SIOPA so sankamaongan a lingkor na Dios a nambilay ed kapiganman?— Duga so ebat mo, si Jesu-Kristo. Kasin nayarian tayoy magmaliw a singa sikato?— On, ibabaga na Biblia a sikatoy angipanengneng na ehemplo ya aligen tayo. Tan iimbitaan to itayon magmaliw a babangatan to.

Antam no antoy kabaliksan na pagmaliw a babangatan nen Jesus?— Mankabaliksan itan na pigaran bengatla. Unona, nepeg tayoy manaral manlapud sikato. Balet aliwa labat a satan. Nepeg tayo met a panisiaan iray ibabaga to. No panisiaan tayo, gawaen tayoy ibabaga to.

Dakel a totoo so mangibabagan manisia ira’d si Jesus. Kasin amin da et talagan babangatan to?— Andi, maslak ed sikara et aliwan babangatan to. Nayarin sikaray mimimisa. Balet dakel ed sikara so agbalot manguusar na panaon pian manaral ed imbangat nen Jesus. On, saraman labat so manutumbok ed ehemplo to so babangatan to.

Pantongtongan ta so pigara ed saramay babangatan nen Jesus sanen sikatoy wadiad dalin bilang too. Sakey ed unonan nagmaliw a babangatan et si Felipe. Inanap nen Felipe so kaaro ton Natanael (tinawag met a Bartolome), a nanengneng mo dia ya akayurong ed silong na kiew. Sanen linma si Natanael ed si Jesus, inkuan nen Jesus: ‘Nengneng mo, nia so sakey a matuan too, sakey a tuan Israelita.’ Nikelawan si Natanael kanian intepet to: ‘Panoy pikabat mo ed siak?’

 “Sakbay kan tinawag nen Felipe, legan a wala ka’d silong na kiew ya higos, anengneng ta ka,” so inkuan nen Jesus. Mankelaw si Natanael lapud amta nen Jesus ya eksakto no iner so kawalaan to, kanian inkuan nen Natanael: “Sika so Anak na Dios, sika so Ari na Israel.”—Juan 1:49.

Arum so nagmaliw a babangatan nen Jesus ed saman ya agew antis ni nen Felipe tan Natanael. Saraya et sikara di Andres tan say kuya ton si Pedro ontan met ed si Juan tan nayarin say kuya nen Juan, a si Santiago so kaiba met a nagmaliw ya akadkaunan babangatan. (Juan 1:35-51) Balet, ag-abayag, sarayan apatira so pinmawil ed anapan dan manag-alay sira. Insan sakey ya agew legan a manaakar si Jesus ed gilig na Dayat na Galilea, anengneng to si Pedro tan Andres a mangipepelag ed iket odino panag-ala ray sira diad dayat. Oniay imbaga nen Jesus ed sikara: “Tumbok kayo ed siak.”

 Diad arawi na daiset, abantag nen Jesus si Santiago tan Juan. Sikaray akalugan ed baloto a kaibay ama ra, a mangaapiger ed saray iket da. Sikaray tinawag nen Jesus a miulop met ed sikato. Antoy gawaen mo no sikay tinawag nen Jesus ey? Kasin miulop kan tampol ed sikato?— Sarayan lalaki et kabat da no siopa si Jesus. Amta ra a sikatoy imbaki na Dios. Kanian tampol a tinaynan day anapan da bilang manag-alay sira tan akiulop ira ed si Jesus.—Mateo 4:18-22.

Sanen sarayan lalaki so nagmaliw a papatumbok nen Jesus, kasin kabaliksan ton sikaray naynay a nanggawa na duga nanlapula’d saman?— Andi. Nayarin natandaan mo a sarayan lalaki et nansangsangan da ni ingen no siopa ed sikara so sankamanunaanan. Balet sikaray dinmengel ed si Jesus, tan sikaray mabulos ya anguman. No sikatayoy mabulos a manguman, sikatayo met so magmaliw a babangatan nen Jesus.

Iimbitaan nen Jesus so amin a klase na totoo a magmaliw a babangatan to. Aminsan, sakey a mayaman a manuley a laki so linma’d si Jesus tan tinepet to no panon ton nagamoran so bilay ya andi-anggaan. Sanen imbaga na mayaman a manuley ya uunoren to laray ganggan na Dios nanlapula’d inkaugaw to, sikatoy inimbitaan nen Jesus: “Gala, tumboken moak.” Antam no antoy agawa?—

Onia’ay, sanen naamtaan na saman a laki a say pagmaliw a babangatan nen Jesus so nepeg ya ipasen a mas importante nen say pagmaliw a mayaman, sikatoy naermenan a maong. Sikatoy agnagmaliw a babangatan nen Jesus lapud mas inaro toy kayamanan to nen say Dios.—Lucas 18:18-25.

Kayarin nampulong si Jesus ed ngalngali sakey taon tan kapaldua, pinili toy 12 ed saray babangatan to a magmaliw ya apostoles. Saray apostol et lalaki ya imbaki to a manggawa na nikaduman kimey. Antam so kangaranan da?— Salien ta no naamtaan tay kangaranan da. Nengneng moray retrato da’d dia, tan imanom pa no kasin nibagam so kangaranan da. Insan salim pan bitlaen so kangaranan da.

Diad kaunoran, sakey ed 12 ya apostoles so nagmaliw a mauges. Si Judas Iscariote. Kayari na saman, sananey a babangatan so apili a magmaliw  ya apostol. Antam so ngaran to?— Si Matias. Ag-abayag et si Pablo tan Bernabe so nagmaliw met ya apostol, balet sikaray aliwan kabiangan na 12.—Gawa 1:23-26; 14:14.

Singa naaralan ta ed Kapitulo 1 na sayan libro, si Jesus so interesado ed saray ugugaw. Akin a ginawa to itan?— Lapud amta to a sikaray nayarin magmaliw a babangatan to met. Diad tua, saray ugugaw so mabetbet a makapangibaga na saray bengatla diad paraan a dengelen na saray baleg lan totoo tan labay day manaral na dakel ni nipaakar ed Sankamaongan a Managbangat.

Dakel met a bibii so nagmaliw a babangatan nen Jesus. Arum so akila ed sikato sanen linma’d arum a syudad pian manpulong. Si Maria  Magdalena, si Juana, tan Susana so akila met. Nayarin sikara met so tinmulong a mangiparaan na saray kanen to tan impepesakan da.—Lucas 8:1-3.

Labay mo so magmaliw a babangatan nen Jesus?— Tandaan, say basta pangibaga a sakey itayon babangatan to et agto labay ya ibagan babangatan to itayo la. Nepeg tayoy onkiwas a singa ed sakey ed saray babangatan to inerman so kawalaan tayo, aliwan sano onatendi itayo labat ed saray pantitipon na saray Kristiano. Kasin nanonotan mo so arum a pasen ya importante parad sikatayo so onkiwas bilang babangatan nen Jesus?—

On, nepeg tayon gawaen itan diad abung. Balet say sakey nin pasen et diad eskuelaan. Say agmo lilingwanan a balot ontan met ed siak ta pian magmaliw a tuan babangatan nen Jesus et nepeg ta so onkiwas a singa ed ginawa to ed interon sanagew, kada agew, inerman so kawalaan ta.