MANUNAN ARTIKULO | NO WALAY TRAHEDYA
Naandi Iray Kaykayarian
Nen Biernes na Marso 11, 2011, yinmegyeg ed Japan ya say kakasil to et 9.0 magnitude. Masulok ya 15,000 so inatey tan masulok ya $200 bilyon (U.S.) so bili na aderal. Lapud apasakbayan ya walay onsabin tsunami, si Kei ya manedad na 32 et linmad atagey a pasen pian makaliktar. “Kaimbuasan to, pinmawil ak ed abung pian alaen no antoy sarag ko nin isalba,” so kuan to, “balet niyanor lan amin ed dayat, pati say apartment ko. Say atilak labat et say pundasyon.
“Agko nin tampol naisip ya aliwa labat lan pigpigaran kagawaan so abalang ko noagta amin ya walad kaliberliber ko. Naandin amin
SARAGEN SO EPEKTO NA TRAHEDYA
Manpokus ed no antoy wala nid sika imbes ya no antoy naandid sika. Ibabaga na Biblia: “Anggano dakdakel so kayarian na sakey a too, ag-iratan makapangiter ed sikato na bilay.” (Lucas 12:15) Nanonotan ni nen Kei so situasyon to: “Diad unaan,” kuan to, “nanggawa ak na listaan no anto ray labay ko, balet ipapanonot labat na satan ed siak iramay gamit kon niyanor. Nandesisyon ak ya say ilistak labat et saramay bengatlan talagan kaukolan ko, tan i-update koy listaan no wala la iratan. Akatulong itan ya listaan pian makabangon ak lamet.”
Imbes ya manpokus kad sarilim, usar moy eksperiensyam pian ligliwaen so arum. “Dakel so tulong ya naawat ko manlapud saray relief work tan personal a tulong na saray kaarok, balet nen napapasalan ko lay mangawat, singa nababalang lay respetok ed sarilik,” so kuan nen Kei. “Insan ko anonotan imay ibabaga na Biblia diad Gawa 20:35 ya ‘mas makapaliket so mangiter nen say mangawat.’ Lapud anggapoy niiter kon materyal, nansagpotan ko lan pasesegen so arum nin biktima na sayan kalamidad. Say pagmaliw ya mabunlok ed sayan paraan et akatulong ya maong ed siak.”
Manpikasi ed Dios parad praktikal a karunongan pian nasarag so kipapasen mo. Nanmatalek si Kei ed panamaseguro na Biblia ya say Dios et “imanoen toy pikakasi na saray pobri.” (Salmo 102:17, NW) Sarag mo met ya gawaen itan.
Kasin antam la? Ipapasakbay na Biblia ya onsabi panaon ya anggapo lay manaburido ed saray bengatlan naandi lapud kalamidad. *
^ par. 9 Pian naamtaan no antoy gagala na Dios parad dalin, nengnengen so kapitulo 3 na libron Anto so Peteg ya Ibabangat na Biblia? ya im-publish na saray Tasi nen Jehova.
Ompan Nagustoan Mo Met
EBAT ED SARAY TEPET ED BIBLIA
Antoy Ibabaga na Biblia Tungkol ed Natural Iran Kalamidad?
Kasin parusa iratan na Dios? Kasin tutulongan na Dios iray biktima na kalamidad?
