Ibaga yo pad sikami no akin et manisia kayod ebolusyon nensaman.

Anggano binmaleg ak ya Katoliko, wala ray panduaruwaan ko nipaakar ed Dios. Singa bilang, agak makapanisia ed sakey ya Dios ya popoolan to ray totoo diad impierno. Kanian nen imbangat ed siak na saray propesor ko ed university ya saray mabilay a bengatla et nan-evolve tan ag-ira pinalsa na Dios, anisiaan ko itan, ta inisip kon walay ebidensya na satan. Sakey ni, agkokontraen na simbaan mi so ebolusyon, noagta ibabaga ran inmaneobra itan na Dios.

Akin et nagmaliw kayon interesado ed Biblia?

Ginmapon nanaral na Biblia so asawak ya si Susana ed saray Tasi nen Jehova, tan impanengneng dad sikato diad Biblia ya agpapairapen na Dios iray totoo diad maapoy ya impierno. * Impanengneng da met ed sikato so pormisa na Dios ya pagmaliwen ton paraiso so planeta tayo. * Nalmo min siansia iray malinew a bangat! Nen 1989, walay Tasi ya binmisita ed siak, say ngaran to et Nick. Legan min pantotongtongan so nipaakar ed laman na too tan say nanlapuan na satan, nandinayewan ko so simplin panagkatunongan ya walad Biblia diad Hebreos 3:4, ya inkuan ton “kada abung et walay angipaalagey, balet say angipaalagey ed amin a bengatla et say Dios.”

Akatulong kasi impanaral yod laman na too pian panisiaan yoy impamalsa?

On. Singa bilang, say paraan na laman tayo ya apigeren so sarili to et maal-alwar ya denisinyo. Alimbawa, walay apatiran manaabetan ya proseso diad iyabig na sugat, sarayan amin et ipapanonot dad siak ya bilang surgeon, mitutulongan ak labat ed sistema na panag-apiger ya sipor lan walad laman.

Ibaga yo pad sikami no antoy nagawa no asugat tayo.

Diad pigaran segundo, onggapo so unona ed mantutumbokan a  proseso ya denisinyo pian patundaen so pandala. Komplikadon maong tan epektibo irayan proseso. Sakey ni, say circulatory system tayo et walaay manga 100,000 kilometro ya blood vessel, tan seguradon labalabay iyan aligen na saray plumbing engineer ta sarag na satan ya puletan so pantedter tan apigeren so sarili to.

Antoy nagagawa ed komaduan proseso?

Diad loob na pigaran oras, ontunday pandala insan onlarag. Diad satan et walay mantutumbokan ya makapakelaw a nagawa. Unona, saray blood vessel ya inminget pian naparaiset so pandala et onawang la. Onawang iratan pian naaruman so dala ya onlad parte ya kawalaay sugat. Insan, palaragen na fluid ya napnoy protina so interon apektadon parte ya kawalaay sugat. Importante iyan fluid pian nalabanan so impeksion, pakapuyen so samal, tan ekalen so aderal ya tissue. Kada nagawa iratan, kaukolan ya napawalay minilyon ya espisyal iran molecule tan cell diad mantutumbokan ya nagawa. Arum ed saraya et kaukolan pian onggapo so onsublay ya proseso, insan kayari to et ontunda iran amin.

Panon so iyabig?

Diad pigaran agew, onggapoy laman tayo ya mamawala na saray kaukolan diad pangapiger, satan so pakapatnagan ya onggapo lay komatlon proseso tan onabot itan ed manga duay simba. Saray cell ya mamapawalay fiber ya onsakbong ed sugat et onlad apektadon parte tan diman ira manparakel. Ontan met, ontubo iray angkekelag ya blood vessel diad apektadon parte, insan ekalen na saratan so dutak tan mangiter na kaaruman iran nutrisyon legan na pangeekal ed saray temporaryon ulat, tan pangaapiger ed mismon sugat. Diad sakey nin komplikadon mantutumbokan ya nagawa, napawala iray espisyal ya cell ya pampeketen to ray gilig na sugat.

Talagan baleg ya trabaho! Panon kabayag so pangapiger?

Say sampot ya proseso, say pan-remodel, et sabien toy pigaran bulan. Ombiskeg lamet iray aputer ya pukel. Saray fiber ya diad unaan et akasakbong ed anlemek ya tissue na sugat et nasalatan na mas matibay ya tissue. Lapud sarayan amin, say iyaabig na sugat et makapadinayew ya alimbawa na marakdakep ya akaprograman pantutulongan.

Wala tay nanonotan yon agawa ya talagan nandinayewan yo?

Wala. Nanonotan ko ni may tinambal kon marikit ya manedad na 16 ya adisgrasya ed graben aksidente ed luluganan. Kritikal so kondisyon to, apilat so spleen to tan manpaparala la ed dalem. Nensaman, diad ontan ya kaso, kaukolan min operaan pian apigeren odino ekalen so spleen. Balet natan, mas mandedependi la ray doktor ed pakayari na laman ya mangapiger ed sarili to. Say ginawak labat et tinambal koy impeksion to, say naandin fluid, anemia, tan say nalilikna ton sakit. Kayari pigaran simba, anengneng ed impan-scan ya inmabig lay spleen to! No nanenengneng koy paraan na pangaapiger na laman ed sarili to, talagan pambiliban ko. Mas lalo ak ya kombinsidon denisinyo itayo na Dios.

Antoy agustoan yo ed saray Tasi nen Jehova?

Makaaro ira, tan naynay dan uusaren so Biblia pian ebatan iray tepet ko. Pandinayewan ko met so inkakpel da ed panginanabang dad saray sisiaen da tan say itutulong dad arum ya naaralan so nipaakar ed Dios.

Kasin akatulong ed trabaho yo so impagmaliw yon Tasi nen Jehova?

On. Singa bilang, atulongan ak ya nalabanan so compassion fatigue, sakey iyan klase na pakakesaw ed emosyon tan maslak iyan makakaapektod saray doktor tan nurse ya naynay ya onaarap ed saray totoon mansasakit odino nadidisgrasya. Tan no labay na saray pasyente so mitongtong, ipapaliwawak ed sikara so pormisa na Amalsa ya naandi lay sakit tan paniirap * tan anggapo lay mangibagan, “Mansasakit ak.” *