Manpalbangon la diad samay pitlon impangiburi nen Pedro ed si Jesus. Asumpal lay kunkunwarin bista na Sanhedrin tan nansisian la ra. Diad kabkabuasan na Biernes, nantitipon ira lamet pian papawayen dan legal imay ilegal ya impanbista ra nen labi. Inawit si Jesus ed sikara.

Tinepet lamet na korte: “Ibagam ed sikami no sika so Kristo.” Inmebat si Jesus: “Anggano ibagak ed sikayo, agyo lanlamang panisiaan. Sakey ni, no tepetan ta kayo, agkayo lanlamang onebat.” Balet makmakpel ton impaamta so pakabidbiran ed sikato unong ya impasakbay diad Daniel 7:13. Inkuan to: “Manlapud natan, say Anak na too et onyurong diad kawanan a pakapanyari na Dios.”​—Lucas 22:67-69; Mateo 26:63.

Siansia nin tinepet da: “Sika sirin so Anak na Dios?” Inmebat si Jesus: “Sikayon mismo so mangibabaga a siak so Anak na Dios.” Nayarin saya so basiyan da pian pateyen si Jesus diad kason panagmudmora ed Dios. Inkuan da: “Kaukolan tayo ni kasi arum a testigo?” (Lucas 22:70, 71; Marcos 14:64) Kanian binalor day Jesus tan inawit dad Romanon Gobernador a si Poncio Pilato.

Nayarin anengneng nen Judas Iscariote ya aawiten day Jesus ed si Pilato. Sanen amoria nen Judas ya senentensiaan da lay Jesus, akalikna met na pagbabawi tan ermen. Balet, imbes ya onasingger ed Dios pian ipatnag toy tuan pagbabawi, sikatoy linmad saray manunan saserdote pian ipawil so 30 piraso na pilak. Imbaga nen Judas ed sikara: “Nankasalanan ak sanen inyawat ko so toon andiay kasalanan.” Balet agda kinasian, a kuan da: “Antoy pibabali mi? Sikay akauley ed satan!”​—Mateo 27:4.

Imbantak nen Judas ed templo so 30 piraso na pilak tan inaruman to ni kasalanan to nen sinali toy manbikkel. Sanen ibibitay la nen Judas so sarili to, nayarin aputer so sanga ya angisingeran tod lubir. Naplag ed kabatoan tan abuyak so laman to.​—Gawa 1:17, 18.

Kabkabuasan ni sanen inawit si Jesus ed palasyo nen Poncio Pilato. Balet aglinmoob iramay Judion angawit ed sikato ditan. Iisipen da a no  nakaiba da ray Gentil et magmaliw iran marutak. Diad satan et ag-ira nayarin mangan no Nisan 15, say unonan agew na Piesta na Andi-lebaduran Tinapay, ya ipapasen dan kabiangay panaon na Paskua.

Pinmaway si Pilato tan tinepetan to ra: “Antoy iyaakusa yod sayan too?” Inmebat ira: “No sayan too et agmanggagawa na mauges, agmi komon iyawat ed sika.” Nayarin alikna nen Pilato ya dedesdesen da, kanian imbaga to: “Ala yo la tan ukom yo unong ed ganggan yo.” Impatnag na saray Judio a say intension da et mamatey, a kuan da: “Sebel ed sikami so mamatey na anggan siopa.”​—Juan 18:29-31.

Diad tua, no pateyen day Jesus legay piesta na Paskua, nayarin manggulo iray totoo. Balet no saray Romano so mamatey ed si Jesus lapud krimen a kontrad gobierno na Roma, a saya et iyaabuloy a gawaen da, magmaliw ya anggapoy eebatan na sarayan Judio ed saray totoo.

Ag-imbaga na saray lider na relihyon ed si Pilato ya inakusaan day Jesus na panagmudmora ed Dios. Natan et angimbento ray nanduruman akusasyon: “Nalmoan min [1] guguloen na sayan too so nasyon mi, [2] isesebel toy pambayar na saray buis ed Cesar, tan [3] ibabaga ton sikaton mismo so Kristo ya ari.”​—Lucas 23:2.

Lapud irerepresenta nen Pilato so Roma, nayarin sikatoy interesado ed akusasyon da ya ibabaga nen Jesus a sikatoy sakey ya ari. Kanian linmoob lamet si Pilato ed palasyo, tinawag toy Jesus tan tinepetan to: “Sika so Ari na saray Judio?” Say labay ton ibaga, ‘Kasin sinumlang moy ganggan na empiryo, ya ibabagam a sakey kan ari a kontrad Cesar?’ Nayarin labay nen Jesus a naamtaan no kaunongan lay nadngelan nen Pilato nipaakar ed sikato, kanian tinepet to: “Kasin satan a tepet et nanlapud sika, odino walay arum ya angibaga ed sika nipaakar ed siak?”​—Juan 18:33, 34.

Aminadoy Pilato ya anggapoy amta to nipaakar ed si Jesus, balet labay toy manusisa, kanian inkuan to: “Sakey ak ta’n Judio?” Inkuan to ni: “Inyawat kad siak na mismon nasyon mo tan saray manunan saserdote. Antoy ginawam?”​—Juan 18:35.

Agsinali nen Jesus a paliisan so manunan isyu​—no kasin sikatoy sakey ya ari. Seguradon nabiglan maong si Gobernador Pilato ed ebat to.