Walay anak ya bii nen Jezebel ya say ngaran to et Atalia. Mauge-uges met ya singa si ina to. Akiasawa si Atalia ed ari na Juda. Nen inatey so asawa nen Atalia, say anak ton laki so sinmublay ya ari. Balet nen inatey so anak to, ginawa toy sarili to ya manuley ed Juda. Insan to impapatey so amin ya posiblin magmaliw ya ari ed Juda, anggan saray mismon apo to, pian anggapoy onsalat ed sikato. Natatakot ed sikato so amin ya totoo.

Amta na Atagey ya Saserdoten si Jehoiada tan say asawa ton si Jehoseba ya mauges so gagawaen nen Atalia. Kanian impeligro na sayan sanasawa so bilay da pian iyamot so baby ni ya apo nen Atalia ya say ngaran to et Jehoas. Sikatoy kinomisan da diad templo.

Nen pitoy taon la nen Jehoas, tinipon nen Jehoiada so amin ya pangulo tan Levita tan imbaga tod sikara: ‘Bantayan yo iray puerta na templo tan agkayo manpapaloob na anggan siopa.’ Insan impaway nen Jehoiada si Jehoas tan kinoronaan to bilang ari na Juda. Inyeyag na saray totoo: ‘Manbilay komon na andukey so ari!’

Arengel nen Reyna Atalia so ingal na totoo kanian batik ed templo. Kanengneng tod balon ari, inyeyag to: ‘Rebelde kayo! Rebelde kayo!’ Inerel na saray pangulo iyan mauges ya reyna, insan da impaway ed templo, tan pinatey da. Panon to balet ta dakdakel lay naimpluensyaan to ya manggaway mauges?

Tinulongan nen Jehoiada iray totoo ya misipanan ed si Jehova tan im-promise da ya si Jehova labat so dayewen da. Ingganggan ira nen Jehoiada ya igeba so templo nen Baal tan mekmeken da ray idolo. Wala ray saserdote tan Levita ya pinili ton  mangasikaso ed kimey diad templo pian makapandayew lamet ditan iray totoo. Wala met iray pinili ton manbantay diad saray puerta na templo pian anggapoy makaloob ya agmalinis. Insan si Jehoas et inawit nen Jehoiada tan saray pangulo diad palasyo tan pinayurong dad trono. Malikeliket iray totoo ed Juda. Makapandayew la rad si Jehova. Anggapo lay mauges ya si Atalia tan say panagdayew ed Baal. Dakdakel so atulongan nen Jehoiada ta agtinmakot, awa?