Agsinali nen Jesus ya iyamot ed si Pilato a talagan sikatoy sakey ya ari. Balet, say Panarian to et agpakaderalan na Roma. Inkuan nen Jesus: “Say Panarian ko et agkabiangan na sayan mundo. No say Panarian ko et kabiangan na sayan mundo, akilaban la komon iray lingkor ko pian agak niyawat ed saray Judio. Balet say tua, say Panarian ko et agmanlapu dia.” (Juan 18:36) On, walay Panarian nen Jesus, balet ag-iya kabiangan na mundo.

Agnin siansia tinmundan nanusisa si Pilato. Tinepet to: “No ontan sirin, sakey kan ari?” Impaamta nen Jesus ed si Pilato a dugay iisipen to, a kuan to: “Sikan mismo so mangibabagan sakey ak ya ari. Lapud saya et niyanak ak, tan lapud saya et linma ak dia ed mundo, pian tasian ko so katuaan. Ondedengel ed siak so amin a walad dapag na katuaan.”​—Juan 18:37.

Antis na saya et imbaga la nen Jesus ed si Tomas: “Siak so dalan tan say katuaan tan say bilay.” Natan, anggan si Pilato et arengel to a say gagala na impangibakid si Jesus diad dalin et pian tasian to so “katuaan,” nagkalalo lay katuaan nipaakar ed Panarian to. Determinadoy Jesus a manmatoor ed satan a katuaan anggan bilay toy kasalat. Tinepet nen Pilato: “Anto so katuaan?” balet agto la inalagar ya ipaliwawa itan ed sikato. Inisip ton duga lay nadngel to pian ukomen iyan too.​—Juan 14:6; 18:38.

Pinmawil si Pilato ed saray totoon manaalagar ed paway na palasyo. Nayarin walad abay toy Jesus sanen imbaga tod saray manunan saserdote tan saray kaiba ra: “Anggapoy aromog kon kasalanan na sayan too.” Lapud asanokan iray totoo ed desisyon to, impilit da: “Guguloen to so totoo diad pambabangat tod interon Judea, ya inggapo tod Galilea ya anggad dia.”​—Lucas 23:4, 5.

Nayarin abiglay Pilato no akin ya ontan lan kapursigido iray Judio anta anggapoy basiyan da. Sanen ag-ontundan oneeyag iray manunan saserdote tan mamasiken, tinepetan nen Pilato si Jesus: “Agmo ta narerengel so dakel ya akusasyon dad sika?” (Mateo 27:13) Ag-inmebat si Jesus. Sikatoy kalmado labat anggano mainga-ingal la ray totoo ed pangaakusa ra, kanian mankelaw si Pilato.

Based samay imbaga na saray Judio ya ‘inggapo nen Jesus diad Galilea,’ naamtaan nen Pilato a si Jesus et taga Galilea. Kanian naikdan na ideya si Pilato no panon ton napaliisan so pangukom ed si Jesus. Si Herodes Antipas (anak nen Herodes a Makapanyari) so manuuley ed Galilea, tan sikatoy walad Jerusalem diad sayan panaon na Paskua. Kanian impaiyakar nen Pilato si Jesus ed si Herodes. Si Herodes Antipas imay nampaputot ed ulo nen Juan Bautista. Sanen nadngel nen Herodes a manggagaway milagro si Jesus, sikatoy aburido ompan si Jesus et si Juan lanlamang a pinaoli manlapud inaatey.​—Lucas 9:7-9.

Natan et aliketan si Herodes ta nanengneng to lay Jesus. Aliwan lapud labay ton tulongan odino amtaen no talagan walay basiyan na saray iyaakusa ra ed sikato. Labay labat nen Herodes so man-usyoso, tan “iilaloan toy makanengneng na sakey a tanda a gawaen to.” (Lucas 23:8) Balet, agpinagustoan nen Jesus si Herodes. Diad tua et agbalot inmebat si Jesus ed saray tepet to. Lapud adismaya si Herodes tan saray sundalo to, “minudmora” day Jesus. (Lucas 23:11) Sinulongan day marakdakep a kawes tan niludlurey da. Insan pinapawil nen Herodes si Jesus ed si Pilato. Dati et manbubusolan si Herodes tan si Pilato, balet natan et sankaaro la ra.

Nen wadman lay Jesus, tinipon nen Pilato iray manunan saserdote, saray manuley na Judio, tan saray totoo tan inkuan to: “Sikatoy inusisak ed arapan yo balet anggapoy aromog kon basiyan na saray iyaakusa yod sikato. Diad tua, anggapo met so aromog nen Herodes, ta sikatoy impawil tod sikatayo, tan anggapoy ginawa ton makanepegan na patey. Sikatoy dusaen ko sirin insan ibulos ko la.”​—Lucas 23:14-16.

 Labalabay nen Pilato ya ibulos si Jesus, ta amta ton makakaibeg labat iray saserdote kanian sikatoy inyawat da. Legan a sasalien nen Pilato ya ibulos si Jesus, wala ni mas lalon amakiwas ed sikato a gawaen itan. Sanen akayurong ed panangukoman, impasabi na asawa to iyan mensahe: “Agmo pibabalian itan a matunong a too, ta ataktakot ak a maong natan ed akugip ko [sayan kugip et mapatnag a nanlapud Dios] nipaakar ed sikato.”​—Mateo 27:19.

Amta nen Pilato a nepeg ton ibulos iyan too ya anggapoy kasalanan, balet panon ton nagawaan itan?