Linmay Jesus ed Jerusalem parad Piesta na Panangidedika (odino, Hanukkah). Diad satan a Piesta, nonodnonoten so impangidedika lamet ed templo. Masulok lan sakey siglo so linmabas nen nampaalagey na altar so Ari na Sirya ya si Antiochus IV Epiphanes diad mismon altar na Dios ed templo. Balet, abawi lanlamang na ananak na sakey ya Judion saserdote so Jerusalem tan indedika da lamet so templo ed si Jehova. Manlapu lad saman, tinaon ya seselebraan itan no Kislev 25, say bulan ya mipetekan ed bandad sampot na Nobyembre tan bandad gapoy Disyembre.

Panaoy ambetel ed saman tan manaakar si Jesus ed portiko nen Solomon diad templo. Insan pinaliberan na saray Judio tan pinilit dan onebat: “Anggad kapigan mo kami pannonoten? No sika so Kristo, ibagam lad sikami.” (Juan 10:22-24) Anto kasi iyebat nen Jesus? Say kuan to: “Imbagak lad sikayo, balet agkayo manisia.” Agdirektan imbaga nen Jesus ya sikato so Kristo, ya singa impangibaga tod samay Samaritana diad bobon. (Juan 4:25, 26) Balet oniay impaamta to: “Ibagak ed sikayoy tua, anggapo ni Abraham et wala ak la.”​—Juan 8:58.

Labay nen Jesus ya sikaran mismoy makatebek ya sikato so Kristo diad pangikompara dad saray gagawaen to ed nipasakbay ya gawaen na Kristo. Atan so rason no akin ya wala ray panaon ya ibibilin tod saray disipulo ton agda ibabagad anggan siopa ya sikato so Mesias. Balet natan diniretsa to irayan onkokontran Judio: “Saray kimey a gagawaen kod ngaran na Amak so mantatasi ed siak. Balet agkayo manisia.”​—Juan 10:25, 26.

Akin et agda panisiaan ya si Jesus so Kristo? Imbaga to: “Agkayo manisia, lapud agta kayo karnero. Dedengelen na saray karnerok so boses ko, tan kabat ko ra, tan tutumboken da ak. Ikdan ko ray bilay ya andi-anggaan, tan ag-iran balot naderal, tan anggapoy manamsam ed sikara diad limak. Say inter ed siak nen Amak et mas baleg nen say arum ni ran bengatla.” Insan imbaga nen Jesus ed sikara no panon kaapit so relasyon tod Ama to: “Siak tan say Ama et saksakey.” (Juan 10:26-30) Wadiad dalin si Jesus ed saman balet say Ama to et walad tawen, kanian agto labay ya ibagan literal ya saksakey ira nen Ama to. Imbes, saksakey so gagala ra, kanian nankasakey ira.

Nampasnok ya maong iray Judio ed imbaga nen Jesus kanian tutupaken da lamet pian pateyen. Ag-ataktakot si Jesus ed sikara. “Dakel so impanengneng kod sikayon maabig a gawa manlapud Ama,” so kuan to. “Dinan ed saratan a gawa so sengegay panupakan yod siak?” Inmebat ira: “Tupaken mi ka, aliwan lapud maabig a gawa, noag lapud mansasalita kay panagmudmora, ta . . . gagawaen mon dios so sarilim.” (Juan 10:31-33) Agpa imbaga nen Jesus ya sikatoy sakey a dios, kanian akin et aakusaan da?

Tua, ibabaga nen Jesus ya walay pakayari to, ya parad saray Judio et Dios labat so makagawa. Singa bilang, no nipaakar ed “saray karnero” imbaga ton: “Ikdan ko ray bilay ya andi-anggaan.” Ag-itan nagawaan na too. (Juan 10:28) Agnaimano na saray Judio ya prangkan imbaga la nen Jesus ya sikatoy inikdan na Ama to na pakayari.

Pian pruebaan ya aliway akusasyon da, nantepet si Jesus: “Agta nisulat ed Ganggan yo [diad Salmo 82:6], ‘Inkuan ko: “Dirios kayo”’? No tinawag ton ‘dirios’ iramay inukom na salitay Dios . . . ibaga yo kasi ed siak, a pinasanto tan imbaki na Ama diad mundo, ‘Mansasalita kay panagmudmora,’ lapud imbagak, ‘Siak so Anak na Dios’?”​—Juan 10:34-36.

On, tinawag na Kasulatan ya “dirios” so anggan saray aliwan patas ya totoon ukom. Kanian akin et kukuestionen na sarayan Judio si Jesus nen imbaga ton “siak so Anak na Dios”? Impaimano toy bengatla ya nepeg komon a makakombinse ed sikara: “Agkayo nepeg a manisia ed siak no agko gagawaen iray kimey nen Amak. Balet no gagawaen ko iratan, nepeg yon panisiaan iray gagawaen ko, anggano agyo ak panisiaan, pian  naamtaan yo tan mantultuloy yon naamtaan a say Ama et akikasakey ed siak tan akikasakey ak ed Ama.”​—Juan 10:37, 38.

Lapud satan, sikatoy sinali da lamet ya erelen, balet akabatik. Tinaynan toy Jerusalem tan binaliw toy Ilog Jordan, diad samay pasen ya ginmapo si Juan ya nambautismo, manga apat taon lay apalabas. Nayarin asingger iya ed bandad abalaten ya sampot na Dayat na Galilea.

Ditan et dinmago iray totoo ed si Jesus tan inkuan da: “Anggapoy anggan sakey a tanda a ginawa nen Juan, balet tua so amin ya imbaga to nipaakar ed sayan too.” (Juan 10:41) Kanian dakel so Judio ya anisia ed si Jesus.