1, 2. Anton pasingawey so anengneng nen Isaias, tan antoy naaralan tayo ed satan tungkol ed si Jehova?

 ABIGBIGLA si Isaias nen anengneng toy sakey a pasingawey ya nanlapud Dios. Singa tudtua so eksena! Kanian insulat nen Isaias ya “anengneng [to si] Jehova” ya akayurong ed maglorian trono To. Asakbongan na saloy na kawes nen Jehova so maawa-awang ya templo diad Jerusalem.​—Isaias 6:1, 2.

² Abigbigla met si Isaias ed arengel to​—wala ray mangakansion. Diad kakasil na pangakansion da, yinmugayog anggad pundasyon na templo. Saray serapin manaya so mangakansion, mabisbiskeg irayan espiritu, tan atagtagey so rangko da. Simpli labat so liriko na ikakansion da, pero balibali mensahe to: “Masanto, masanto, masanto si Jehova na saray armada. Say interon dalin et napnoy gloria to.” (Isaias 6:3, 4) Amitlo dan binitlad kansion da so salitan “masanto” pian idanet itan, tan duga labat ta si Jehova so sankasantosan. (Apocalipsis 4:8) Lanang ya nabibitla so inkasanto nen Jehova diad Biblia. Diad tua, dakel so bersikulon mankaiba so ngaran to tan say salitan “masanto” odino “inkasanto.”

3. Akin et arawrawi liknaan na dakel ed Dios?

³ Malinew sirin ya say sakey ed saray sankaimportantian ya labay nen Jehova ya natalosan tayo tungkol ed sikato et say inkasanto to. Pero, aliway pakatalos na dakel ed inkasanto. Iisipen na arum ya say sakey ya  masanto et amay mantunong-tunongan odino mankunkunwarin makadios. Saray arum balet ya abebbebay pakanengneng dad sarili da et manaalangan ya onapit ed masanton Dios ta pakalikna da, anggapoy karapatan da. Kanian arawrawi liknaan dad Dios. Makapaermen ta say inkasanto na Dios komon so rason pian onapit irad sikato. Akin ey? Antis tayon ebatan itan, pantongtongan tayo ni no anto so tuan inkasanto.

4, 5. (a) Antoy labay ya ibaga na “inkasanto” tan antoy agto labay ya ibaga? (b) Antoy duaran importantin rason no akin ya “biig” si Jehova?

⁴ No imbagan masanto so Dios, agto labay ya ibagan sikatoy malastog tan abebbebay pakanengneng tod arum. Diad tua, kabkabusol to ’tan. (Proverbio 16:5; Santiago 4:6) Kanian anton talagay labay ya ibaga na “masanto”? Diad Biblia, say Hebreon salita parad masanto et mankabaliksan na “biig.” Diad panagdayew, say “masanto” et ibibiig ed saray ordinaryon uusaren ta sagrado itan. Say sakey nin labay ya ibaga na masanto et malinis. Panon iyan onaplika ed si Jehova? Kasin sikatoy “biig” o arawdawi ed sikatayo ran aliwan perpekton totoo?

⁵ Andi. Impaseguro nen Jehova, say “Masanton Dios na Israel,” ya kaiba to ray Israelita anggano makasalanan ira. (Isaias 12:6; Oseas 11:9) Kanian anggano masanto, agto iyaarawi sarili to ed saray mandadayew ed sikato. Akin balet et nibagan “biig”? Niay duaran importantin rason. Unona, sikatoy biig odino duma ed amin ya pinalsa ta sikato labat so Sankatagyan. Say  kalinisan to et perpekto, permanente, tan anggapoy makapipara. (Salmo 40:5; 83:18) Komadua, agbalot mankakasalanan si Jehova, kanian sikatoy biig ed kasalanan. No isipen tayo itan, talagan napabiskeg itayo. Akin ey?

6. Akin et makapabiskeg ya naamtaan ya agbalot mankasalanan si Jehova?

⁶ Manbibilay tayo ed mundon mataltalag so tuan masanto. Nibagan agmalinis iray totoon agda kabat so Dios ta mankakasalanan ira tan aliwa ran perpekto. Kailangan tayon amin ya labanay tendensia tayon mankasalanan. No ag-itayo manalwar, matmainomay tayoy makagawa na makapuy. (Roma 7:15-25; 1 Corinto 10:12) Pero ag-itan balot nagawa ed si Jehova. Agbalot mankasalanan so Dios tan agmanggawa na anggan melag labat ya kaugsan. Atan so sakey nin rason no akin ya si Jehova so sankamaongan ya Ama tan napanpiyaan tayo. Aliwan singa saray totoon ama ya agperpekto, agmagmaliw ya matila o mauges si Jehova, tan agto met abusoen so autoridad to. Lapud inkasanto to, imposiblin manggawa na ontan. No maminsan ni ingen, uusaren nen Jehova so inkasanto to pian sambaan ya tooren to ray sipan to, ta say inkasanto to so sankaabigan ya rason na pantiwala ed sikato. (Amos 4:2) Di ba makapabiskeg itan ya naamtaan?

7. Akin et nibagan sipor lan masanto si Jehova?

⁷ Sipor lan masanto si Jehova. Antoy labay ton ibaga? Bilang alimbawa, imanoen tayoy salita ya “too” tan “aliwan perpekto.” Agtayo nideskribe so too no agtayo ibagan aliwan perpekto. Diad saray gagawaen, kakikiwas, tan iisipen tayo, sankalikas ya aliwa tayon  perpekto. Pero no say pantongtongan et say salitan “Jehova” tan “inkasanto,” nibagan mankonektaan itan ta amin ya bengatlan tungkol ed Dios et malinis, matua, tan maptek. Agtayo nakabat ya maong si Jehova no agtayo natalosan no anto so “inkasanto.”

8, 9. Antoy prueba ya tutulongan nen Jehova iray totoo ya magmaliw a masanto anggano aliwa ran perpekto?

⁸ Lapud masanto si Jehova ed amin ya aspekto, nibagan sikatoy panlalapuan na amin ya inkasanto. Agto sosoloen itan ya balibalin kualidad, imbes labalabay ton ikdan met so arum. Kanian nen akitongtong ed si Moises panamegley na sakey ya anghel diad mandarlang ya masabit a kiew, ultimon amay dalin et nagmaliw ya masanto ta wadman so presensia To!​—Exodo 3:5.

⁹ Sarag kasi na aliwan perpekton too so magmaliw ya masanto diad tulong nen Jehova? On, diad limitado o relatibon paraan. Imbaga na Dios ed saray Israelita ya sarag day magmaliw a “masanton nasyon.” (Exodo 19:6) Inikdan to ra na klase na panagdayew ya malinis odino masanto. Kanian diad samay Ganggan ya inter na Dios panamegley nen Moises (odino Mosaikon Ganggan), aminpigan abitla so inkasanto. Diad tua, diad turbante na atagey ya saserdote, sankanengneng na amin imay masileng a metal ya gawad puron balitok tan akaukit ditan so salitan: “Masanto si Jehova.” (Exodo 28:36) Kanian labay nen Jehova ya atagey so estandarte ra ed kalinisan; labay ton malinis so panagdayew tan kabibilay da. Imbaga tod sikara: “Nepeg kayon magmaliw a masanto, ta siak, si Jehova  a Dios yo, et masanto.” (Levitico 19:2) No gawaen na saray Israelita so anggaay nayarian da ya unoren so bilin na Dios, ipasen to ran masanto, anggano aliwa ran perpekto.

10. Antoy pandumaan na panagdayew na saray Israelita nensaman ed saray kakaabay dan bansa?

¹⁰ Duman maong so inkasanto na panagdayew na Israel ed saray kakaabay dan bansa. Saraman ya paganon bansa et mandadayew ed gawagawa odino inimbento labat a dirios, ya kabkabat a maruksa, masiblet, tan imoral. Anggapoy anggan melag labat ya inkasanto ra, tan saray mandadayew ed saratan a dirios et aliwa met ya masanto. Kanian pinasakbayan nen Jehova iray lingkor to ya ombiig irad saray pagano tan ed saray marutak ya ritual da.​—Levitico 18:24-28; 1 Arari 11:1, 2.

11. Antoy mangipapanengneng ya masanto (a) iray anghel? (b) iray serapin? (c) si Jesus?

¹¹ Siempre anggan antoy gawaen na saray Israelita, agda napantayan so inkasanto na walad tawen ya kabiangan na organisasyon na Dios. Saray minilyon ya espiritun pinalsa ya matoor a manlilingkor ed Dios et tinawag ya “samplon libolibo a masanton anghel to.” (Deuteronomio 33:2; Judas 14) Talagan naal-alig da so maliwliwawa, malinlinis, marakdakep ya inkasanto na Dios. Tan natandaan mo ni iramay serapin ya anengneng nen Isaias diad pasingawey? Ipapanengneng na samay ikakansion da ya importante so papel da pian ipaamta ed interon uniberso so inkasanto nen Jehova. Pero walay sakey ya espiritun pinalsa ya mas atagey ed sikaran amin, say bogbogtong odino saksakey ya Anak na Dios. Si Jesus so sankaabigan  ya angalig ed inkasanto nen Jehova. Kanian sikatoy tinawag ya “Masanto na Dios.”—Juan 6:68, 69.

12, 13. (a) Akin et duga labat ya nibagan masanto so ngaran na Dios? (b) Akin et kaukolan ya nalinisan so ngaran o reputasyon na Dios?

¹² Say mismon ngaran na Dios balet ey? Naaralan tayo ed Kapitulo 1 ya satan a ngaran et aliwa labat ya basta titulo odino deskripsion. Irerepresenta na satan si Jehova a Dios, kaibay amin ya kualidad to. Kanian ibabaga na Biblia ya “say ngaran to et masanto.” (Isaias 57:15) Diad Mosaikon Ganggan, patey so dusa ed saramay mamapauges ed ngaran na Dios. (Levitico 24:16) Tan imanoen no antoy imbaga nen Jesus ya sankaimportantian ya ipikasi: “Ama mi a walad tawen, napasanto komon so ngaran mo.” (Mateo 6:9) Pian napasanto, kailangan itan ya igalang tan tratoen ya sagrado. Pero akin et kaukolan nin napasanto so ngaran na Dios anta sipor lan masanto?

¹³ Dineralan na saray mangakalaban ed Dios so masanton ngaran to. Diad Eden, nantila si Satanas, pinapaway ton aliwan patas ya manuley so Dios. (Genesis 3:1-5) Manlapu lad saman, inkayat nen Satanas, say manuuley ed sayan mauges ya mundo, so katilaan tungkol ed Dios. (Juan 8:44; 12:31; Apocalipsis 12:9) Ibabangat na saray relihyon ya aliwan patas so Dios, maruksa kuno tan anggapoy malasakit to. Babasbasan to met kuno iray guerra. Imbes ya idayew day Dios lapud balibali iran pinalsa to, dakel so manisia ed ebolusyon. On, talagan pinauges day ngaran na Dios. Kanian kailangan ya napasanto so ngaran to  pian nipawil so galang ya kanepegan to. Tatalaranan ti la may agew sano nalinisan so ngaran o reputasyon nen Jehova. Gawaen to itan panamegley na Panarian ya uleyan na Anak to, tan malikeliket tayon onsuporta ed satan.

14. Akin et masanto so espiritu na Dios, tan akin et seryoson kasalanan so panmudmora ed satan?

¹⁴ Wala ni sakey ya direktan manlalapud si Jehova ya lanang a tatawagen ya masanto, say espiritu odino aktibon puersa to. (Genesis 1:2) Mabisbiskeg iyan puersa tan uusaren iya nen Jehova pian nasumpal so panlabayan to. Amin ya gagawaen nen Jehova et masanto tan malinis, kanian tinawag so aktibon puersa to ya masanton espiritu. (Lucas 11:13; Roma 1:4) Say panmudmora ed masanton espiritu, amay inggagala ya kontraen so panlabayan nen Jehova, et kasalanan ya agnaperdona.​—Marcos 3:29.

15. Lapud masanto si Jehova, antoy dapat ya nalikna tayo ed sikato?

¹⁵ Aliwa sirin ya mairap ya talosan no akin ya impankonektaan na Biblia so inkasanto na Dios tan say pandinayew odino dugan itakot ed sikato. Singa bilang, ibabaga na Salmo 99:3: “Idayew da komon so maglorian ngaran mo, ta makapadinayew tan masanto itan.” Labay ton ibaga, kailangan tayon respetoen so Dios tan say ngaran to. Duga labat itan ta agtayo makakiking ed inkasanto na Dios. Malinlinis tan marakdakep so inkasanto to. Pero, agtayo dapat onarawi. Atan ingen so rason no akin ya onasingger itayo ed sikato. Akin ey?

16. (a) Akin et nibagan marakdakep so inkasanto? Mangiter na alimbawa. (b) Panon ya indeskribe na Biblia so karakpan na masanton Dios tayo?

 ¹⁶ Ibabaga na Biblia ya marakdakep so inkasanto. Diad Isaias 63:15, indeskribe so tawen ya ayaman na Dios a “kawalaan na kasantosan tan gloria [odino “karakpan,” paimanod leksab].” Labalabay tayon nengnengen iray marakdakep ya bengatla. Singa bilang, piimanom pa ’tay litrato ed pahina 39. Di ba marakdakep tan labalabay mon nengnengen? Malinlinew so danum, tan seguradon malinlinis so dagem, asul tan maliwliwawa so tawen. Pero no napnoy basura so danum, sinulat-sulatan iray kakiewan tan angkakabaleg ya bato, tan ambanget so kaliberliber, seguradon agmo la labay ditan, onarawi ka la. Normal ed sikatayo so narakepan ed saray bengatlan malinis, maaliwalas, tan maliwawa. Ontan so inkasanto nen Jehova. Kampega lan labalabay tayo ray nababasa tayon balibalin deskripsion to! Masmasnag ya singa liwawa, mankirlap ya singa mablin bato, mandarlang ya singa apoy, tan mankirlap ya singa metal—ontan so gloria o karakpan na masanton Dios tayo.—Ezequiel 1:25-28; Apocalipsis 4:2, 3.

17, 18. (a) Nen unaan, antoy epekto ed si Isaias na anengneng ton pasingawey? (b) Antoy impagawa nen Jehova ed sakey ya serapin pian naligliwa si Isaias, tan antoy labay ya ibaga na satan?

¹⁷ Pero lapud inkasanto nen Jehova, duga kasi ya nalikna tayon melmelag tayo no ikomparad sikato? On siempre, ta talagan anggapo tayo no ikompara ed sikato, talagan melmelag itayon maong. Labay to kasin ibaga, agtayo lan balot makaasingger ed Dios? Antoy reaksion nen Isaias nen arengel to iramay serapin  ya ikakansion day inkasanto nen Jehova? Inkuan to: “Pakaskasi ak la! Singa ak la inatey, ta aliwan malinis so panagsalitak, tan manaayam ak a kaiba na saray totoon aliwan malinis so panagsalita ra; ta anengneng kon mismo so Ari, si Jehova na saray armada!” (Isaias 6:5) Nen anengneng nen Isaias so inkasanto nen Jehova, alikna to ya sikatoy makasalanan tan aliwan perpekto. Diad gapo et adismaya, pero agpinaulyanan nen Jehova ya ontan so nalikna to.

¹⁸ Imbakin tampol nen Jehova so sakey a serapin pian ligliwaen si propetan Isaias. Antoy ginawa na saman ya mabisbiskeg ya espiritu? Linmad altar, angala na ngalab, tan indelnet tod bibil nen Isaias. No isipen tayo, singa asakitan laingen si Isaias imbes ya napaseseg. Pero tandaan tayo ya pasingawey itan, walay labay ton ibaga. Matoor ya Judio si Isaias, kanian kabisado to ray inagew-agew ya iyaapay ed altar na templo pian naperdona iray kasalanan. Maar-aron impanonot na serapin ed propeta ya anggano sikatoy aliwan perpekto, “aliwan malinis so panagsalita” to, siansia nin sikatoy nayarin ipasen nen Jehova ya malinis. a On, anggano makasalanan so too, sarag toy magmaliw ya masanto diad limitadon paraan.—Isaias 6:6, 7.

19. Akin et sarag itayon ituring nen Jehova ya masanto, anggano aliwa tayon perpekto?

¹⁹ Anggad natan et ontan ni panmoria nen Jehova ed sikatayo. Amin iramay bagat ya inyapay diad altar ed Jerusalem et ipapaimano toy mas importantin  bagat, say perpekton bilay ya insakripisyo nen Jesu-Kristo nen 33 C.E. (Hebreo 9:11-14) No talagan pagbabawian tayo ray kasalanan tayo, no ipetek tayo ray lingo tayo, tan no manisia tayo ed satan ya bagat, naperdona itayo. (1 Juan 2:2) On, labay itayo met ya ituring nen Jehova ya malinis. Kanian oniay impanonot nen apostol Pedro ed sikatayo: “Nisulat: ‘Nepeg a magmaliw kayon masanto, lapud masanto ak.’” (1 Pedro 1:16) Imanoen ya ag-imbaga nen Jehova ya magmaliw kayon masanto ya singa siak. Ag-iilaloan nen Jehova ya gawaen tayo so imposible. (Salmo 103:13, 14) Imbes, say imbaga to et magmaliw kayon masanto lapud masanto ak. “Bilang inad-aro ton ananak,” gagawaen tayoy anggaay nayarian tayon aligen so Dios, anggano aliwa tayon perpekto. (Efeso 5:1) Say pagmaliw ya masanto sirin et tuloytuloy ya proseso. Legan tayon ontatatken ed espiritual, pankikimeyan tayo ed inagew-agew so “magmaliw [ya] lalon masanto.”—2 Corinto 7:1.

20. (a) Akin et importantin natalosan tayo ya sarag itayo manayan ituring ya malinis na masanton Dios tayo? (b) Antoy epekto ed si Isaias nen naamtaan ton naperdona iray kasalanan to?

 ²⁰ Papablien nen Jehova so inkatunong tan kalinisan. Kabusol toy kasalanan. (Habacuc 1:13) Pero agto tayo kabusol. Basta aligen tayoy pangipapasen to ed kasalanan​—busolen tayo so mauges tan aroen tayo so maong—​tan pansagpotan tayon aligen so alimbawa nen Kristo Jesus, perdonaen nen Jehova iray kasalanan tayo. (Amos 5:15; 1 Pedro 2:21) No natalosan tayo ya sarag itayo manayan ituring ya malinis na masanton Dios tayo, balibali epekto tod sikatayo. Natandaan mo ni may reaksion nen Isaias nen anengneng toy inkasanto nen Jehova? Alikna ton sikatoy aliwan malinis. Say kuan to: “Pakaskasi ak la!” Pero nen atalosan to ya sikatoy naperdona, anguman so panmoria to, apabiskeg. Kanian nen nantepet si Jehova no siopay nayarin manbulontaryo ed sakey ya asainmin, nampresentan tampol si Isaias anggano agto ni amta may pagawa. Say kuan to: “Wadia ak! Ibaki mo ak!”—Isaias 6:5-8.

21. Akin et segurado tayon sarag tayoy magmaliw ya masanto?

²¹ Ginawa itayo ed indengan na masanton Dios, kanian sarag tayon aligen iray kualidad to tan onapit ed sikato. (Genesis 1:26) Walay potensyal tayon amin ya magmaliw a masanto. No pansagpotan tayoy magmaliw ya masanto, tulongan itayon tulongan nen Jehova. Say resulta et lalon onapit so liknaan tayo ed masanton Dios tayo. Diad onsublay iran kapitulo, legan tayon aaralen iray kualidad nen Jehova, naamtaan tayo ni ray amayamay tan balibalin rason no akin ya onapit itayo ed sikato!