Manpili na saray simplin ilustrasyon. Singa si Jesus, mangusar kay simpli iran bengatla pian ipaliwawa iray komplikadon bengatla, tan saray mainomay a bengatla pian ipaliwawa iray mairap ya bengatla. Agmo aaruman na saray detalye ya pagmaliwen ton komplikado so ilustrasyon. Seguroen ya saray detalye na ilustrasyon et talagan onaplika ed punto ya ibabangat mo, pian agnabalang iray ondedengel lapud saray ag-onkonekta ya detalye.

Nonoten iray ondedengel. No manpili kay ilustrasyon, usaren iray bengatla ya kabisado na saray ondedengel tan makapainteres ed sikara. Seguroen ya ag-ira nabaingan odino naopendi ed ilustrasyon mo.

Ibangat so manunan punto. Iyilustra iray manunan punto, aliwan saray angkelag ya detalye. Seguroen ya natandaan na saray ondedengel so naaralan dad ilustrasyon aliwa labat ya samay ilustrasyon.