Kapitulo 10

Saray Marelmeng ya Espiritu So Mabiskeg

1. Akin a dakel a totoo so manisian makapitongtong ira ed inatey?

 MABETBET ya ibaga na totoo ya akapitongtong ira ed inatey. Inkuan nen inatey lan James A. Pike, a prominentin obispo na Episcopal, ya akapitongtong ed inatey ya anak to, si Jim. Unong ed si Pike, inkuan na anak to ed sikato: “Wala so dakel a totoo ed kaliberliber ko, tan walaray liman mangiyaatagey ed siak, a singa inkuan . . . Siak so aliwan maliket anggad nibagak ed sikayo.’’

2. (a) Akin ya anggapo so makapitongtong ed inatey? (b) Sirin anto ran tepet so apalesa?

² Lapud say ontan iran eksperiensia so kaslakan, mapatnag a dakel iran totoo so akapitongtong ed sakey a manlapud espiritun mundo. Ingen ta sikara so ag-akapitongtong ed inaatey. Malinlinew so Biblia sanen inkuanto: “Nipaakar ed saray inaatey, sikara so agbalot makalikna.’’ (Eclesiastes 9:5) Sirin no aliwan saray inaatey so mansasalita a manlapud maespiritun mundo, siopa so mansasalita? Siopa so mankunkunwarin inaatey a totoo?

3. (a) Siopa ra so mankunkunwarin inaatey a totoo, tan akin? (b) Diad siopa so mabetbet a pangiteran na saray marelmeng ya espiritu na impormasyon.?

³ Saray marelmeng ya espiritu. Sarayan espiritu, odino dedemonyo, et saray angheles ya akiulop ed si Satanas diad impanrebelde ed Dios. Akin a mankunkuanan a sikaray totoon inaatey? Sikato so pangiyabante ed ideya a saray inaatey so siansia nin manbibilay. Saray marelmeng ya espiritu so angitonton met ed dakel a manisia ed tila a say patey so sakey lambengat a panguman ed sananey a bilay. Pian nikayat iyan katilaan, saray marelmeng ya espiritu so amawala ed saray espiritun medyum, managpalar tan managsalamangka a walaan na nikadkaduman pikakabat a singa nanlapu lambengat ed totoon inatey la.

NANKUNWARIN SIKATO SO INATEY A SAMUEL

4. (a) Akin a si Arin Saul so pakaskasin onkerew na tulong? (b) Anto so ganggan na Dios nipaakar ed saray espiritun medyum tan ed saray managsalamangka?

⁴ Wala so sakey ya ehemplo ed Biblia na marelmeng ya espiritun  nankunwarin sikato so inatey a propeta na Dios, si Samuel. Saya so koma-40 taon ya uley nen Arin Saul. Tinmatdang so mabiskeg ya armada na Pilisteos a sumpad Israelitan armada nen Saul, tan sikato so ataktakot a tuloy. Kabat nen Saul so ganggan na Dios: “Agkayo onaarap ed saray espiritun medyum tan agkayo ontetepleg ed saray managsalamangka, pian agkayo natilolan ed sikara.’’ (Levitico 19:31) Sinmabi panaon, anggaman kuan, binmeneg si Saul ed si Jehova. Kanian si Samuel, a diad saman et mabilay ni, so agla malabay a minengneng ed si Saul. (1 Samuel 15:35) Tan natan, diad sayan panaon na gonigon, binmeleng a tuloy si Arin Saul lapud agla dengelen nen Jehova so ikerew to na tulong.

5. (a) Iner so kinerewan nen Saul na tulong? (b) Anto so ayarian a gawaen na espiritun medyum?

⁵ Si Saul so magunaet a makaamta ed nagawa kanian sikato so linma ed sakey ya espiritun medyum ed En-dor. Ayarian ton pawalaen so indengan na sakey a toon labay ton nanengneng. Diad salaysay to ed indengan, abidbir nen Saul a sikato si “Samuel.’’ Diad saya say espiritun persona, a nankunwarin si Samuel, so nansalita: “Akin a siak so ginonigon mo diad impangiyakar mo dia ed siak?’’ Inmebat si Saul: “Naermenan ak a mapalalo unong ta saray Pilisteo so mibabakal a sumpad siak.’’ Inmebat so espiritun persona: “Akin, sirin, a mantepet ka ed siak anta si Jehova a mismo so tinmaynan ed sika tan nagmaliw a kabusol mo?’’ Say marelmeng ya espiritun persona, a nankunwarin sikato so inatey a Samuel, so angibaga ed si Saul a sikato so ompatey diad pibakal ed saray Pilisteo.​—1 Samuel 28:3-19.

6. Akin ya agnayarin si Samuel so akitongtong ed si Saul?

⁶ Mapatnag, peteg ya aliwan si Samuel so apitongtongan na  espiritun medyum. Inatey la si Samuel, tan diad ipapatey say sakey a too so “ompawil ed dalin to; diad saratan ya agew saray nonot to so natawtaw.’’ (Salmo 146:4) Say daiset a panmorekdek ed pamaakaran so malaknab nin mangipanengneng a say boses so aliwan peteg a boses nen inatey a Samuel. Si Samuel so propeta na Dios. Kanian sinumlang toray espiritun medyum. Tan, singa anengneng tayo la, legan a sikato ni mabilay et agto labay so mitongtong ed si matungangan Saul. Kanian, sirin, no si Samuel so mabilay ni, kasin abuloyan to so sakey ya espiritun medyum a miabet ed sikato? Isipen pa: Agla labay nen Jehova ya ikdan si Saul na anggan anton impormasyon. Kasin napilit na sakey ya espiritun medyum si Jehova a mangiter ed si Saul na sakey a mensahe ed panamegley nen inatey lan Samuel? Tan no say mabilay et peteg a makapitongtong ed saray inaatey ya inad-aro, peteg a say sakey a Dios na aro so agmangibaga a sikara so nagmaliw ya “agmalinis’’ lapud intepleg ed sakey ya espiritun medyum.

7. Anton pasakbay so inter na Dios a manalimbeng ed totoo to a sumpad saray marelmeng ya espiritu?

⁷ Say katuaan et saray marelmeng ya espiritu so mamasakit ed totoo, kanian nampasakbay si Jehova diad panalimbeng ed ariripen to. Basaen so onggendan a pasakbay ed nasyon na Israel. Ikdan to kayo na sakey ya ideya ed saray metodo ya uusaren na saray demonyo a pangibalang ed totoo. Kuan na Biblia: “Agkomon naromog ed sika . . . so anggan siopan mangagamil na panagparles, panag-agamil na mahika odino anggan siopan ontepleg ed saray managsuma odino managsalamangka, odino manangipelag odino siopaman ya ontepleg ed espiritun medyum odino managpasakbay ed saray nagawa odino siopaman a mitongtong ed saray inaatey. Ta siopaman a manggagawa ed sarayan bengatla so bengatlan makapadimla ed si Jehova.’’ (Deuteronomio 18:10-12) Nepeg tayon amtaen no anto so gagawaen na saray marelmeng ya espiritu a pamasakit ed totoo natan tan no panon so panalimbeng tayo ed inkasikatayo a manlapud sikara. Balet sakbay  ya aralen tayo ya, imanoen tayo no kapigan tan no panon so inggapo na saray marelmeng ya espiritu.

ANGHELES A NAGMALIW IRAN MARELMENG YA ESPIRITU

8. (a) Siopa met so atangguyor nen Satanas a manrebelde ed Dios? (b) Kayari na impangitunda ra na kimey da ed tawen, iner so nila ra?

⁸ Diad impantila ed si Eva diad tanamanan na Eden, ginawa na sakey a pinalsan anghel so inkasikaton marelmeng ya espiritun Satanas a Diablo. Kabekta sinali ton tangguyoren so arum ya angheles met ya onsumpa ed Dios. Sikato so tinmalona. Arum ya angheles so tinmundan nanggawa ed kimey ya inter na Dios ed sikaran gawaen ed tawen, tan inmakseb ira ed dalin tan ginawa ra so inkasikaran silalaman a singa saray totoo. Insulat nen Kristianon babangatan a Judas so nipaakar ed sikara sanen binitla to “iray angheles ya agda impansiansia so gendat a kipapasen da noagta tinaynanan da so dilin manepeg a pasen ya ayaman da.’’ (Judas 6) Akin a sikaray linmeksab ed dalin? Anton mauges a pilalek so inkarga nen Satanas ed puso ra pian natangguyor toran taynanan da so maabig a puesto ra ed tawen?

9. (a) Akin a saray angheles so inmakseb a nanlapud tawen? (b) Panoy pangipanengneng na Biblia a say ginawa ra so mauges?

⁹ Ibaga’d sikatayo na Biblia sanen inkuanto: “Saray anak na tuan Dios so akaimano ed saray anak a bibii na lalaki, a sikara so magaganggana; tan inasawa da ra, salanti, amin a pinili ra.’’ (Genesis 6:2) On, insulong na saray angheles so laman, tan sikara so inmakseb ed dalin a mirelasyonan ed sekso diad saray magagangganan bibii. Balet say ontan ya arowan so mauges ed saray angheles. Saya so gawa na katutunganga. Ipanengneng na Biblia a say ginawa ra so mauges a singa say gawan homoseksual na totoo ed Sodoma tan Gomorra. (Judas 6, 7) Anto so nansumpalan?

10, 11. (a) Anto ran klase na ananak so pinawala na saray angheles? (b) Anto so agawa ed saray alan sanen sinmabi so Delap? (c) Anto so agawa ed saray angheles diad panaon na Delap?

 ¹⁰ Bueno, nianak iray ugugaw ed sarayan angheles tan saray kaasawaan da. Balet saray ugugaw so nikadkaduma. Sikaray binmalbaleg ya anggad nagmaliw iran alan, on, marelmeng iran alan. Tinawag ira na Biblia na “mabibiskeg nensaman, saray bantog a lalaki.’’ Sarayan alan so analin mangipaskar ed siopaman na pagmaliw a mauges a singa sikara. Bilang nansumpalan, kuan na Biblia a “say kaugsan na too so daakan ed dalin tan amin a kanonotan na puso to so mauges lambengat ed amin a panaon.’’ (Genesis 6:4, 5) Kanian intarok nen Jehova so Delap. Saray alan, odino “Nephilim,’’ tan amin a totoon marelmeng so nalner. Balet anto so agawa ed saray angheles ya inmakseb ed dalin?

¹¹ Ag-ira nalner. Nilukpos da so laman ya insulong da tan pinmawil ira ed tawen bilang espiritun persona. Balet agla ra naabuloyan a magmaliw a kabiangan lamet na organisasyon na saray masanton angheles na Dios. Imbes, ibabaga na Biblia a “say Dios et agto inkibot so impanusa ed saray angheles a nankasalanan, balet, imbantak tora  ed Tartaro, inyawat tora ed kaaralman na makdel a kabilungetan a nigana ed panangukom.’’​—2 Pedro 2:4.

12. (a) Anto so agawa ed saray marelmeng ya angheles sanen sikara so pinmawil ed tawen? (b) Akin ya agda la nisulong so atooan a laman lamet? (c) Kanian anto so gagawaen da natan?

¹² Saray marelmeng ya angheles so agnibantak ed sakey a literal a pasen a tinawag na Tartaro. Noag ingen, say Tartaro, a lingon impatalos na arum a Biblia ya “impierno,’’ so manutukoy ed nipabpaabeba odino naplag a kipapasen na saray angheles. Sikaray apegpeg a manlapud espiritual a liwawa na organisasyon na Dios, tan manaalagar labat ed sikara so andi-anggaan a kadederal. (Santiago 2:19; Judas 6) Nanlapulad panaon na Delap, agla inabuloyan na Dios irayan demonyon angheles a mangisulong na inkalaman, pian agda la direktan napenek so aliwan natural a pilalek da ed sekso. Ingen siansian sarag dan agamilen so mapeligron pakayari ed saray lalaki tan bibii. Diad tua, diad tulong na sarayan demonyo et “papalikdoen [nen Satanas] so interon panaayaman a dalin.’’ (Apocalipsis 12:9) Say baleg ya indaak natan na krimen ed sekso, karawalan tan arum niran kaugsan so mangipanengneng ed pankaukolan tayo na pambantay a sumpad panamalikdo ra.

NO PANON SO PAMAPALIKDO NA MARELMENG IRAN ESPIRITU

13. (a) Panoy pamapalikdo na marelmeng iran espiritu? (b) Anto so espiritismo, tan anto so ibabaga na Biblia nipaakar ed satan?

¹³ Naaralan tayo lan akauna a si Satanas, a bilang “say dios na sayan sistema na bengabengatla,’’ so manguusar ed saray minumundon gobierno tan palson relihyon pian bulagen to so totoo ed saray katuaan na Biblia. (2 Corinto 4:4) Sananey ya importantin dalan a pamapalikdo na marelmeng iran espiritu ed lalaki tan bibii et diad panamegley na espiritismo. Anto so espiritismo? Sikato so piuumen ed saray marelmeng ya espiritu, balanglan direkta odino diad panamegley na sakey a toon medyum. Itarok na espiritismo so sakey a too ed impluensya na saray demonyo. Papasakbayan itayo na Biblia ya onarawi ed amin ya agagamil a misiglaotan ed espiritismo.​—Galacia 5:19-21; Apocalipsis 21:8.

14. (a) Anto so dibinasyon? (b) Anto so ibabaga na Biblia nipaakar ed satan?

¹⁴ Say dibinasyon so sankaslakan a porma na espiritismo. Sikato so agamil ed panalin pangamta ed arapen, odino nipaakar ed bengatlan agkabat, diad tulong na saray agnanengneng ya espiritu. Saya so impanengneng na samay insulat nen Kristianon babangatan a Lucas: “Sakey a biin aripen a walaan na espiritu, sakey a demonyo na dibinasyon, so angabet ed sikami. Inter to ed saray kakatawan to so  dakel a nalmo to diad panag-agamil ed dunong na panagparles.’’ Ayarian nen Pablo ya imbulos so bii a manlapud pakayari na sayan marelmeng ya espiritu, tan agto la nayarian so manparles ed arapen.​—Gawa 16:16-19.

15. (a) Anto so arum ed saray bengatlan misiglaotan ed espiritismo? (b) Akin a say panggawa ed ontan iran bengatla so mapeligro?

¹⁵ Dakel a totoo so interesado ed espiritismo lapud sikato so misteryoso tan makapakelaw. Sikara so sagyaten to. Kanian sikaray miumen ed saray managsalamangka, voodooismo, hipnotismo, mahika, astrolohya, saray Ouija boards odino arum nin bengatlan misiglaotan ed espiritismo. Nayarin basaen daray libro nipaakar ed sarayan bengatla odino onla’d saray sine, odino manbantay ed saray programa na telebisyon nipaakar ed saratan. Nayarin sikara ni so onla ed sakey a panduruypo a ditan et gawaen na sakey a medyum so pitongtong ed maespiritun mundo. Balet amin na saya so aliwan makabat ed sakey a toon labay ton panlingkoran so tuan Dios. Satan met so mapeligro. Mangipaarap ed peteg a gonigon natan. Ontan met, ukomen na Dios tan deralen to so amin a manag-agamil na espiritismo.​—Apocalipsis 22:15.

16. Panoy pangipanengneng na Biblia a saray Kristiano so walaan na pibabakal a sumpad marelmeng ya espiritu?

¹⁶ Anggan sano gawaen na sakey a too so anggaan na nayarian ton makalukpos a manlapud espiritismo, siansia nin sikato so walad silong na panangataki na saray marelmeng ya espiritu. Nanonotan a say boses na Diablon mismo so nadngel nen Jesu-Kristo, a tutuksoen ton manumlang ed ganggan na Dios. (Mateo 4:8, 9) Arum ya ariripen na Dios so nanaataki na ontan. Inkuan nen apostol Pablo: “Walaan itayo na pitutulot . . . sumpad saray marelmeng ya espiritun puersa ed mangatatawen iran pasen.’’ Kabaliksan na saya ya amin ya aripen na Dios so nepeg a “mangisulong ed nagnap a kinlong na pibabakal a manlapud Dios, pian nayarian [to] so onsumpa.’’​—Efeso 6:11-13.

SUMPAEN IRAY PANANGATAKI NA MARELMENG YA ESPIRITU

17. Anto so nepeg yon gawaen no mitongtong so sakey a “boses’’ a manlapud maespiritun mundo ed sikayo?

¹⁷ Anto so nepeg yon gawaen no sakey a “boses’’ a manlapud maespiritun mundo so mitongtong ed sikayo? Anto no say “boses’’ so mankunwarin sikato so inatey a kanayon odino sakey a maong ya espiritu? Bueno, anto so ginawa nen Jesus sanen say “manuley na saray demonyo’’ so akitongtong ed sikato? (Mateo 9:34) Inkuanto: “Arawi ka, Satanas!’’ (Mateo 4:10) Nagawaan yo met so ontan. Ontan met, nayarian yo so ontawag ya onkerew na tulong ed si Jehova.  Manpikasin maksil tan usaren so ngaran na Dios. Nonoten a sikato so mas mabiskeg nen saray marelmeng ya espiritu. Tumboken iyan makabat a kurang. Ag-ontatalineng ed ontan iran boses a manlapud maespiritun mundo. (Uliran 18:10; Santiago 4:7) Agkabaliksan na saya a siopaman a makadngel na saray “boses’’ so manlalapud saray demonyo. No maminsan say pakadngel na saray boses so nasuysuy ed bengatlan beblay a pisikal odino diad kanonotan.

18. Anton ehemplo na saray inmunan Kristiano ed Efeso so maabig ed sakey a tumboken no labay na sakey a too so nalukpos a manlapud espiritismo?

¹⁸ Nayarin aminsan et akibabali kayo ed agamil na espiritismo tan labay yo la natan so makalukpos. Anto so gawaen yo? Bueno, imanoen so ehemplo na saray inmunan Kristiano ed Efeso. Kayari na impangawat da ed “salita nen Jehova’’ ya impulong nen apostol Pablo,  kuan na Biblia: “Dakel ed saraman so angagamil na mahika so angawit ed saray libro ra tan pinuulan da ra ed arap na amin.’’ Tan sarayan libro so mankantidad na 50,000 piraso na pilak! (Gawa 19:19, 20) Diad pangalig ed saraman so nagmaliw a patumbok nen Kristo ed Efeso, no walaan kayo na saray kagawaan a direktan misiglaotan ed espiritismo makabat a kurang so paneral ed saratan anggan panon so kablian da.

19. (a) Anto so agkabat na maslak a totoon mangaagamil na espiritismo? (b) No labay tayo so manbilay na ando lan ando ed liket diad dalin, anto so nepeg tayon gawaen?

¹⁹ Lapud wala so ontan lan interes natan ed makapakelaw tan misteryo, lalon dakel a totoo so mangaagamil na espiritismo. Maslak ed sarayan totoo, anggaman kuan, so agmikabat a sikara so peteg a mitatalosan ed marelmeng iran espiritu. Saya so aliwan inosenten ligliwa. Saray marelmeng ya espiritu so walaan na pakayarin mamasakit tan manesyang. Sikara so masebeg. Tan, sakbay a sikaray ipangaw nen Kristo ed kadederal diad ando lan ando, gagawaen da so anggaan na nayarian da ya isilong so totoo ed marelmeng a pakayari ra. (Mateo 8:28, 29) Kanian no labay yo so manbilay na ando lan ando ed liket diad dalin kayari kaekal na amin a karelmengan, nakaukolan yo so onlukpos ed pakayari na demonyo diad iyarawi ed amin a nengneng na espiritismo.

[Tepetepet Parad Panagaral]

[Litrato ed pahina 91]

Diad siopa so akitalosan na espiritun medyum ed En-dor?

[Saray litrato ed pahina 92, 93]

Saray anghelikon anak na Dios so akaimano ed saray anak a bibii na totoo

[Litrato ed pahina 94]

Saray nankinon-toon angheles so agnalner. Nilukpos da so silalaman a kabalgan da tan pinmawil ed tawen

[Litrato ed pahina 97]

Ipapasakbay na Biblia: ‘Mansiansian bulos a manlapud amin a nengneng na espiritismo’

[Litrato ed pahina 98]

Saramay nagmaliw a Kristiano ed Efeso so amool ed saray libro ra ed espiritismo​—maabig ya alimbawa tayo natan