Manbiabiahe ni Jesus ed Perea a paarap ed Jerusalem. Walay mayaman a laki a batik ed sikato tan tinmalimukor ed arapan to. Sayan kalangweran a laki et “sakey ed saray manuley,” a nayarin sakey a manangasikaso ed sinagoga odino membro na Sanhedrin. Intepet to, “Maong a Managbangat, antoy nepeg kon gawaen pian natawir koy bilay ya andi-anggaan?”​—Lucas 8:41; 18:18; 24:20.

“Akin et tatawagen mo ak a maong? Anggapoy arum a maong, noag say Dios,” so inyebat nen Jesus. Nayarin inusar na sayan kalangweran a laki so “maong” bilang titulo, a singa gagawaen na saray rabbi. Anggaman maong a manbangat si Jesus, impaamta to ed sayan laki a say titulon “Maong” et para labat ed Dios.

“Balet no labay moy nawalaan na bilay, itultuloy mon unoren iray ganggan,” so bilin ed sikato nen Jesus. Kanian intepet na kalangweran a laki: “Dinan iratan?” Binitla nen Jesus so limara ed Samploran Ganggan​—nipaakar ed pamatey, pikakalugoran, panagtakew, pantasi na tila, tan pangigalang ed atateng. Insan to inyarum so mas importantin ganggan: “Arom so kaparam a too a singa ed sikan dili.”​—Mateo 19:17-19.

“Uunoren ko la irayan amin,” so ebat na laki. “Anto ni kulang?” (Mateo 19:20) Nayarin pakalikna to et wala ni agto agawaan a nikadkaduman kamaongan pian mangawat na andi-anggaan a bilay. Naimano nen Jesus so inkasimoon to, kanian “alikna toy panangaro ed samay laki.” (Marcos 10:21) Balet walay makakaamper ed sayan laki.

Papablien to iray kaykayarian to, kanian inkuan nen Jesus: “Walay sakey a kulang ed sika: La ka, ilakom so antokaman a kayarian mo tan iter mod saray mairap-bilay, tan nawalaan kay kayamanan ed tawen; tan gala, magmaliw kan patumbok ko.” On, sarag ton iter so kuarta to ed saray mairap-bilay, ya agmakabayar ed sikato, tan magmaliw a disipulo nen Jesus. Balet sikatoy  anengneng nen Jesus ya inmalagey tan tinmaynan a maer-ermen, tan mapatnag ya nakakasian to. Papablien na laki so kayamanan to, saray ‘dakel a kaykayarian to,’ kanian agto nanengneng so tuan kayamanan. (Marcos 10:21, 22) Inkuan nen Jesus: “Agaylay irap ya onloob ed Panarian na Dios iray makuarta!”​—Lucas 18:24.

Nikelawan iray disipulo ed imbaga nen Jesus tan ed sayan sinmublay ya imbaga to: “Mas mainomay nin onlabot ed abot na dagum so sakey a kamelyo nen say pakaloob na sakey a mayaman a too ed Panarian na Dios.” Kanian inkuan na saray disipulo: “Siopa sirin so nilaban?” Kasin imposible a nilaban so sakey a too? Ninengneng iran maong nen Jesus tan inkuan to: “Saray bengatlan imposible ed too et posible ed Dios.”​—Lucas 18:25-27.

Impaimano nen Pedro ya miduma ed samay mayaman a laki so ginawa ran desisyon, ya inkuan to: “Tinaynan mi lay amin a bengatla tan tinmumbok kami ed sika; anto sirin so awaten mi?” Imbaga nen Jesus so resulta na dugan desisyon da: “No gawaen lan balo so amin a bengatla, sano akayurong la so Anak na too ed maglorian trono to, sikayo ran tinmumbok ed siak so onyurong met diad 12 trono, pian mangukom ed 12 tribu na Israel.”​—Mateo 19:27, 28.

Malinew a sankanonot nen Jesus so panaon diad arapen sano nagawa lamet ed dalin so singa saray kipapasen ed hardin na Eden. Nakaiba nen Jesus si Pedro tan saray arum a disipulo a manuley ed Paraison dalin, kanian nabawbawi ra so antokaman a sakripisyon gawaen da!

Balet aliwan amin a bendisyon et dia nid arapen. Pigara ed saratan et naeeksperiensya la natan na saray disipulo to. “Siopaman ya anaynan ed abung to odino asawa to odino agagi to odino atateng to odino ananak to nisengeg ed Panarian na Dios,” so inkuan nen Jesus, “et seguradon mangawat na mas dakel ni ed sayan panaon, tan diad onsabin sistema na mundo et bilay ya andi-anggaan.”​—Lucas 18:29, 30.

On, anggan iner so laen na saray disipulo to, napanggayagaan da so impanaagi a kaiba iray kaparan managdayew, a satan et mas malet tan mas mabli nen say panggagayagaan na saray sanaagi ed laman. Makapaermen, mapatnag ya agnagamoran na samay mayaman a laki iyan bendisyon pati say bilay ed tawen diad Panarian na Dios.

Inyarum nen Jesus: “Balet dakel so unaan a magmaliw ya unor, tan unor a magmaliw ya unaan.” (Mateo 19:30) Antoy labay ton ibaga?

Say mayaman a manuley et sakey ed saray “unaan,” ta sikatoy sakey a lider na saray Judio. Lapud uunoren to iray ganggan na Dios, walay potensyal ton magmaliw a disipulo nen Jesus tan manggawa na dakel a maabig a bengatla. Balet iyuuna tod bilay to iray kayamanan tan kaykayarian. Miduma iray ordinaryon totoo ed dalin, ta anengneng dad bangat nen Jesus so katuaan tan say dalan na bilay. Dati iran “unor,” a singa panangibaga, balet magmaliw ira natan ya “unaan.” Iilaloan da so iyurong ed saray trono a kaiba nen Jesus diad tawen, tan manuley ira diad Paraison dalin.