1, 2. Anto ran peligro so inarap na saray Israelita nen paonla la rad Insipan a Dalin nen 1513 B.C.E., tan panon ya pinakasil nen Jehova so liknaan da?

 NEN paarap la ray Israelita ed Insipan a Dalin nen 1513 B.C.E., delikado so dalanen da diad rehyon na Sinai ta kailangan day manakar ed “baleg [odino maawang] tan makapataktakot a kalawakan, a wala ray maditan uleg tan alakdan.” (Deuteronomio 8:15) Napepeligro met ira ta ompan atakien ira na saray marukruksan bansa ya mangakalaban ed sikara. Si Jehova so angiyakar ed sikara diman. Kanian bilang Dios da, protektaan to ra kasi?

² Kinmasil so liknaan da nen imbaga nen Jehova: “Anengneng yon mismo so ginawak ed saray Ehipsio, tan no panon so impangawit kod sikayo a singa wala kayod saray payak na agila tan inyasingger ta kayod siak.” (Exodo 19:4) Impanonot nen Jehova ed totoo to no panon to ran indepensa ed saray Ehipsio, ya singa agila ya angawit ed sikara pian iligtas to ra. Pero wala ni arum a rason no akin ya dugarugan ilustrasyon iray “payak na agila” ed iiter na Dios ya proteksion.

3. Akin ya dugarugan ilustrasyon iray “payak na agila” ed iiter na Dios ya proteksion?

³ Aglabat uusaren na agila iray balbaleg tan mabiskeg ya payak to pian ontikyab. Diad kakkaktangan na agew, ibuskag na inan agila iray payak to​—ya nayarin  sabien toy masulok ya duaran metro—​pian tarongan iray sibong to. No maminsan, isakbong to ray payak to ed saray sibong to pian ag-ira naketel ed ambetel ya dagem. Singa say agila ya proprotektaan to ray sibong to, ontan met si Jehova, inyagel tan prinotektaan to so anggapoy kalaban-laban ya bansan Israel. Diad kalawakan, tuloytuloy ton protektaan iray totoo to basta mansiansia ran matoor ed sikato. (Deuteronomio 32:9-11; Salmo 36:7) Natan balet ey? Kasin protektaan itayo met na Dios?

4, 5. Akin et segurado tayon tooren nen Jehova so promisa ton protektaan iray totoo to?

⁴ Sarasarag ya protektaan nen Jehova iray lingkor to. Sikatoy “Dios a Makapanyarin-amin”​—deskripsion a mangipapanengneng ya anggapoy makatalo ed pakapanyari to. (Genesis 17:1) Singa say daluyon ya agnapatunda, anggapoy makapigil ed pakapanyari nen Jehova. Lapud sarag nen Jehova ya gawaen so anggan anto, nayarin nitepet tayo, ‘Usaren met kasi nen Jehova so pakapanyari to pian protektaan iray totoo to?’

⁵ Say ebat et on! Ipapaseguro nen Jehova ya protektaan to ray totoo to. “Say Dios so salimbengan tan biskeg tayo, mainomay a nakerewan na tulong diad panaoy gonigon,” so ibabaga na Salmo 46:1. Lapud ‘agnayarian na Dios so mantila,’ tooren ton tooren so promisa to ya protektaan to tayo. (Tito 1:2) Pantongtongan tayo so arum ed saray ilustrasyon no panon ya proprotektaan nen Jehova iray totoo to.

6, 7. (a) Panon ya proprotektaan na pastol iray karnero to? (b) Panon ya impanengneng na Biblia ya labalabay nen Jehova ya protektaan tan asikasoen iray karnero to?

 ⁶ Si Jehova so Pastol tayo, tan “sikatayo ray totoo to tan karnero a walad panagpastolan to.” (Salmo 23:1; 100:3) Kailangan na saray karnero so proteksion. Nabasa tayod Biblia ya makpel ya iyaagel na saray pastol iray karnero ed saray leon, lobo, oso, ontan met ed saray matatakew. (1 Samuel 17:34, 35; Juan 10:12, 13) Pero aliwan satan labat so proteksion ya iiter na pastol. Wala ray panaon ya kailangan na karnero so maalagan pastol. Singa bilang, panon to no say sakey ya karnero et nananak tan arawi ed kulongan? Kailangan ya bantayan na pastol imay makapkapuy ya ina. Insan to alaen may kapangiyanak ya kordero tan iyakar tod kulongan.

⁷ Lapud inkompara nen Jehova so sarili to ed sakey ya pastol, ipapaseguro tod sikatayo ya labalabay to tayon protektaan. (Ezequiel 34:11-16) Natandaan mo ni may deskripsion ed si Jehova diad Isaias 40:11, ya naaralan tayo ed Kapitulo 2 na sayan libro? Say kuan to: “Asikasoen toy pulok to a singa sakey a managpastol. Tiponen to iray kordero diad panamegley na taklay to, tan awiten to ra diad pagew to.” Akin et walad “pagew” (odino tupi ya bandad pagew na kawes) na pastol so melag a kordero? Panon ton agawa man? Nayarin inmasingger may kordero, tan dinapdapigas to ni ingen so bikking na pastol. Pero, amay pastol so yinmuko, angalsa ed samay kordero, tan maalwar ton inkarga ed pagew to. Ipapanengneng na sayan balibalin ilustrasyon ya labalabay na Manunan Managpastol tayo ya iyagel tan protektaan itayo!

8. (a) Base ed Proverbio 18:10, siopa ray angipromisaan na Dios ya protektaan to? (b) Antoy labay ya ibaga na pasalimbengan ed ngaran na Dios?

 ⁸ Amay impromisa na Dios ya proteksion et para labat ed saray malabay ya onapit ed sikato. Ibabaga na Proverbio 18:10: “Say ngaran nen Jehova et sakey a mabiskeg a tori. Ditan ombabatik so matunong tan naproprotektaan.” Nensaman, wala ray tori ya impapaalagey diad kalawakan ya nabatikan na saray napepeligro. Pero akauley lay sakey no labay toy onla ditan pian naprotektaan. Ontan met, no labay tayoy pasalimbengan ed ngaran na Dios, agto labay ya ibagan ulit-uliten tayon bitlaen so ngaran na Dios; ta aliwa itan ya anting-anting. Imbes, kaukolan tayon kabaten tan pantiwalaan so Akan-ngaran ed satan tan tumboken iray matunong ya estandarte to. Talagan maar-aro si Jehova. Ipapaseguro to ya no mantiwala tayod sikato, sikatoy magmaliw ya singa tori ya manprotekta ed sikatayo!

9. Panon tayon nibaga ya aglabat angangga ed salita si Jehova?

⁹ Aglabat angangga ed salita si Jehova. Imbes, totooren toy promisa to. Singa bilang, nabasa tayod Biblia ya sikatoy nanggawa na saray milagro pian protektaan iray totoo to. Nensaman, indepensa na mabisbiskeg ya ‘lima’ nen Jehova so bansan Israel ed saray makapanyarin mangakalaban ed sikara. (Exodo 7:4) Pero, uusaren met nen Jehova so pakapanyari ton manprotekta pian iligtas iray indibidual.

10, 11. Anto ran alimbawa ed Biblia so mangipapanengneng ya uusaren nen Jehova so pakapanyari ton manprotekta parad saray indibidual?

¹⁰ Nen agdinmakmomo so taloran Hebreon kabataan  ya si Sadrac, Mesac, tan Abednego ed imahen a balitok nen Arin Nabucodonosor, amasnok so ari tan binantaan to ran ibuntok ed mandarlang ya hurno. “Siopan dios so makapangiliktar ed sikayo ed limak?” so inkantiaw nen Nabucodonosor, say sankamakapanyarian ya ari ed saman. (Daniel 3:15) Segsegurado iramay taloran kabataan ya sarasarag iran iligtas na Dios da, pero diad saman a pankanawnawa et ag-ira maniilalon gawaen to ’tan parad sikara. Kanian oniay inyebat da: “No ontan so nagawa, O Ari, say Dios a panlilingkoran mi so makayarin mangiliktar ed sikami.” (Daniel 3:17) Anggano aminpiton beses ya pinapetang so hurno nen say dati, aliwa itan ya problema ed Makapanyarin-amin ya Dios da. Talagan prinotektaan to ra, kanian apilitan so ari ya aminen: “Anggapoy arum a dios a makapangiliktar a singa saya.”​—Daniel 3:29.

¹¹ Impanengneng met nen Jehova so makapadinayew ya pakapanyari ton manprotekta nen inyalis toy bilay na saksakey ya Anak to diad panag-anakan na Judion birhen ya si Maria. Imbaga na anghel ed si Maria: “Manlukon ka tan mangiyanak kay sakey a laki.” Impaliwawa na anghel: “Niwalad sika so masanton espiritu, tan tarongan kay pakayari na Sankatagyan.” (Lucas 1:31, 35) Atan so panaon ya kakkaukolan na Anak na Dios so proteksion. Natawir kasi na agni niyanak ya ugaw so kasalanan tan ag-inkaperpekto na ina to? Nasakitan o napatey kasi nen Satanas so agni niyanak ya ugaw? Imposible! Prinotektaan nen Jehova si Maria manlapud impannginew to ya anggad niyanak so ugaw. Kanian agnipasad ugaw so ag-inkaperpekto, ag-asakitan, ag-apatey na too odino demonyo. Prinotektaan nen Jehova si Jesus anggad imbaleg to. (Mateo 2: 1-15) Tan anggad agni asabi may panaon ya kailangan lan iter nen Jesus so bilay to, prinotektaan nen Jehova so inad-aro ton Anak.

12. Akin et mamilagron prinotektaan nen Jehova iray pigaran indibidual nensaman?

¹² Akin et mamilagron prinotektaan nen Jehova so pigaran indibidual? Pian seguradon nasumpal so panlabayan to. Mas importante itan nen say anggan siopan too. Singa bilang, kailangan ya naprotektaan so ugaw nin Jesus pian nasumpal so gagala na Dios tan nabendisyonan so amin ya totoo. Sinegurado nen Jehova ya nisulat ed Biblia iray dakel ya alimbawa na impanprotekta to ed saray lingkor to. “Insulat [iraya] pian nibangat itayo, pian diad panagsungdo tayo tan diad ligliwa a manlalapud Kasulatan et nawalaan itayo na ilalo.” (Roma 15:4) Lapud sarayan alimbawa, ombibiskeg so tiwala tayo ed Makapanyarin-amin a Dios. Pero, anton proteksion so iiter na Dios natan?

13. Kasin obligado si Jehova ya manggawa na saray milagro parad sikatayo? Ipaliwawa.

¹³ Amay promisa na Dios ya proteksion et agto labay ya ibagan obligado si Jehova ya manggawa na saray milagro parad sikatayo. Agto ipropromisa ya anggapo lay problema tayo ed sayan mauges ya mundo. Nai-eksperiensya na dakel ya matoor a lingkor nen Jehova iray graben problema, kaiba lay irap, guerra, sakit, tan patey. Imbaga nen Jesus ya wala ray disipulo to ya pateyen lapud pananisia da. Kanian pinaseseg to ra ya mananos anggad anggaan. (Mateo 24:9, 13) No lanang ya mamilagron protektaan nen Jehova  iray lingkor to, seguradon kantiawan nen Satanas tan ibaga to ya manlilingkor tayo labat ed Dios lapud proprotektaan To itayo.​—Job 1:9, 10.

14. Anto ray alimbawa ya mangipapanengneng ya nandurumay paraan na pamproprotekta nen Jehova ed saray lingkor to?

¹⁴ Anggan nensaman, ag-inusar nen Jehova so pakapanyari ton manprotekta pian agnapatey so kada lingkor to. Singa bilang, si apostol Santiago et pinatey nen Herodes nen manga 44 C.E.; pero ag-abayag, inligtas To ed “lima nen Herodes” si Pedro. (Gawa 12:1-11) Tan si Juan, ya agi nen Santiago, et mas andukey so impanbilay to nen si Pedro tan Santiago. Malinew ya agtayo dapat ilaloan ya parepareho so paraan na pamprotekta na Dios ed amin ya lingkor to. Sakey ni, amin tayo et naaapektoan na “panaon tan saray ag-iilaloan a nagawa.” (Eclesiastes 9:11) Panon itayo sirin ya proprotektaan nen Jehova natan?

15, 16. (a) Antoy ebidensya ya proprotektaan nen Jehova so bilay na saray mandadayew ed sikato bilang grupo? (b) Akin et segurado tayon protektaan nen Jehova iray lingkor to natan tan diad “baleg a kairapan”?

¹⁵ Unona, pantongtongan tayo so tungkol ed pisikal ya proteksion. Proprotektaan nen Jehova so bilay na saray lingkor to bilang grupo. Ta no andi, matmainomay itayon upoten nen Satanas. Si Satanas so “manuley na sayan mundo,” tan labalabay ton naandi so dugan panagdayew. (Juan 12:31; Apocalipsis 12:17) Wala ray makapanyarin gobierno ya imbawal day panagpulong tayo tan sinali da tayon upoten. Pero, agtinmakot iray totoo nen Jehova, nampulong ni ran siansia! Akin  et agnapatunda na saray mabiskeg ya bansa so panagpulong ya kimey na sayan melag tan singa anggapoy kalaban-laban ya grupo na saray Kristiano? On ta prinotektaan itayo nen Jehova, inyamot to tayo ed saray makapanyarin payak to!—Salmo 17:7, 8.

¹⁶ Diad “baleg a kairapan” ey? Kasin protektaan nen Jehova so bilay tayo? Agtayo kailangan so ontakot no deralen la na Dios iray mauges ya totoo. Ta “amta nen Jehova no panon ya iliktar ed subok iray totoon walaan na debosyon ed Dios, tan igana ed kadederal iray agmatunong a totoo diad agew na panangukom.” (Apocalipsis 7:14; 2 Pedro 2:9) Anggad agni ’tan agawa, nia so segurado tayo: Unona, agan balot abuloyan nen Jehova ya naupot iray matoor ya lingkor to. Komadua, bendisyonan to na bilay ya anggapoy anggaan diad balon mundo iray matoor ed sikato​—tan no bilang ta ompatey ira, bilayen to ra lamet. Kanian anggan saramay inatey la et aprotektaan ta anggapo lay mas ligtas ya pasen nen say diad memorya na Dios.​—Juan 5:28, 29.

17. Panon itayon proprotektaan nen Jehova panamegley na Salita to?

¹⁷ Natan ni labat et proprotektaan itayo la nen Jehova panamegley na mabilay ya “salita” to. Makapanyari itan ta sarag ton umanen so bilay tayo tan magmaliw a maliket. (Hebreo 4:12) No unoren tayoy ibabaga na Biblia, naprotektaan so bilay tayo. Ibabaga na Isaias 48:17: “Siak si Jehova . . . , say mangibabangat ed sika pian nagunggonaan ka.” On, no iyaplika tayo ray nanaaralan tayod Salita na Dios, napaliisan tayo ray maneral ed laman tan ondukey so bilay tayo. Singa bilang, lapud iyaaplika tayoy bilin na Biblia ya arawian  so seksual ya imoralidad tan linisan tayoy sarili tayo ed amin a karutakan na laman, papaliisan tayo ray marutak ya bisyo tan makapasakit ya kagagawa ya manederal ed bilay na dakel ya totoo. (Gawa 15:29; 2 Corinto 7:1) Misatsalamat tayo ta proprotektaan itayo na Dios panamegley na Salita to!

18. Panon ya proprotektaan nen Jehova so espiritualidad tayo?

¹⁸ Say sankaimportantian, iiter nen Jehova so espiritual ya proteksion. Gagawaen itan na maaron Dios tayo diad pangiiter tod saray nakaukolan tayo pian nasarag tayo ray subok tan agnaderal so espiritualidad o relasyon tayo ed sikato. Paraan itan nen Jehova pian aglabat naprotektaan so bilay tayo ed pigaran taon, noagta diad andi-anggaan. Anto ray pigaran itatarya na Dios pian naprotektaan itayo ed espiritual?

19. Panon itayon tutulongan na espiritu nen Jehova pian nasarag tayo so anggan anton subok?

¹⁹ Si Jehova so “Dumerengel na pikakasi.” (Salmo 65:2) No singa agtayo la sarag iray problema tayo, ibaga tayo ed si Jehova so amin ya walad puso tayo pian nainawaan itayo. (Filipos 4:6, 7) Nayarin agto mamilagron ekalen iray problema tayo, pero bilang ebat ed impapuson pikakasi tayo, ikdan to tayo na karunongan pian nasarag iratan. (Santiago 1:5, 6) Aliwan satan labat, iikdan met nen Jehova na masanton espiritu iramay onkekerew ed sikato. (Lucas 11:13) Tan satan ya mabisbiskeg ya espiritu to so ontulong pian nalampasan tayo ray subok tan problema. Sarag to tayo met ya ikdan na “pakayari . . . a mas mabiskeg nen  say pakayari na too” pian makapan-anos tayo anggad ekalen to lan amin iray mair-irap ya problema tayo. Asingsingger lan nagawa itan diad balon mundo.​—2 Corinto 4:7.

20. Panon ya uusaren nen Jehova iray agagi pian protektaan itayo?

²⁰ No maminsan, uusaren nen Jehova iray agagi pian protektaan itayo. Pankakasakeyen nen Jehova iray totoo to diad interon mundo. (1 Pedro 2:17; Juan 6:44) Say aroan tayon sanaagi so prueba ya onkikiwas so masanton espiritu na Dios ed sikatayo pian manggawa tayo na maabig. Atan met ya espiritu so ontutulong pian nawalaan tayo na balibali iran kualidad, ya singa say aro, kaabigan, tan kamaongan. (Galacia 5:22, 23) Kanian no naaaburido tayo, tan binilin o pinaseseg itayo na sakey ya agi, misalamat tayo ed si Jehova ta prueba itan na maaron proteksion to ed sikatayo.

21. (a) Anto ran nipanpanaon ya espiritual ya naakan so itatarya nen Jehova panamegley na “matoor tan makabat ya aripen”? (b) Panon kan agunggonaan ed saray iiter nen Jehova ed sikatayon espiritual ya proteksion?

²¹ Wala ni ray iiter nen Jehova pian protektaan to tayo: saray nipanpanaon ya espiritual ya naakan. Pian napabiskeg itayo na Salita to, tinuro to so “matoor tan makabat ya aripen” ya mangitarya na espiritual a naakan tayo. Itatarya na matoor ya aripen iray publikasyon, a singa Say Panag-bantayan tan Onliing! ontan met ed say website tayo ya jw.org, saray aral, asemblea, tan kombension pian niiter so kailangan tayon “naakan . . . diad dugan panaon.” (Mateo 24:45) Asalim lay apabiskeg ed aral—nayarin diad komento, paliwawa,  odino pikakasi​—diad panaon ya kakkaukolan mo? Wala tay abasam ya article ya agmo nalinglingwanan ta dugaruga ed situasyon mo? Tandaan, amin iratan et iiter nen Jehova pian naprotektaan itayo ed espiritual.

22. Antoy lanang ya panguusaran nen Jehova ed pakapanyari to, tan akin et parad pankaabigan tayo itan?

²² Talagan si Jehova et samper “ed amin a manpapasalimbeng ed sikato.” (Salmo 18:30) Tua, ag-itayo iyaagel nen Jehova ed amin ya problema tan irap natan. Pero, lanang ton uusaren so pakapanyari ton manprotekta pian nasumpal so panlabayan to. Tan parad pankaabigan tayo met lanlamang so amin ya gagawaen to. No onapit tayod sikato tan mansiansia tayo ed panangaro to, iter to so perpekto tan anggapoy anggaan ya bilay. No ontan so nonoten tayo, ituring tayo so anggan anton irap ed sayan mundo ya “magano tan anlemew” labat.​—2 Corinto 4:17.