A MUYONGAN NA DIOS—NENSAMAN TAN NATAN
4, 5. Panoy pikabat tayo ya intonton na Dios so katooan to ed organisadon dalan diad saray agew nen Abraham tan ed nasyon na Israel?
4 Ipapanengneng na Biblia a si Jehova so naynay a mangiwawanwan ed saray ariripen to diad organisadon dalan. Alimbawa, saray totoo na pananisia a singa si Abraham so angitonton ed pamilya ra tan saray ariripen da diad panagdayew ed si Jehova. Impakabat nen Jehova so linawa to ed si Abraham diad impitongtong to ed sikato. (Genesis 12:1) Tan sikato so binilin na Dios a mangipasa ed sayan impormasyon diad arum, a kuanto: “Siak so mikabat ed [si Abraham] pian gangganen to komon so anak ton lalaki tan say sankaabungan to ya ontumbok ed sikato ta pian sumpalen da so dalan nen Jehova.” (Genesis 18:19) Saya so mauksoy ya areglo na sakey a grupo na totoon mandadayew ed si Jehova a manepeg.
5 Saginonor, sanen saray Israelitas so dinmakel ed bilang tan nagmaliw iran minilmilyon, ag-inabuloyan nen Jehova so balang sakey a mandayew ed dilin dalan to, a nibiig a manlapud anggan anton organisadon areglo. Andi, saray Israelitas so atibukel ed sakey a nasyon na organisadon managdayew. Say nasyon na Israel so atawag na “kongregasyon nen Jehova.” (Numeros 20:4; 1 Awaran 28:8) No sika so sakey a tuan managdayew ed si Jehova nensaman, nepeg a sika so kabiangan na saman a kongregasyon na saray managdayew, agnisian ed satan.—Salmo 147:19, 20.
6. (a) Panoy impangipanengneng na Dios a say pabor to so wala ed saray patumbok nen Kristo? (b) Antoy ebidensya a saray Kristianos so organisado ed panagdayew?
6 Anto so kipapasen nen inmunan siglo? Ipapanengneng na Biblia a say pabor nen Jehova so wala ed saray patumbok na Anak ton si Jesu-Kristo. Inkalbo nen Jehova so masanton espiritu to ed sikara. Diad pangipanengneng a sikato natan so manguusar ed sayan Kristianon organisasyon imbes a say nasyon na Israel, inikdan to so arum ya akaunan Kristianos na pakayarin mamaabig ed sakit, mamaoli ed inatey tan manggawa na milagro. Agyo nabasa so Kristianon Griegon Kasulatan ya agkayo nasagyat ed katuaan a saray Kristianos so organisado ed panagdayew. Diad tua, niganggan iran mandaragup nisengeg ed sayan gagala. (Hebreos 10:24, 25) Sirin no sika so sakey a tuan managdayew ed si Jehova nen inmunan siglo, nepeg a sika so kabiangan na Kristianon organisasyon to.
7. Panoy pikabat tayo ya ag-inusar nen Jehova so masulok nen say sakey a muyongan ed anggan anton partikular a panaon?
7 Kasin si Jehova so angusar na masulok nen say sakey a muyongan kaleganan na anggan anton panaon? Diad agew nen Noe si Noe lambengat tan saraman so kaiba to ed dalem na biong so awalaan na pananalimbeng na Dios tan niliktar ed delap. (1 Pedro 3:20) Ontan met, nen inmunan siglo et aliwan duara odino onsulok ni so Kristianon organisasyon. Say Dios so akideneng lambengat ed sakey. Wala lambengat so “sakey a Katawan, sakey a pananisia, sakey a bautismo.” (Efeso 4:5) Ontan met ya impasakbay nen Jesu-Kristo ed agew tayo a wala lambengat so sakey a sengegan na espiritual a bilin a para ed saray totoo na Dios.
8. Panoy impangipanengneng nen Jesus a wala lambengat so sakey a nanengneng a muyongan na Dios ed dalin natan?
8 Sanen ibabaga to so kiwawala to ed pakayari na Panarian, inkuan nen Jesus: “Siopa a peteg so matoor tan makabat ya aripen a tinuro na katawan to a mangasikaso ed sankaabungan to, ya ikdan tora na tagano ed manepeg a panaon? Maliket itan ya aripen sano nasabian na katawan to ya ontan so gagawaen to. Tua kuan ko ed sikayo, sikato so turoen To a mangasikaso ed amin a kayarian to.” (Mateo 24:45-47) Diad impawil to ed pakayari na Panarian nen taon 1914, kasin aromog nen Kristo so sakey a “matoor tan makabat ya aripen” a klase a mangitatarya na espiritual a “tagano,” odino impormasyon? On, aromog to so ontan ya “aripen” a tinibukel na saray nakekeraan ed dalin na 144,000 ya “agagi” to. (Apocalipsis 12:10; 14:1, 3) Tan nanlapulad 1914 minilmilyon a totoo so angawat ed “tagano” ya intarya ra, tan ginapoan dan agamilen so tuan relihyon a kaiba ra. Sayan organisasyon na saray ariripen na Dios so naamtaan a Tastasi nen Jehova.
9. (a) Akin a saray ariripen na Dios so mangitatarok ed ngaran a Tastasi nen Jehova? (b) Akin a saray pasen na panagdayewan da so tinawag da na Kingdom Hall?
9 Saray Tasi nen Jehova so onnenengneng ed Dios tan ed Salita to diad kiwanwan ed amin a gawaen da. Say mismon ngaran da a Tasi nen Jehova so mangipanengneng a say manunan kimey da et say pantasi nipaakar ed ngaran tan panarian nen Jehova a Dios, unong a singa ginawa nen Kristo. (Juan 17:6; Apocalipsis 1:5) Ontan met, tinawag da so pasen na pandaragupan da ed panagdayew a Kingdom Hall lapud say panarian na Dios ed panamegley na Mesias, odino Kristo, so tema na interon Biblia. Lapud malinew a say inmunan-siglon Inkakristiano so walaan na panangabobon na Dios, saray Tasi nen Jehova so angipadron na organisasyon da ed satan. Onnengneng itayon magano ed satan ya inmunan organisasyon tan insan imanoen so piulibayan to ed nanengneng a muyongan na Dios natan.
SAY INMUNAN-SIGLON PADRON
10. Anto niray arum a nengneng na inmunan-siglon Kristianon muyongan?
10 Inerman a walaray Kristianos nen inmunan siglo, sikara so nantitipon ed saray grupo diad panagdayew. Sarayan kongregasyon so nandaragup a maparanay diad panuulop tan panagaral. (Hebreos 10:24, 25) Say manunan kimey da et say pangipulong tan pangibangat nipaakar ed panarian na Dios, unong a singa ginawa nen Kristo. (Mateo 4:17; 28:19, 20) Sanen sakey a membro na kongregasyon so pinmawil ed mauges a panagbilay, sikato so inekal ed kongregasyon.—1 Corinto 5:9-13; 2 Juan 10, 11.
11, 12. (a) Antoy mamaneknek a saray inmunan Kristianon kongregasyon so angawat na panangiwanwan tan panangidirihe a nanlapud saray apostoles tan “mamatatken a lalaki” ed Jerusalem? (b) Anto so kabaliksan na “teokratikon” panangiwanwan? (c) Anto so nansumpalan na saray kongregasyon ya angawat ed ontan a panangiwanwan?
11 Kasin saraman a Kristianon kongregasyon nen inmunan siglo so independente ed balang sakey, a balang sakey so manggawa ed dilin desisyon to ed saray pamaakaran? Andi, ipapanengneng na Biblia a sikara so nankakasakey ed sakey a Kristianon pananisia. Amin a kongregayon so angawat na panangiwanwan tan panangidirihe a manlapud parehon sengegan. Kanian, sanen linmesa so suppiatan ed pamaakaran na galsim, saray kongregasyon odino sinansakey so agnandesidi ed inkasikaran dili ed no anto so gawaen. Andi, noag ingen, si apostol Pablo, Bernabe tan saray arum ni so niganggan ya “onla ed saray apostoles tan mamatatken ed Jerusalem nipaakar ed sayan suppiatan.” Sanen sarayan matatken a lalaki, diad tulong na Salita na Dios tan “masanton espiritu” to, et ginawa ra so desisyon da, imbaki daray matoor a lalakin mangipakabat ed saray kongregasyon.—Gawa 15:2, 27-29.
12 Anto so nansumpalan na impangawat na saray kongregasyon ed sayan teokratiko, odino inter-na-Dios, a panangiwanwan tan panangidirihe? Kuan na Biblia: “Natan legan a sikara [si apostol Pablo tan kakaiba to] so nambiahe ed saray syudades inyawat da ed saraman so wadman a sumpalen iray bilibilin ya inter na saray apostoles tan mamatatken a lalaki a walad Jerusalem. Sirin, peteg, saray kongregasyon so nantultuloy ya apabiskeg ed pananisia tan dinmaak ed bilang ya inagew-agew.” (Gawa 16:4, 5) On, amin a kongregasyon so akitunosan ed desisyon na saman ya ulop na mamatatken ed Jerusalem tan sikara so binmiskeg ed pananisia.
TEOKRATIKON KIWAWANWAN NATAN
13. (a) Manlapud anton pasen ed dalin tan diad panamegley na anton ulop na lalaki so pangaawatan na nanengneng a muyongan na Dios ed panangiwanwan natan? (b) Antoy pisiglaotan na mananguley ya ulop ed “matoor tan makabat ya aripen”?
13 Say nanengneng a muyongan na Dios natan so mangaawat met na teokratikon panangiwanwan tan panangidirihe. Diad hedkuarter na saray Tasi nen Jehova ed Brooklyn, Nueva York, wala so mananguley ya ulop na saray matatken a Kristianon lalaki a nanlapud nanduruman pasen na dalin a mangiiter na nakakaukolan a panangimaton ed sankamundoan a kimey na saray totoo na Dios. Sayan mananguley ya ulop so tinugyop na saray membro na “matoor tan makabat ya aripen.” Sikato so manseserbi a bilang sangiyan na satan a matoor ya “aripen.”
14. Diad anto so pansasaralan na mananguley ya ulop na totoo na Dios diad panggagawa to ed saray desisyon?
14 Saray lalaki ed satan a mananguley ya ulop, a singa saray apostoles tan matatatken a lalaki ed Jerusalem, so atalitali la ed dakel iran taon diad serbisyo ed Dios. Balet sikara so ag-onsasaral ed kakabatan na too diad panaggawa ed saray desisyon. Andi, lapud teokratikon kauuleyan, tutumboken da so ehemplo na inmunan mananguley ya ulop ed Jerusalem, a saray desisyon da so nibase ed Salita na Dios tan nagagawa diad leksab na panangidirihe na masanton espiritu.—Gawa 15:13-17, 28, 29.
PANANGIWANWAN ED SANKAMUNDOAN A MUYONOAN
15. Akin a saray salita nen Jesus ed Mateo 24:14 so mangipanengneng a say Dios so nawalaan na baleg a muyongan ed dalin kaleganan na panaon na anggaan?
15 Inter nen Jesu-Kristo so ideya ed kabaleg na muyongan na Dios ed dalin legan na sayan panaon na anggaan sanen inkuanto: “Sayan maong a balita na panarian so nipulong ed amin ya atooan a dalin ya onkanan pantasi ed amin a nasyones; tan insan onsabi so anggaan.” (Mateo 24:14) Isipen so baleg a kimey a nakaukolan diad pangibaga ed nilibon-milyon a totoo ed dalin nipaakar ed niletneglan panarian na Dios. Kasin say modernon-agew a muyongan ya onnenengneng ed mananguley ya ulop nipaakar ed kiwanwan tan kidirihe, so akinlongan a manggawa ed sayan baleg a kimey?
16. (a) Akin a saray Tasi nen Jehova so angiletneg na dakel iran angkakabaleg a pabrika na imprintaan? (b) Anto so napapawala ed sarayan pabrika?
16 Saray Tasi nen Jehova natan so mangipupulong ed mensahe na Panarian diad masulok a 200 daldalin tan pulpulo na dayat ed sankadalinan. Pian natulongan so masulok a 3,500,000 manangipalapag na Panarian (nen 1988) a manumpal ed sayan kimey, saray angkabaleg a pabrika na imprintaan so niletneg ed dakel iran bansa. Saray Biblia tan literatura na Biblia so napapawala dia ed dakerakel iran bilang. Kada panagkimey ya agew, ed promedio, masulok a duaran milyon a Watchtower tan Awake! a magasin so nipiprinta tan nipapatulor a manlapud sarayan pabrika.
17. (a) Akin a sayan literatura na Biblia so niparaan? (b) Anto so akaimbitaan mon gawaen?
17 Amin na sayan literatura na Biblia so nipaparaan ta pian natulongan iray totoon ombulaslas diad pikakabat ed engrande ran gagala nen Jehova. Diad tua, saray salitan “Mangipapalapag na Panarian nen Jehova” so kabiangan na titulo na magasin a Say Panag-Bantayan. Sika so naimbitaan a mibiang diad pangibunog ed sayan literatura na Biblia tan diad pangipaliwawa ed arum ed saray katuaan a kinarga na Biblia. Alimbawa, kasin wala so nayarian mon pangipanabangan na makanan impormasyon a naaralan mo ed libron, Makapambilay Kayo na Ando lan Ando ed Paraiso diad Dalin?
18. (a) Anton nengneng na muyongan so muyongan na Dios natan? (b) Akin a saray totoo na Dios natan so mankaukolan na daakan a panamaseseg?
18 A singa nen inmunan siglo say muyongan na Dios natan so sakey ya organisasyon na saray dedikado tan bautismadon managpulong na Panarian. Tan satan so niletneg ya ontulong ed amin a membro to a mibiang ed sayan kimey na panagpulong. Sarayan totoo so mankaukolan na baleg a panamaseseg tan espiritual a panamabiskeg, lapud si Satanas tan saramay nayarian ton impluensyaan so onsumpa ed mensahe na Panarian. Saratan a sumusumpa so amapatey ed si Jesus diad impangipulong to ed satan, tan ipapasakbay na Biblia a saray patumbok to so napasegsegang met.—Juan 15:19, 20; 2 Timoteo 3:12.
19. (a) Siopa so nitarya natan ya ontulong tan mamabiskeg ed totoo na Dios? (b) Panon a say kongregasyon so asalimbengan a manlapud mauges iran impluensya a nayarin maneral ed satan?
19 A singa nen inmunan siglo ontan met natan a saray “mamasiken,” odino mamatatken, so aturon ontulong tan mamabiskeg ed kada kongregasyon. Nayarian da ka met a tulongan diad simbawa na Biblia a manalona ed saray nanduruman problema. Sarayan mamatatken so manasalimbeng “ed pulok na Dios.” Sirin, no say sakey a membro na kongregasyon so ompawil ed mauges a dalan na bilay tan agto labay so manguman, saray “mamasiken” so mangimano a satan so nepeg a papawayen, odino ekalen, a manlapud kongregasyon. Sirin napansiansia so mabunigas, malinis ed espiritual a kongregasyon.—Tito 1:5; 1 Pedro 5:1-3; Isaias 32:1, 2; 1 Corinto 5:13.
20. (a) Siopa nen inmunan siglo so imbaki na mananguley ya ulop ed Jerusalem, tan nisengeg ed anton rason? (b) Siopa so imbaki na mananguley ya ulop natan?
20 Ontan met, a singa say mananguley ya ulop ed Jerusalem so angibaki na nikabiig iran manangilaman, singa si Pablo tan Silas, a mangitulor ed saray bilibilin tan mamaseseg ed totoo na Dios, ontan met so gagawaen natan na mananguley ya ulop ed sayan panaon na anggaan. (Gawa 15:24-27, 30-32) Ngalngalin mamiddua ed sakey taon a say sakey ya atalitalin ministro, a tinawag na manangasikaso na sirkito, so nidirihen mangusar na sakey a simba ed kada kongregasyon diad sirkito to.
21. Panon so itulong na saray manangasikaso na sirkito ed saray kongregasyon na totoo na Dios?
21 Wala so masulok a 60,000 kongregasyon na saray Tasi nen Jehova ed sankamundoan, tan saraya so naapag ed saray sirkito a tibukelen na ngalngalin 20 kongregasyon so kada sakey. Sano ondalaw ed saray kongregasyon ed sirkito to, say manangasikaso na sirkito so mamabiskeg ed saray tastasi na Panarian diad piulop to’d sikara ed panagpulong tan panaggaway-babangatan a kimey. Nilikud ed panagyat to ed sikara ed onian nengneng, iter toray suhestion ya ontulong ed sikaran mamaaligwas ed ministeryo ra.—Gawa 20:20, 21.
22. (a) Anton malaknab nin areglo diad panamabiskeg ed saray totoo na Dios so nagagawan mamiddua ed sakey taon? (b) Anton imbitasyon so ninatnat ed sika?
22 Nitarya so malaknab nin panamaseseg tan panamabiskeg, gendagendat a mamiddua ed sakey taon, a saray kongregasyon ed kada sirkito so mandaragup a para ed sakey- o duaran-agew ya asamblea. Diad sarayan okasyon et nayarin wala so duan lasus odino talon lasus ya anggad 2,000 o masulok nin totoo. Sika so naimbitaan ya onatendi diad ontumbok ya asamblea ed lugar yo. Naseguro mi a naromog mo so asamblea a makarepresko ed espiritual tan personal a makagungguna.
23. (a) Anto niran arum a pantitipon so nagagawan maminsan ed kada taon? (b) Anto so kabaleg na sakey ed sarayan kumbension?
23 Insan, maminsan ed sakey taon, nagagawa so mas babaleg a pantitipon a tinawag na kumbension distrito diad loob na pigaran agew. Akin ya agpambanikelan so iyatendi tan nengnengen ya agaylan makapaliket tan makatumang ed espiritual so ontan iran kumbension? Arum iran taon, imbes a saray kumbension distrito, wala so babaleg iran nasyonal odino internasyonal a kumbension. Say sankabalgan ya agawa ed sakey a pasen et diad Yankee Stadium tan Polo Grounds ed Syudad na Nueva York diad loob na waloran agew nen 1958. Diad saman et 253,922 so totoon wadman diad paliwawa ed publikon “Manuuley La So Panarian na Dios—Kasin Asingger La So Anggaan na Mundo?” Nanlapulad saman et anggapo so pasen a magenap a mangarga ed ontan lan kabaleg na ulop, kanian saray oksuyan so nagagawa ed saray pasilidad diad dakel iran angkabaleg a syudad ya usaren a para ed saray angkabaleg a kumbension.
SARAY MITING ED KONGREGASYON
24. Anton limaran sinimban pantitipon so gagawaen na saray kongregasyon na totoo na Dios?
24 Say mananguley ya ulop na saray Tasi nen Jehova so mangiyuuksoy met ed nankakasakey a programa na panagbangat ed Biblia a nagagawa ed amin na saray kongregasyon na totoo nen Jehova. Kada kongregasyon so walaan na limaran miting ed kada simba. Saraya et say Eskuelaan na Teokratikon Ministeryo, Tipon ed Panagserbi, Miting Publiko, panagaral ed Panag-Bantayan tan say panagaral na libro ed kongregasyon. Lapud sika so agni mikabisado ed sarayan miting, sikara so ipaliwawa min magano.
25, 26. Anton gagala so serbian na Eskuelaan na Teokratikon Ministeryo tan say Tipon ed Panagserbi?
25 Say Eskuelaan na Teokratikon Ministeryo so nigana a panulong ed saray estudyante pian magmaliw a lalon epektibo diad panungtong ed arum nipaakar ed panarian na Dios. Panapanaon, saramay nampalista so mangiter na antikey a paliwawa ed saray tema na Biblia ed interon grupo. Insan sakey ya atalitalin matatken so mangiter na suhestion ed pamaaligwas.
26 Gendagendat a diad parehon panaon a say Tipon ed Panagserbi so nagawa met. Say datak na sayan miting so nipalapag ed Ministeryo Tayo Ed Panarian, binulan a palapagan na duara o onsulok nin pahina ya inyuksoy na mananguley ya ulop. Legan na sarayan miting nipresenta so praktikal iran suhestion tan demostrasyon diad saray epektibon dalan na pitotongtong ed arum nipaakar ed mensahe na Panarian. Mipadpara, pinaseseg nen Jesus iray patumbok to tan binilin tora no panon so panumpal da ed ministeryo ra.—Juan 21:15-17; Mateo 10:5-14.
27, 28. Anto ran nengneng na tipon so Miting Publiko, panagaral na Panag-Bantayan tan saray panagaral na libro ed kongregasyon?
27 Say Miting Publiko tan ontan met ed panagaral na Panag-Bantayan so gendagendat a nagagawa ed Simba. Nagagawa so nikaduman sagpot diad panangimbita ed saray balobalon interesadon totoo diad Miting Publiko, a sikato so paliwawa ed Biblia na sakey a kualipikadon ministro. Say panagaral ed Panag-Bantayan so tepet-tan-ebat a diskusyon ed sakey ya artikulo na Biblia a nipresenta ed agano nin paway na magasin a Panag-Bantayan.
28 Manwarin say interon kongregasyon so mandaragup ed sakey a Kingdom Hall a para ed saray miting a nidatak ed tagey, saray angkelag a grupo so mantitipon ed saray pribadan abung a para ed sinimban panagaral na libro ed kongregasyon. Sakey a katulongan ed panagaral na Biblia, a singa sayan libro a babasaen mo, so nausar a letnegan diad satan a diskusyon ed Biblia, a nayarin sakey oras ed karukey.
29. (a) Anton memoryal so seselebraan na saray tuan Kristianos a kada taon? (b) Siopa so manepeg a mibiang ed tinapay tan say alak?
29 Niarum ed sarayan maparanay a miting, saray Tasi nen Jehova so manggagawa na nikabiig a miting ed kada taon diad anibersaryo na impatey nen Jesus. Sanen sayan pakanodnonotan na impatey to so inmunan inyuksoy, inkuan nen Jesus: “Saya so itultuloy yon gawaen a pakanodnonotan ed siak.” (Lucas 22:19, 20) Legan na sakey a simplin seremonya inusar nen Jesus so alak tan andi-lebaduran tinapay bilang simbolo na bilay a ngalngali to lan ibagat a para ed katooan. Sirin diad sayan tinaon a pangdem ed Memoryal a saray nakekeraan ed dalin na 144,000 ya alanaan a patumbok nen Kristo so mangipanengneng na mangatatawen ya ilalo ra diad pangan da ed tinapay tan alak.
30. (a) Siopa ni so nepeg ya onatendi ed Memoryal, tan anto so ilalo ra? (b) Panon so impaneskribe nen Jesus ed ontan iran totoo?
30 Saray nilaksalaksa nin arum ya onaatendi ed sayan Memoryal ed saray Kingdom Hall diad sankadalinan so maliket iran manag-imaton. Sikara met so napanonotan ed ginawa nen Jehova a Dios tan si Jesu-Kristo diad kiliktar da a manlapud kasalanan tan patey. Balet imbes a sikara so manilalo ed mangatatawen a bilay, sikara so manliket diad panilalo a manbilay na ando lan ando ed paraiso diad dalin. Sikara so singa si Juan a Managbautismo, a sinalita to so inkasikato a bilang sakey a “kaaro na nobyo” imbes a kabiangan na atugyop a nobya nen Kristo a 144,000 iran membro. (Juan 3:29) Sarayan nilaksalaksan totoo so kabiangan na “arum a karnero” a sinalita nen Jesus. Sikara so aliwan membro na “melag a pulok.” Anggaman kuan, a singa imbaga nen Jesus, sikara so manseserbin mikakasakey ed saraman so “melag a pulok,” ta pian amin so “magmaliw a sakey a pulok.”—Juan 10:16; Lucas 12:32.
MANLINGKOR ED DIOS A KAIBA SO MUYONGAN TO
31. Anto so ebidensya a say Dios et agto abobonan iraman so mansiansian kabiangan na palson relihyon tan ingen salien da so magmaliw a kabiangan na muyongan to?
31 Agaylan mabitar, singa nensaman, a si Jehova so walaan na nanengeng a muyongan natan! Sikato so uusaren to diad pangipasal ed totoo a para ed bilay diad matunong a balon sistema to. Anggaman kuan, agtayo nayarian so magmaliw a kabiangan na muyongan na Dios, tan ontan met, et magmaliw a kabiangan na palson relihyon. Ibabaga na Salita na Dios: “Agmipapako ed saray agmananisia, ta anto ta so piulop na inkatunong ed kaugsan? Odino anto ta so pibibiang na liwawa ed bilunget? . . . Odino anto ta so pinanabang na sakey a toon matoor ed sakey ya agmananisia?” Kanian ingganggan na Dios: “Sirin ompaway kayo ed limog da, tan ibiig yo so inkasikayo.”—2 Corinto 6:14-17.
32. (a) No sikatayo so “ompaway ed limog da,” anto so nepeg tayon gawaen? (b) Anton bendisyon so awaten tayo no alaen tayo so positibon kiwas a manserbi ed Dios a kaiba so nanengneng a teokratikon muyongan to?
32 Anto so labay ya ibaga na “ipaway ed limog da”? Bueno, agtayo naunor itan a ganggan diad pansiansian sakey a kabiangan, odino pangiter na suporta, ed sakey a relihyoson muyongan imbes a say sakey ya uusaren nen Jehova a Dios. Sirin no anggan siopa ed sikatayo so kabiangan ni na ontan a relihyoson muyongan, nakaukolan tayon ipakabat so itaynan ed satan. No sikatayo la so pinmaway ed saratan a mangaagamil na palson relihyon tan kinmiwas lan positibo a manlingkor ed Dios a kaiba so nanengneng a teokratikon muyongan to, sikatayo so kaiba na saraman so pangibabagaan na Dios: “Siak so manayam ed limog da tan manakar ed limog da tan siak so Dios da, tan sikara so baley ko.”—2 Corinto 6:16.
[Tepetepet Parad Panagaral]
[Litrato ed pahina 192]
Diad panaon na Delap, kasin say Dios so awalaan na masulok nen sakey a muyongan?
[Saray litrato ed pahina 196]
SANKAMUNDOAN A HEDKUARTER NA SARAY TASI NEN JEHOVA
SARAY OPISINA
Saray Sistema na Komputer
IMPRINTAAN ED BROOKLYN
Imprintaan a Rotary
Panag-apisan na Libro
Shipping
[Saray litrato ed pahina 197]
PIGARA ED SARAY DAKEL YA IMPRINTAAN NA WATCH TOWER
Brazil
Inglatera
South Africa
Wallkill, Nueva York
Canada
[Saray litrato ed pahina 198]
Arum ed saray 253,922 diad sakey a kumbension na saray Tasi nen Jehova ed Nueva York
Polo Grounds
Yankee Stadium
[Litrato ed pahina 201]
Sakey a programa ed panagbangat na Biblia so panggagayagaan ed saray miting na Tasi nen Jehova
