1, 2. (a) Antoy iisipen na dakel ya imposiblin nagawa, pero antoy ipapaseguro na Biblia? (b) Antoy impangituring nen Jehova ed si Abraham, tan akin?

 ANTO kasi naliknam no ibagad sika na Nanggawa na tawen tan dalin ya, “Kaarok ’ya”? Parad dakel, singa imposible itan ya nagawa. Iisipen da ya agnakaaro na too so Dios. Pero ipapaseguro na Biblia ya sarag tayon nakaaro si Jehova a Dios.

² Say sakey ya akapikaaro ed Dios et si Abraham. Sikatoy tinawag nen Jehova ya “kaarok.” (Isaias 41:8) On, inturing nen Jehova si Abraham ya maapit a kaaro to. Labalabay nen Jehova ya nakaaro si Abraham ta impanengneng toy “pananisia” ed Sikato. (Santiago 2:23) Ontan met natan, labay nen Jehova ya naka-close iramay manlilingkor ed sikato tan ipalikna so “panangaro to” ed sikara. (Deuteronomio 10:15) Oniay nabasad Biblia: “Onapit kayo ed Dios, tan sikatoy onapit ed sikayo.” (Santiago 4:8) Antoy labay ya ibaga na satan?

3. Antoy imbitasyon nen Jehova ed sikatayo, tan antoy ipropromisa to?

³ Iimbitaan itayo nen Jehova ya onapit ed sikato. Labalabay to tayon nakaaro. Tan ipropromisa to ya no onapit tayod sikato, ontan met so gawaen to, onapit met ed sikatayo. Talagan mablin regalo so “maapit a pikakaaro ed si Jehova.” (Salmo 25:14) Say maapit ya kaaro et amay napangibagaan tayo na saray sekreto tayo.

4. Panon mon nibaga ya say sakey et maapit ya kaaro, tan akin et ontan si Jehova?

 ⁴ Wala ta’y kaarom ya napangibabagaan moy sekretom? Say ontan ya kaaro et walay malasakit tod sika. Pantitiwalaan mo ta antam ya matoor. Malikeliket ka no iistoryaen mo ray nagagawad bilay mo. No ibabagam iray problemam ed sikato, naiinawaan ka. Tan anggano agka natatalosan na arum, natatalosan to ka. Ontan met, no onapit ka ed Dios, nawalaan ka na espisyal ya Kaaro, ya manmalasakit, mangaro, tan makatalos ed sika. (Salmo 103:14; 1 Pedro 5:7) Agka natatakot ya ibagad sikatoy naliliknam, ta antam ya matoor ed saramay matoor ed sikato. (Salmo 18:25) Pero, ayan baleg ya pribilehyon makapikaaro ed Dios et nagmaliw labat ya posible lapud sikatoy nanggawa na paraan.

5. Antoy ginawa nen Jehova pian makapikaaro tayo ed sikato?

⁵ No aliwan lapud Dios, agtayon balot makapikaaro ed sikato ta makasalanan itayo. (Salmo 5:4) “Balet ipapanengneng na Dios so panangaro to ed sikatayo, ta anggano makasalanan itayo ni et inatey si Kristo parad sikatayo,” so insulat nen apostol Pablo. (Roma 5:8) Imbaki nen Jehova si Jesus pian “iter toy bilay to a panondon ed amayamay.” (Mateo 20:28) No manisia tayo ed satan ya dondon, makapikaaro tayo ed Dios. Lapud say Dios so “inmunan angaro ed sikatayo,” sikato so nanggaway paraan pian nakaaro tayo.​—1 Juan 4:19.

6, 7. (a) Panon tayon amta ya ag-insiblet nen Jehova so tungkol ed sarili to? (b) Panon ya ipapakabat nen Jehova so sarili to?

 ⁶ Wala ni sakey ya ginawa nen Jehova: Impakabat toy sarili to ed sikatayo. Pian nakaaro tayo so sakey, dapat nakabat tayon maong, pati saray balibalin kualidad tan ugali to. Kanian no ag-impakabat nen Jehova so sarili to, ag-onapit so liknaan tayod sikato. Pero ag-insiblet nen Jehova so tungkol ed sarili to, labay ton sikatoy nakabat tayo. (Isaias 45:19) Sakey ni, impakabat toy sarili to ed amin, anggan diad saramay ituturing na mundo ya abebbeba.—Mateo 11:25.

⁷ Panon ya ipapakabat nen Jehova so sarili to? Dakel so naamtaan tayo ed personalidad to panamegley na saray pinalsa to. Naaralan tayod saratan so mabisbiskeg ya pakapanyari to, agnaparaan ya karunongan to, tan araldalem ya panangaro to. (Roma 1:20) Pero, aliwan satan labat so ginawa nen Jehova pian sikatoy nakabat tayo. Lapud Sankamaongan ya mitalosan, impaisulat toy tungkol ed sarili to diad Salita to, say Biblia.

8. Akin et nibaga tayo ya say Biblia et prueba ya inaro itayo nen Jehova?

⁸ Say Biblia et prueba ya inar-aro itayo nen Jehova. Impaisulat to so Salita to diad paraan ya natalosan tayo. Ipapanengneng na satan ya agto tayo labat inaro, noagta labay to met ya sikatoy nakabat tan naaro tayo. No basaen tayo itan ya balibalin libro, onapit so  liknaan tayod sikato. (Salmo 1:1-3) Pantongtongan tayo so pigaran paraan no panon ya impakabat nen Jehova so sarili to panamegley na Salita to.

9. Anto ray teksto ya mangipapaamta ed saray kualidad na Dios?

⁹ Dakel so nabasa tayod Biblia tungkol ed saray kualidad na Dios. Nia ray pigaran alimbawa. “Aaroen nen Jehova so hustisya.” (Salmo 37:28) Say Dios et “abalbaleg so pakayari to.” (Job 37:23) “‘Matoor ak,’ so imbaga nen Jehova.” (Jeremias 3:12) “Makabat so puso to.” (Job 9:4) Sikato so “Dios a mapangasi tan maabagey, matantan a manpasnok tan abalbaleg ed matoor a panangaro tan katuaan.” (Exodo 34:6) “Maomaong ka, O Jehova, tan akaparaan kan mamerdona.” (Salmo 86:5) Tan singa nibaga lad akaunan kapitulo, “say Dios et aro,” atan so manunan kualidad to. (1 Juan 4:8) Legan mon nonodnonoten irayan balibalin kualidad, di ba lalo kan napapaapit ed agnaparaan ya Dios?

10, 11. (a) Pian lalo tayon nakabat si Jehova, anto ni ray impaisulat to ed Biblia? (b) Anto ray alimbawa ed Biblia ya makatulong pian na-imadyin tayo no panon ya uusaren na Dios so pakapanyari to?

¹⁰ Aglabat imbaga nen Jehova iray kualidad to, imbes nabasa met ed Salita to iray alimbawa no panon ton impanengneng irayan kualidad. No nababasa  tayo iratan, nai-imadyin tayo no anto ray ginawa to tan mas natalosan tayo no anton klase na Dios si Jehova. Lapud satan, lalon napapaapit so liknaan tayo ed sikato. Niay sakey ya alimbawa.

¹¹ Nababasa tayo ed Biblia ya “makapadinayew [so] pakayari” na Dios. (Isaias 40:26) Balet duma met so epekto tod sikatayo no nabasa tayon inligtas to ray Israelita ed Ambalangan Dayat tan inter toy amin ya nakaukolan dad desierto diad loob na 40 ya taon. Na-iimadyin mo seguron nabebelsay so dayat, insan binmeltang so manga 3,000,000 ya Israelita. Amaga so dadakatan da, tan diad biek tan biek da et nagmaliw ya singa padir so danum na dayat. (Exodo 14:21; 15:8) Talagan prinotektaan tan inasikaso ira na Dios diad desierto. Pian walay nainum da, pinapaway toy danum ed baleg ya bato. Tan pian walay naakan da, pinapelag toy mana ya say itsura to et singa amputin angkekelag ya bukel. (Exodo 16:31; Numeros 20:11) Diad satan et aglabat impanengneng nen Jehova ya sikatoy makapanyari, noagta inusar to met itan pian tulongan so totoo to. Agta makapabiskeg ya naamtaan ya say Dios ya pampipikasian tayo et aliwa labat ya makapanyari? Imbes, sikatoy “salimbengan tan biskeg tayo, mainomay a nakerewan na tulong diad panaoy gonigon.”—Salmo 46:1.

12. Panon ya indeskribe nen Jehova so sarili to pian mainomay tayon natalosan?

¹² Wala ni ray arum ya ginawa nen Jehova pian sikatoy nakabat tayo. Lapud Espiritu si Jehova, agtayo nanengneng ta totoo ti labat. Kanian no say impandeskribe na Dios ed sarili to et amay natalosan labat  na saray espiritun pinalsa, seguradon agtayo itan natalosan. Singa itan pangideskribe na kolor na matam tan kutis mo ed sakey a niyanak ya bulag. Maar-aron angusar si Jehova na saray salitan natalosan tayo. No maminsan, sikatoy manguusar na alimbawa, ilustrasyon, tan panangikompara ya pamilyar ed sikatayo. Indeskribe to ni ingen so sarili to ya singa toon wala ray parte na laman to. a

13. Panon ya indeskribe na Isaias 40:11 si Jehova, tan antoy epekto na satan ed sika?

¹³ Imanoen so impandeskribe ed si Jehova diad Isaias 40:11: “Asikasoen toy pulok to a singa sakey a managpastol. Tiponen to iray kordero diad panamegley na taklay to, tan awiten to ra diad pagew to.” Inkompara si Jehova ed sakey ya pastol ya titiponen to ray kordero to ed “taklay to.” Ipapanengneng na saya ya sarasarag na Dios ya protektaan tan tulongan iray totoo to, lalo la iramay anggapoy kalabanlaban. Kanian no matoor tayo ed sikato, maligen itayo ed mabisbiskeg ya taklay to ta agto tayon balot paulyan. (Roma 8:38, 39) Say Manunan Managpastol tayo et aawiten to ray kordero to “diad pagew to.” Diad literal ya managpastol no maminsan, aawiten toy kapangiyanak ya kordero tan ikakarga tod tupi na kawes to ya walad bandad pagew to. Ipapaseguro sirin nen Jehova ya inar-aro tan imamalasakit to tayo, kanian natural labat ya onapit so liknaan tayo ed sikato.

14. Akin et nibaga tayon si Jesus so sankaabigan ya inter nen Jehova pian ipakabat so sarili To ed sikatayo?

¹⁴ Diad Biblia, say sankaabigan ya inter nen Jehova pian ipakabat so sarili to et say inar-aro ton Anak, si Jesus. Anggapo lay sankaabigan ya angalig tan angipaliwawa na tungkol ed Dios noag si Jesus. Sayan panguloan ya Anak et abayag lan nambilay ed tawen kaibay Ama to antis nin pinalsa iray anghel tan arum ni. (Colosas 1:15) Kabkabat ya maong nen Jesus si Jehova. Kanian oniay imbaga to: “Amin a bengatla et inter ed siak nen Amak, tan anggapoy makapikabat no siopa so Anak noag say Ama, tan anggapo met so makapikabat no siopa so Ama noag say Anak tan say siopaman a labay a pangipaamtaan na Anak.” (Lucas 10:22) Nen wadiad dalin si Jesus, walay duaran importantin ginawa to pian nipakabat to so Ama to.

15, 16. Antoy duaran ginawa nen Jesus pian nipakabat so Ama to?

¹⁵ Unona, saray bangat nen Jesus so ontulong ed sikatayo pian nakabat tayo so Ama to. Indeskribe nen Jesus si Jehova diad paraan ya nasabi so puso tayo. Singa bilang, pian ipaliwawa so panangasi tan panangaro nen Jehova ed saray nankasalanan ya magbabawi, inusar nen Jesus ya ilustrasyon so sakey ya ama ya say anak to et nanrebelde tan linmayas. Nen nagbabawi tan amawil so anak, malikeliket ya inabet na ama tan maar-aro ton nilakap tan inangoban. (Lucas 15:11-24) Imbangat met nen Jesus ya ‘iyaasingger’ na Dios iray mapaabeban totoo ta inaro to so kada sakey ed sikara. (Juan 6:44) Amta ni ingen nen Jehova no  walay napelag ya anuyaw odino siwit. Kanian kuan nen Jesus: “Agkayo natatakot; mas mabli kayo nen say dakel ya anuyaw.” (Mateo 10:29, 31) Agta lalo tayon onapit ed ontan ya maar-aron Dios?

¹⁶ Komadua, impanengneng nen Jesus ed alimbawa to no siopa si Jehova. Inalig ya maong nen Jesus so Ama to kanian nibaga ton: “Siopaman ya akanengneng ed siak et anengneng to met lay Ama.” (Juan 14:9) Kanian no nababasa tayod Biblia so alikna tan impantrato nen Jesus ed arum, singa tayo met la nanenengneng so Ama to. Atan lay sankaabigan a paraan ya ginawa nen Jehova pian ipaamta iray kualidad to. Akin et ontan so nibaga tayo?

17. Antoy sakey ya ilustrasyon ya makatulong pian natalosan tayo no panon ya impakabat nen Jehova so sarili to?

¹⁷ Niay sakey ya ilustrasyon: Kunwari walay mantetepet no anto ’tay kaabigan. Nayarin ipaliwawam  no antoy labay ton ibaga. Pero, no walay anengneng mo ya manggagaway kaabigan tan ibagam ya, “atan so kaabigan,” mas natalosan to. Ontan so ginawa nen Jehova pian sikatoy mas nakabat tayo. Aglabat angusar na saray salita pian ipakabat so sarili to, noagta angiter na alimbawa, say Anak to. Nanengneng iray kualidad na Dios ed si Jesus. Diad Ebanghelyo odino apatiran libro na Biblia ya pakabasaan ed saray ginawa nen Jesus, naaral tayo ray tungkol ed si Jehova. Kanian singa ibabaga nen Jehova: “Ontan ak.” Antoy imbaga na Biblia tungkol ed si Jesus nen wadiad dalin?

18. Panon ya impanengneng nen Jesus so pakapanyari, hustisya, tan karunongan?

¹⁸ Makapadinayew so impangipanengneng nen Jesus ed apatiran manunan kualidad na Dios. Walay pakapanyari ton paabigen so sakit, pakanen iray narasan, tan bilayen ni ingen iray inaatey. Pero agbalot inusar nen Jesus so pakapanyari to parad sarili to odino pian sakitan so arum, aliwan singa saray makasarilin totoo ya aabusoen day autoridad da. (Mateo 4:2-4) Importante ed sikato so hustisya. Sinmanok nen anengneng to ray masaol ya negosyante ya lolokoen da ray totoo. (Mateo 21:12, 13) Patas so impantrato to ed saray mairap-bilay tan tinulongan to ra pian “nainawaan” ira. (Mateo 11:4, 5, 28-30) Anggapoy makapipara ed karunongan nen Jesus, mas marunong ya manbangat “nen si Solomon.” (Mateo 12:42) Balet, agbalot inlastog nen Jesus so karunongan to. Lapud malinew, simpli, tan praktikal so panagbangat to, asabi toy puso na ordinaryon totoo.

19, 20. (a) Akin ya si Jesus so sankaabigan ya angipanengneng na alimbaway panangaro? (b) No babasaen tan dadalepdepen tayoy alimbawa nen Jesus, antoy tandaan tayo?

 ¹⁹ Si Jesus so sankaabigan ya angipanengneng na alimbaway panangaro. Legan na ministeryo to, impanengneng to so panangaro ed nanduruman paraan, walay pililikna tan panangabagey to. Kaskasian to ray nanairapan, kanian nanggaway paraan pian tulongan ira. (Mateo 14:14) Agto labat pinaabig iray mansasakit tan pinakan iray narasan, wala ni marakep ya ginawa to. Tinulongan to ran naamtaan, naawat, tan naaro so katuaan tungkol ed Panarian na Dios ya mangiter na permanentin bendisyon ed totoo. (Marcos 6:34; Lucas 4:43) Tan say sankaimportantian ya ginawa to pian ipanengneng so panangaro to et inter toy bilay to parad sikatayo.​—Juan 15:13.

²⁰ Talagan maar-aro tan makasi si Jesus kanian agti la pankelawan no akin ya maasingger ed sikato iray totoo. (Marcos 10:13-16) Pero tandaan mo iya, no babasaen tan dadalepdepen mo so amin ya balibalin ginawa nen Jesus, nanengneng mo no anton klasen Ama si Jehova.​—Hebreo 1:3.

21, 22. Panon tayon ‘naanap’ si Jehova, tan panon ya makatulong iyan libro pian nagawaan tayo itan?

²¹ Lapud malinlinew ya impakabat nen Jehova so sarili to panamegley na Biblia, seguradon labay to tayon nakaaro. Pero agto tayo pipiliten ya mikaaro ed sikato. Walad sikatayo no ‘anapen’ tayoy Jehova “legan a sikatoy naromog ni.” (Isaias 55:6) Pian  naanap tayo si Jehova, dapat tuloytuloy tayon aralen iray kualidad tan personalidad to ya walad Biblia. Makatulong ed sika iyan libro pian nagawaan itan.

²² Sayan libro et naapag ed apatiran seksion ya mangipapaliwawa ed saray manunan kualidad nen Jehova: say pakapanyari, hustisya, karunongan, tan panangaro. Diad gapo na kada seksion et walay antikey ya deskripsion na sakey ed saratan ya kualidad. Insan, ipaliwawa ed onsublay ya pigaran kapitulo no panon itan ya ipapanengneng nen Jehova diad nanduruman paraan. Kaiba met ed kada seksion so sakey ya kapitulo ya mangipaliwawa no panon ya impanengneng nen Jesus itan ya kualidad, tan sakey nin kapitulo no panon mo itan ya niyaplika o naalig.

23, 24. (a) Antoy usar na kahon ya “Saray Tepet Parad Pandalepdep”? (b) Panon ya makatulong so pandalepdep pian lalo tayon onapit ed Dios?

²³ Onggapo ed sayan kapitulo, walay kahon ya say title to et “Saray Tepet Parad Pandalepdep.” Say sakey  ya alimbawa et atay  kahon ya walad pahina 28. Saray tepet tan teksto ditan et aliwan pinagka-rebyu na kapitulo. Imbes, makatulong iratan pian nadalepdep mon maong iray importantin punto. Anto siri gawaen mo? Basam iray teksto tan say tepet, dalepdep mo iratan, insan mo ebatan so tepet. Ompan labay moy man-research. Sarag mo met ya itepet iraya ed sarilim: ‘Antoy naaralan kod saya tungkol ed si Jehova? Panon ko iyan niyaplika ed sarilik? Panon ko iyan nausar pian tulongan so arum?’

²⁴ Makatulong so ontan ya aralem a panagnonot pian lalon onapit so liknaan tayo ed si Jehova. Akin ey? On ta ibabaga na Biblia ya walay koneksion na panagdalepdep tan puso. (Salmo 19:14) No sankanonot tan papablien tayo ray nanaaralan tayo tungkol ed Dios, ontagos itan ed puso tayo, tan apektaen toy nonot, liknaan, tan kakikiwas tayo. Onaralem so panangaro tayo ed Dios tan atan so mamakiwas ed sikatayon mas paliketen so best Friend tayo. (1 Juan 5:3) Pian magmaliw tayon close ed si Jehova, kaukolan tayon amtaen iray kualidad tan personalidad to. Pantongtongan tayo nin unona balet so inkasanto na Dios, tan no akin ya makatulong itan pian onapit so liknaan tayo ed sikato.