Say edukasyon ya manlalapud Biblia et marakdakep so epekto tod sikatayo. Imanoen pa irayan duaran alimbawa: Si Ricardo tan Andres.

RICARDO: Nen mantaon ak ni labat na 15, akila ak lad sakey a gang. Baleg so impluensya ed siak na saray nagmaliw ya kabarkadak. Diad tua, labalabay koy nakulong ya samploy taon! Singa ak natatapis, balet diad sikami, no akulong ka et panbiliban tan respetoen da ka. Tan ontan so labay ko.

Asalik so amin ya gagawaen na sakey ya gang, kaiba lay pan-drugs, sex, tan karawalan. Aminsan ya labi, kaiba ak ed paltogan. Say amtak ompatey ak lad saman, balet akatakas ak. Kayari na saman, ninonot kon maong no antoy labay kon nagawad bilay ko, tan nandesisyon ak ya manguman la. Balet panon ey? Siopay makatulong ed siak?

Maslak ed saray kakanayon mi et agmaliket. Maproblemay bilay da. Balet aliwan ontan so pamilya na sakey ed saray pangamaen ko. Amtak ya maomaong ira, tan uunoren da ray prinsipyo na Biblia. Diad tua, naaralan ko la nensaman ed sikara so ngaran na Dios ya Jehova. Kanian ag-abayag kayari na samay agawan paltogan, nampikasi ak ed si Jehova, binitlak so ngaran to tan kinerew koy tulong to. Agko inilaloan ya diad mismon sinmublay ya agew, walay sakey ya Tasi nen Jehova ya tinmoktok ed abung mi! Sikatoy angiyaral ed siak na Biblia.

Balet walay sinmabin problema. Lanang ak ya tatawagan na saray datin barkadak, itatagar da ak ya milad sikara. Mairap, pero tinanggian ko ira. Determinado ak ya ituloy so panaral koy Biblia, tan maong labat ta ontan so ginawak! Anguma-uman so bilay ko, tan nalmok so tuan liket.

Nanonotan ko nen nampikasi ak ed Dios, imbagak ya nensaman et labay koy nakulong na samploy taon pian respetoen da ak bilang membro na sakey a gang. Kanian kinerew kod sikato ya makapanlingkor ak komon na samploy taon bilang full-time ya ministro pian natulongan koy arum ya manguman a singa siak. Inebatan na Dios so pikakasik, ta 17 taon ak lan manlilingkor bilang full-time ya ministro! Sakey ni, agak balot akulong.

Balet, dakel ed saramay datin kakaarok so pigay taon lan walad prisoan. Saray arum et inatey la. No pawilen koy apalabas, talagan pisalsalamatan ko ray Tasin kakanayon ko. Ag-ira tinmakot ya magmaliw a duma tan unoren so ibabaga na Biblia. Mas nirespetok ira nen say siopaman a membro na gang. Nagkalalo la, misalsalamat ak ed Dios ta imbangat tod siak so sankaabigan ya paraan na kabibilay.

 ANDRES: Niyanak tan binmaleg ak ed lugar ya mair-irap so bilay, ya maslak so panag-drugs, panagkatkat, panagpatey, tan prostitusyon. Mainum si tatay ko tan adik. Lanang iran mankokolkol tan mansasakitan nen nanay ko.

Ugaw ak ni labat, mainum tan mandra-drugs ak la. Lanang ak ya ontatambay ed karsada tan mantatakew ak insan ko ilako. Nen ontatatken ak la, si tatay ko ya labay ton iyapit so liknaan tod siak, et imbangat to ak no panon so mangipuslit na drugs tan arum nin ilegal ya produkto pian ilako. Maples ak ya akuartaan. Balet aminsan, wala ray pulis ya linmad panaayaman ko. Inaresto da ak tan asentensiaan ak ya napriso na limay taon lapud krimen ya planon pamatey.

Aminsan ya kabuasan, inyanunsio dad prisoan ya imbitado so amin ya priso ya ondengel ed Saray Tasi nen Jehova ya manbabangat na Biblia. Inmatendi ak. Duga so ibabangat da, kanian nampaiyaral ak na Biblia ed sikara. Aliwan saramay labalabay mi labat ya narengel so pinili dan imbasa, imbes impanengneng da manlapud Biblia iray atagey ya estandarte na Dios ed moralidad.

Naisip ko ya agko sarag so manguman no anggapoy ontulong ed siak, lalo la ta babantaan ak na saray kaparak a priso ya kabusol day gagawaen ko. Kanian nampikasi ak tan kinmerew ak na biskeg tan karunongan, tan tinulongan ak nen Jehova. Diad tua, agko la ra inimano, imbes impulong kod arum ya priso so nipaakar ed Biblia.

Nen magano ak lan ompaway ed prisoan, natatakot ak ya maong kanian mas labay ko lay mansiansia diman! Nen onalis ak la, pinayapayan ak na dakel ya priso. Imbaga ni ingen na arum, “Sempet ka la, maaron pastor.”

Natatakot ak no iisipen koy nansumpalan lawari na bilay ko no agak nampaibangat ed Dios. Talagan misalsalamat ak ta inaro ak na Dios tan agto impasen ya anggapo lay ilalok. *