Nen akaalis la ray Israelita, anguman so nonot na Faraon tan labay to ran papawilen. Ingganggan to ray sundalo to: ‘Iparaan yo ray karwahek ya pan-guerra, ta usilan tayo ra! Dapat agtayo ra pinayagan ya onalis.’ Kanian inusilan to ray Israelita kaiba iray sundalo to.

Si Jehova so walad unaan na totoo to, tan walay tutumboken dan lurem no agew tan apoy no labi. Impaarap to rad Ambalangan Dayat, tan imbaga tod sikara ya mangipaalagey iray tolda tan mankampo ra ed gilig na dayat.

Ag-abayag, anengneng na saray Israelita ya nitan la so Faraon tan saray sundalo to. Anggapoy nabatikan da ta walad arapan da so dayat tan walad benegan da iray sundalon Ehipsio. Imbaga dad si Moises: ‘Ompatey tayo la! Agmo kami la komon impaway ed Ehipto.’ Balet imbaga nen Moises: ‘Agkayo natatakot. Alagar yoy pangiligtas nen Jehova ed sikatayo.’ Talagan walay tiwala nen Moises ed si Jehova, awa?

Imbaga nen Jehova ed saray Israelita ya manparaan la ran onalis. Diad saman ya labi, pinaonla nen Jehova imay lurem ed baetan na saray Ehipsio tan Israelita. Ambilunget diad kawalaan na saray Ehipsio. Balet maliwawa diad kawalaan na saray Israelita.

Imbaga nen Jehova ed si Moises ya iyunat toy lima to ed dayat.  Insan sanlabin pinasiplog nen Jehova so maksil ya dagem. Apaldua so dayat, kanian makadalan iray milyon ya Israelita diad pegley. Nanakar ira ed amagan dalin diad pegley na saray danum ya singa padir.

Tinumbok na saray sundalo na Faraon iray Israelita diad amagan dalin ed pegley na dayat. Balet ginulo nen Jehova iray sundalo kanian agda amtay arapen da. Nakal iray dalig na karwahe da. Inmeyag iray sundalo: ‘Onatras ti la! Si Jehova so milalaban parad sikara!’

Imbaga nen Jehova ed si Moises: ‘Iyunat moy limam ed dayat.’ Insan biglan tinmabon ed saray sundalo na Ehipto iray danum na dayat. Inatey so Faraon tan amin ya sundalo to. Anggapoy anggan sakey ya akaligtas.

Diad biek na dayat, angansion so dakdakel ya totoo pian idayew day Dios: “Kansionan koy Jehova, ta sikatoy nitandoron maong. Imbasileng tod dayat so kabayo tan samay akakabayo.” Legan iran mangakansion, sinmayaw iray bibii tan nantogtog ira na tamburin. Malikeliket iran amin ta talagan bulos la ra.