Diad apalabas, ibabaga na saray literatura tayo ya say Kakristianoan et antitipiko odino isisimbolo na apostatan Jerusalem. Tua, seguradon nanonotan tayo so kipapasen na agmatoor ya Jerusalem​—pati say panag-idolatriya tan graben kaugsan na satan—​no nanenengneng tayoy gagawaen na Kakristianoan. Balet diad agano ni ran taon, agla ibabaga na saray publikasyon tayo, kaiba la iyay babasaen mo natan, so tipiko tan antitipiko no ipapaliwawa iray propesiya, puera labat no walay malinew a basiyan ed Biblia parad satan. Kasin walay malinew ya basiyan ed Kasulatan pian ibaga ya say Kakristianoan et antitipiko odino isisimbolo na Jerusalem? Anggapo.

Imanoen iraya: Say Jerusalem nensaman et sentro na dugan panagdayew; balet nagmaliw ya apostata iray manaayam ditan. Midumaan so Kakristianoan ta agbalot itan nagmaliw a kabiangan na dugan panagdayew. Manlapud inggapo na Kakristianoan nen komapat ya siglo C.E., talagan palso la iray doktrinan ibabangat na satan.

Niarum ni, kayarin dineral na Babilonia so Jerusalem, inabobonan lamet nen Jehova itan ya syudad tan nagmaliw lamet itan ya sentro na dugan panagdayew. Balet anggan kapigan et agbalot inabobonan na Dios so Kakristianoan, tan no naderal la itan diad baleg a kairapan, aglan balot itan ompawil.

Lapud saratan, antoy nayarin nibaga tayo? No aralen tayo ray propesiya ed Biblia ya asumpal ed agmatoor ya Jerusalem, nayarin nibaga tayon, ‘Singa ontan so Kakristianoan natan.’ Balet mapatnag ya anggapoy Makasulatan ya basiyan pian ibaga ya isisimbolo na Jerusalem so Kakristianoan.