1, 2. Antoy gawaen tayo pian mansiansia tayo ed panangaro na Dios?

LABAY tayon mabiskeg ya lanang so laman tayo tan agtayo mansakit. Kanian mamangan tayoy masustansia, regular tayon mani-exercise, tan aasikasoen tayoy laman tayo. Anggano kaukolay sagpot, nalilikna tayon maabig iray resulta, kanian gagawaen tayo nin siansia iratan. Balet importante met ya seguroen tayon agtayo mansakit tan mabiskeg tayo ed sakey nin aspekto na bilay tayo.

² Anggano balibali gapo na pangakabat tayo ed si Jehova, nepeg ya tuloytuloy tayon pabiskegen so relasyon tayo ed sikato. Nen pinaseseg nen Judas iray Kristiano ya ‘mansiansia ra ed panangaro na Dios,’ impaliwawa to no panon dan nagawaan itan. Imbaga to: “Pabiskeg yoy masanton pananisia yo.” (Judas 20, 21) Antoy gawaen tayo sirin pian napabiskeg tayoy pananisia tayo?

3-5. (a) Antoy labay nen Satanas ya naliknam ed saray estandarte nen Jehova? (b) Antoy panmoriam ed saray ganggan tan prinsipyo nen Jehova?

³ Importante ya talagan kombinsido ka ya sankaabigan iray paraan nen Jehova. Labay nen Satanas ya naliknam a mairap ya unoren iray estandarte na Dios tan mas maliket ka no sikay mandesisyon no antoy duga tan aliwa.  Manlapu lad hardin na Eden, sasalien nen Satanas ya panisiaen ed satan iray totoo. (Genesis 3:1-6) Tan anggad natan et papasyaen to nin panisiaen ira.

⁴ Kasin duga si Satanas? Kasin masyadon estrikto iray estandarte nen Jehova? Andi. Bilang ilustrasyon, imadyin mo pan manaakar ka ed balibalin parke. Naimanom ya walay pasen ya asaniban na atagtagey ya padir. Ompan isipen mo, ‘Akin et wadia yan padir?’ Balet biglan walay nadngel mon managlem ya leon diad biek na padir. Anto la natan so panmoriam ed samay padir? Misalsalamat ka ta lapud satan et agka buagen na leon! Saray prinsipyo nen Jehova et singa satan ya padir, tan say Diablo et singa samay leon. Ipapasakbay na Salita na Dios: “Mantultuloy kayon manlikas tan manbantay! Say Diablo a kabusol yo et siber-siber a singa managlem a leon, a manaanap na buagen to.”​—1 Pedro 5:8.

⁵ Labay nen Jehova ya nawalaan tayoy sankaabigan ya bilay. Agto labay ya napalikdo itayo nen Satanas. Kanian sikatoy angiter na saray ganggan tan prinsipyo ya manprotekta tan mamaliket ed sikatayo. (Efeso 6:11) Insulat nen Santiago: “Say toon uusisaen ton maong so ayadyarin ganggan a mangiiter na kawayangan tan mantutultuloy ed satan et . . . magmaliw a maliket ed gagawaen to.”​—Santiago 1:25.

6. Antoy gawaen tayo pian magmaliw itayon mas kombinsido ya sankaabigan iray paraan nen Jehova?

⁶ No tumboken tayo ray direksion nen Jehova, magmaliw ya mas maliket so bilay tayo tan onelet so pikakaaro tayo ed sikato. Singa bilang, nagunggonaan itayo no awaten tayoy imbitasyon ton manpikasi ed sikato. (Mateo 6:5-8; 1 Tesalonica 5:17) Maliket tayo no uunoren tayoy ganggan to ya mantitipon pian mandayew tan manpapasesegan, tan no regular tayon mibibiang ed panagpulong  tan panagbangat. (Mateo 28:19, 20; Galacia 6:2; Hebreo 10:24, 25) No dadalepdepen tayo no panon ya binmiskeg so pananisia tayo lapud saratan, magmamaliw itayon mas kombinsido ya talagan sankaabigan iray paraan nen Jehova.

7, 8. Antoy makatulong pian agtayo masyadon pampagaan iray subok ya nayarin naeksperiensya tayo ed arapen?

⁷ Ompan mapaga tayo ya diad arapen et wala ray mairap ya subok ya naeksperiensya tayo. No ontan so naliliknam, tandaan iyan imbaga nen Jehova: “Siak si Jehova a Dios mo, say mangibabangat ed sika pian nagunggonaan ka, say mangiwawanwan ed sika diad dalan a nepeg mon panakaran. No dengelen mo labat komon iray ganggan ko! Diad ontan, say kareenan mo et magmaliw a singa ilog tan say inkatunong mo et singa saray daluyon na dayat.”​—Isaias 48:17, 18.

 ⁸ No unoren tayoy Jehova, say kareenan tayo et singa ilog ya agnaekatan, tan say inkatunong tayo et singa saray daluyon na dayat ya tuloytuloy ya ombabasig ed gilig na dayat. Anggan antoy nagawa ed sikatayo, makapanmatoor itayo. Insipan na Biblia: “Ipasakbat mod si Jehova so ambelat ya awit mo, tan tulongan to ka. Agton balot paulyan a natumba so matunong.”​—Salmo 55:22.

9, 10. Antoy labay ya ibaga na pagmaliw ya matatken ed espiritual?

⁹ Legan mon papaeleten so relasyon mo ed si Jehova, magmamaliw kan ‘matatken’ ed espiritual. (Hebreo 6:1) Antoy labay ya ibaga na pagmaliw ya matatken ed espiritual?

¹⁰ Anggano naaaruman so edad tayo, aliwan automatiko ya ontatatken tayo met la ed espiritual. Pian ontatken tayo ed espiritual, nepeg ya si Jehova so sankaapitan ya Kaaro tayo tan aligen tayo so panmoria to. (Juan 4:23) Insulat nen Pablo: “Saramay manbibilay unong ed laman et pinonot da ray bengatlan nipaakar ed laman, balet saramay manbibilay unong ed espiritu et saray bengatlan nipaakar ed espiritu.” (Roma 8:5) Say toon matatken ed espiritual et aliwan manuna ed bilay to iray panliliket odino materyal iran bengatla. Imbes, sikatoy akapokus ed panaglingkor tod si Jehova tan duga iray desisyon to. (Proverbio 27:11; basaen so Santiago 1:2, 3.) Agto aabuloyan ya naimpluensyaan a manggawa na mauges. Say too ya matatken ed espiritual et amta to no antoy duga tan desidido ton gawaen itan.

11, 12. (a) Antoy imbaga nen Pablo nipaakar ed ‘pakayarin manebek’ na sakey a Kristiano? (b) Akin ya say pagmaliw a matatken ed espiritual et mipara ed pagmaliw ya atleta?

¹¹ Kaukolan so pansagpot pian ontatken tayo ed  espiritual. Insulat nen apostol Pablo: “Say anawet a naakan et parad saray matatken la, a diad panguusar dad pakayari ran manebek et nipapasal itan a mangibiig ed duga tan aliwa.” (Hebreo 5:14) Nayarin ipanonot ed sikatayo na salitan “nipapasal” so panagpraktis na sakey ya atleta.

¹² No walay nanengneng tayon marundunong ya atleta, amta tayo ya sikatoy abayag a nampraktis pian magmaliw ya marunong. Sikatoy ag-inyanak ya marunong lan atleta. Ta no iyanak so sakey ya ugaw, agto ni amta no panon ton usaren iray lima tan sali to. Balet diad ilabas na panaon, naaralan to lay manbemben tan manakar. Tan no tuloytuloy ya manpraktis, nayarin magmaliw ya atleta. Ontan met, importante so pangipanaon ed pampasal pian ontatken tayo ed espiritual.

13. Antoy makatulong pian naalig tayoy panagnonot nen Jehova?

¹³ Diad sayan publikasyon, naamtaan tayo la no panon tayon naalig so panagnonot tan panmoria nen Jehova. Naaralan tayon apresyaen tan aroen iray estandarte to. No walay desisyonan tayo, itepet tayo ed sarili tayo: ‘Anto ran ganggan o prinsipyo na Biblia so onaplika ed sayan situasyon? Panon kon niyaplika iratan? Antoy labay nen Jehova ya gawaen ko?’​—Basaen so Proverbio 3:5, 6; Santiago 1:5.

14. Antoy gawaen tayo pian ombiskeg so pananisia tayo?

¹⁴ Agtayo tutundaan ya pabiskegen so pananisia tayo ed si Jehova. No panon ya makatulong so pangan na masustansia pian ombiskeg so laman tayo, makatulong met so panaral tayo na nipaakar ed si Jehova pian ombiskeg so pananisia tayo. Nen ginmapo tayon manaral na Biblia, naamtaan tayo ray manunan katuaan nipaakar ed si Jehova tan saray paraan to. Balet diad ilalabas na panaon, kaukolan  tayon natalosan iray araralem ya bengatla. Atan so labay ya ibaga nen Pablo sanen imbaga ton: “Say anawet a naakan et parad saray matatken la.” No iyaaplika tayo ray nanaaralan tayo, magmamaliw tayon marunong. Ibabaga na Biblia: “Say karunongan so sankaimportantian a bengatla.”​—Proverbio 4:5-7; 1 Pedro 2:2.

15. Akin et importante ya inar-aro tayo si Jehova tan saray agagi tayo?

¹⁵ Nayarin maksil so laman na sakey tan anggapoy sakit to, balet pian mansiansia ya ontan, amta to ya kaukolan ton tuloytuloy ya asikasoen so sarili to. Ontan met, say sakey ya matatken ed espiritual et amta to ya kaukolan toy mansagpot pian mansiansian malet so relasyon to ed si Jehova. Papanonotan itayo nen Pablo: “Itultuloy yon suboken no kasin wala kayo ed pananisia; itultuloy yon paneknekan no anto kayo.” (2 Corinto 13:5) Balet wala ni kaukolan tayo nilikud ed mabiskeg a pananisia. Nepeg ya tuloytuloy tayon paeleten so panangaro tayo ed si Jehova tan ed saray agagi. Imbaga nen Pablo: “No walaan ak na . . . kakabatan, tan no walan amin ed siak so pananisia pian niyalis ko ray palandey, balet anggapoy arok, anggapoy kakanaan ko.”​—1 Corinto 13:1-3.

16. Antoy labay nen Satanas ya isipen tayo?

¹⁶ Labay nen Satanas ya isipen tayon agtayo napaliket si Jehova anggan antoy gawaen tayo. Labay ton nadismaya itayo tan isipen tayon anggapo lay solusyon na saray problema tayo. Agto labay ya panmatalkan tayo ray kapara tayon Kristiano, tan agto labay ya maliket itayo. (Efeso 2:2) Amta nen Satanas ya say negatibon kanonotan et mauges so epekto tod sikatayo tan diad relasyon  tayo ed Dios. Balet walay inter nen Jehova ed sikatayo pian nalabanan tayo ray negatibon kanonotan. Inikdan to tayoy ilalo.

17. Akin et importante so ilalo?

¹⁷ Diad 1 Tesalonica 5:8, inkompara na Biblia so ilalo tayo ed hilmit ya manproprotekta ed ulo na sundalo, tan tinawag itan ya hilmit bilang “say ilalon kililiktar.” Say panilalo ed saray sipan nen Jehova so manprotekta ed isip tayo tan ontulong pian nalabanan tayo iray negatibon kanonotan.

18, 19. Panon ya akatulong ed si Jesus so ilalo?

¹⁸ Say ilalo nen Jesus so amabiskeg ed sikato. Diad sampot lan labi na bilay to diad dalin, nantutumbokan so irap ya dinalan to. Sikatoy trinaidor na maapit ya kaaro to. Tan imbaga na sakey nin kaaro to ya agto kabat si Jesus. Saray arum et tinmaynan tan imbatikan da. Saray mismon kabaleyan to so angakusa ed sikato, tan impaipasak  da pian manirap anggad ompatey. Antoy akatulong ed sikaton nasungdoan irayan ansakisakit ya agawa? “Lapud liket a niiyan diad arapan to, sikatoy nansungdo ed panamairapan a poste, imbaliwala to so kababaingan, tan yinmurong ed nikawanan na trono na Dios.”​—Hebreo 12:2.

¹⁹ Amta nen Jesus ya no mansiansian matoor, nigloria to so Ama to tan napaneknekan ton matila si Satanas. Lapud satan ya ilalo, sikatoy malikeliket. Amta to met ya magano to lan nakaiba lamet so Ama to ed tawen. Satan ya ilalo so akatulong ed sikaton mansungdo. Singa si Jesus, nepeg ya manpokus tayo met ed ilalo tayo. Atan so ontulong ed sikatayon makapansungdo anggan antoy nagawa.

20. Antoy makatulong ed sika ya mansiansian positibo?

²⁰ Nanenengneng nen Jehova so pananisiam tan pansusungdom. (Isaias 30:18; basaen so Malaquias 3:10.)  Insipan to ya “iter tod sika iray pirawat na pusom.” (Salmo 37:4) Kanian ipokus moy nonot mo ed ilalom. Labay nen Satanas ya naekalan kay ilalo tan isipen mon agbalot nagawa iray insipan nen Jehova. Balet agka manpapatalo ed negatibon kanonotan! No naeekalan ka lay ilalo, manpatulong ka ed si Jehova. Agmo lilingwanan irayan akasulat ed Filipos 4:6, 7: “Agkayo mapagpaga ed antokaman, noagta diad amin a bengatla et ipaamta yo ed Dios iray kerew yo diad panamegley na pikakasi tan masimoon a pikekerew tekep na pisasalamat; tan say kareenan na Dios a palumbasan toy amin a pakatalos so manbantay ed saray puso tan nonot yo diad panamegley nen Kristo Jesus.”

21, 22. (a) Antoy gagala nen Jehova parad dalin? (b) Antoy determinasyon mon gawaen?

²¹ Komon ta regular mon ipanaon ya dalepdepen iray balibalin nagawa ed arapen. Maganggano lan onsabi so panaon ya amin a totoo et mandayew lad si Jehova. (Apocalipsis 7:9, 14) Isip mo pay bilay diad balon mundo. Talagan marakdakep itan nen say anggan anton naisip tayo natan! Anggapo lay Satanas, saray demonyo to, tan amin ya kaugsan. Agka la mansakit tan agka ompatey. Imbes, kada agew et ombangon ka ya maligligsa tan malikeliket. Mantutulongan so amin pian gawaen ya paraiso so interon dalin. Walay masustansian panangan tan maligen a panayaman na amin. Saray totoo et aliwan maruksa odino masibeg, noagta manaaroan iran amin. Diad arapen, amin ya totoo ed dalin et panliketan day “maglorian kawayangan bilang ananak na Dios.”​—Roma 8:21.

²² Labay nen Jehova ya sikatoy pilien mon magmaliw a sankaapitan ya Kaarom. Kanian gawam so anggaay nayarian mon unoren si Jehova tan onapit ed sikato diad kada agew. Komon ta amin tayo et mansiansia ed panangaro na Dios diad andi-angga!​—Judas 21.