“Nankugip [so propeta na Dios a] si Daniel . . . sanen sikatoy walad dukolan. Insan insulat to so kompleton detalye na kugip to.”—Daniel 7:1, NW.

NO ANTOY KUAN NA BIBLIA

Nandurumay paraan na Dios pian ipasabi iray importantin mensahe ed totoo. Nensaman, sikatoy angusar met na kugip. Balet aliwa irayan ordinaryon inagew-agew a kugkugip, ya agnatalosan tan agmankokonektaan. Saray kugip ya manlalapud Dios et malinew tan lohikal, tan walay seguradon mensahe ra. Singa bilang, diad sakey a kugip nen propeta Daniel, anengneng toy nantutumbokan ya atap ya ayep a mangirerepresentad saray empiryo na politika, manlapud Babilonia anggad panaon tayo. (Daniel 7:1-3, 17) Panamegley met na kugip, imbaga na Dios ed si Jose ya taga Nazaret tan pinagka-ama nen Jesus ya itakas tod Ehipto so asawa tan anak to. Kanian, ag-apatey na masibeg ya Arin Herodes si Jesus. Nen inatey lay Herodes, impaamta itan na Dios ed si Jose panamegley na kugip, tan binagaan Ton ompawil la ran sankapamilya ed baley da.—Mateo 2:13-15, 19-23.

“Agyo papasulokan iray bengatlan nisulat.”—1 Corinto 4:6.

NO ANTOY KUAN NA BIBLIA

Saray kugip ya nabasad Biblia et kaibad saray mensahen impaisulat na Dios parad totoo. Oniay ibabaga na 2 Timoteo 3:16, 17: “Say interon Kasulatan et impuyan na Dios tan mausa-usar ed panagbangat, pananimbawa, panangipetek ed saray bengatla, panagdisiplina unong ed inkatunong, pian say too na Dios et sigpot a makayari tan akaparaan a maong parad amin a maabig a gawa.”

‘Ipaparaan itayon maong’ na Biblia diad pangipapasabid amin ya kaukolan tayon naamtaan tungkol ed Dios, saray kualidad to, saray estandarte to ed no antoy duga tan aliwa, tan say gagala to parad sikatayo diad dalin. Kanian, agla natan manguusar so Dios na kugkugip pian ipasabi iray mensahe tod totoo. No labay tayon naamtaay arapen tan say panlabayan to parad sikatayo, ‘agtayo papasulokan iray bengatlan nisulat’ diad Biblia. Sakey ni, amin lawarin totoo et walay Biblia ra tan aaralen da ray dakel ya mensahe na Dios, kaiba lay kugip.

“Sinalita na totoo so nanlapud Dios legan ya igigiya ira na masanton espiritu.”—2 Pedro 1:21.

NO ANTOY KUAN NA BIBLIA

Maslak ed saray kugip tan pasingawey ya walad Biblia et ibabaga ray nagawad arapen. Tatawagen irayan propesiya. Naamtaan ed sarayan insulat a propesiya no kasin napantiwalaan so Biblia tan saray nansulat. Kasin susto irayan sulsulat? Nengnengen tayoy sakey ya alimbawa—say pasingawey ya nabasad Daniel 8:1-7 ya insulat sanen magano lan deralen so Empiryo na Babilonia.

Binitla na propesiya so karnero a kalakian tan kanding a kalakian. Tinalo na kanding so karnero tan ginatin-gatinan to. Insan impaliwawa ed si Daniel no antoy labay ya ibaga na satan. Inkuan na sakey ya mensaheron anghel ed sikato: “Saman so karnero a kalakian . . . ya walaan nensaman na duara a saklor, sikara so saray arari na Media tan Persia. Et say kabagobago a kanding a kalakian sikato so ari na Grecia.” (Daniel 8:20, 21) Pruebaan na history ya tinalo na Medo-Persia so Babilonia bilang makapanyari ed mundo. Insan kayari na manga 200 taon, tinalo nen Alexander the Great na Greece so Medo-Persia. Makapabilib so inkasusto na saray propesiya ed Biblia, pati saray kugip ya mangipapaamtad arapen. Sayan agawa et mangipapanengneng ya duma so Biblia ed arum ni ran sagradon libro, kanian dapat labat ya pantiwalaan tayo.