SI Daniel, sakey a matoor a kalangweran, so puersaan ya inawit ed Babilonia antis ya aderal so Jerusalem. Sikato tan arum niran Judio a puersaan met ya inawit ditan sanen aderal so panarian na Juda so agmet inkulong ditan. Legay abayag ya impanayam to ed Babilonia, si Daniel so benendisyonan a maong na Dios. Aliktaran to ni ingen so patey sanen imbuntok ed kawalaan na saray leon tan nipaamta ed sikato iray nagawa ed mabayag nin arapen. Say sankaimportantian iran propesiya nen Daniel et nipaakar ed Mesias tan say uley To.

Naamtaan nen Daniel no kapigan onsabi so Mesias. Imbaga ed si Daniel no kapigan nailaloan na totoo na Dios so isabi na “Mesias a Lider”—69 a simba na saray taon kayarin niganggan so pangipaalagey lamet ed saray padir na Jerusalem. Say sakey simba et pitoran agew; say sakey simba na saray taon et pitoran taon. Abayag lan inatey si Daniel sanen niiter itan a ganggan nen 455 B.C.E. Ditan la ginmapo so 69 a “simba,” a say karukey to et 483 a taon tan anampot itan nen 29 C.E. Diad onsublay a parte na sayan publikasyon, amtaen tayo no antoy agawa ed satan a taon. Nipaamta met ed si Daniel so ‘kaekal,’ odino ipatey na Mesias, parad pansakbong ed kasalanan.—Daniel 9:24-26.

Magmaliw ya Ari ed tawen so Mesias. Diad nikaduman puyan, anengneng nen Daniel ed tawen so Mesias, a tinukoy ton “singa sakey ya anak na too,” a mamapaarap ed trono nen Jehova a mismo. Sikatoy inikdan nen Jehova na “panuley, tan gayaga, tan sakey a panarian.” Anggapoy anggaan na satan a Panarian. Naamtaan nen Daniel so sananey nin makapainteres a detalye nipaakar ed Mesianikon Panarian, a say Ari et walaray kaiba ton manuley, sakey a grupo a tinukoy a “sasanto na Sankatageyan.”—Daniel 7:13, 14, 27.

Deralen na Panarian iray gobierno na sayan mundo. Inikdan na Dios si Daniel na abilidad pian iter so kabaliksan na makapawetwet a kugip nen Nabucodonosor ya ari na Babilonia. Akanengneng so ari na baleg ya imahen a say ulo to et balitok, say pagew tan taklay to et pilak, say eges tan saray ulpo to et tanso, saray bikking to et balatyang, tan saray sali to et balatyang ya alaokay pitek. Sakey a baton atapias manlapud palandey so kinmena ed lupok a sali kanian amekmek so imahen. Impaliwawa nen Daniel a saray parte na imahen so mangirerepresenta ed pantutumbokan na uley na saray makapanyari ed mundo, ya onggapo ed Babilonia bilang ulo a balitok. Atalosan nen Daniel a diad panaon na unor a makapanyarin manuley ed sayan mauges a mundo, onkiwas so Panarian na Dios. Deralen na satan so amin a gobierno na sayan mundo. Insan satan la so manuley ed andi-anggaan.—Daniel, kapitulo 2.

Masikesiken la si Daniel pero anengneng to ni inkaderal na Babilonia. Si Arin Ciro so aneral ed syudad a singa impasakbay na saray propeta. Insan ag-abayag, saray Judio so nibulos a siansia—kayarin mismo a linmabas so nipasakbay a 70 a taon ya ag-apanayaman so nianakan dan dalin. Diad panangigiya na matoor iran gobernador, saserdote, tan propeta, nipaalagey lamet a siansia na saray Judio so Jerusalem tan say templo nen Jehova. Balet, antoy nagawa ed sampot na 483 a taon?

—Nibase ed libron Daniel.